ਯੈੱਸ ਪੰਜਾਬ
ਨਵੀਂ ਦਿੱਲੀ, 27 ਦਸੰਬਰ, 2020:
ਕੇਂਦਰ ਵੱਲੋਂ ਲਿਆਂਦੇ ਖ਼ੇਤੀ ਕਾਨੂੂੰਨਾਂ ਵਿਰੁੱਧ ਦਿੱਲੀ ਦੇ ਬਾਰਡਰਾਂ ’ਤੇ ਚੱਲ ਰਹੇ ਕਿਸਾਨਅੰਦੋਲਨ ਨੂੂੰ ਸਮਰਥਨ ਦੇਣ ਲਈ ਪਿਛਲੇ ਇਕ ਹਫ਼ਤੇ ਤੋਂ ਦਿੱਲੀ ਵਿੱਚ ਡਟੇ ਜਲਾਲਾਬਾਦ (ਫਾਜ਼ਿਲਕਾ) ਦੇ ਸੀਨੀਅਰ ਵਕੀਲ ਸ: ਅਮਰਜੀਤ ਸਿੰਘ ਰਾਏ ਨਾ ਅੱਜ ਸਲਫ਼ਾਸ ਨਿਗਲ ਕੇ ਆਪਣੀ ਜਾਨ ਕਿਸਾਨ ਸੰਘਰਸ਼ ਦੇ ਲੇਖ਼ੇ ਲਾ ਦਿੱਤੀ।
ਬਾਬਾ ਰਾਮ ਸਿੰਘ ਨਾਨਕਸਰ ਵਾਲਿਆਂ ਵੱਲੋਂ ਕਿਸਾਨ ਸੰਘਰਸ਼ ਲਈ ਆਪਣੇ ਆਪ ਨੂੰ ਗੋਲੀ ਮਾਰ ਕੇ ਜੀਵਨ ਲੀਲਾ ਸਮਾਪਤ ਕਰ ਲੈਣ ਮਗਰੋਂ ਇਹ ਦੂਜੀ ਘਟਨਾ ਹੈ ਜਿਸ ਵਿੱਚ ਕਿਸਾਨ ਸੰਘਰਸ਼ ਦੀ ਮਦਦ ’ਤੇ ਆਇਆਂ ਕਿਸੇ ਨੇ ਆਪਣੀ ਜੀਵਨ ਲੀਲਾ ਸਮਾਪਤ ਕਰ ਲਈ ਹੋਵੇ।
ਜ਼ਿਕਰਯੋਗ ਹੈ ਕਿ ਸ: ਰਾਏ ਵੱਲੋਂ ਪ੍ਰਧਾਨ ਮੰਤਰੀ ਨੂੰ ਲਿਖ਼ਿਆ ਪੱਤਰ (ਸੁਸਾਈਡ ਨੋਟ) ਕਾਫ਼ੀ ਸਖ਼ਤ ਹੈ ਅਤੇ ਉਹ ਇਸਨੂੂੰ 18 ਦਸੰਬਰ ਤੋਂ ਹੀ ਲਿਖ਼ੀ ਬੈਠੇ ਸਨ। ਪੱਤਰ ਨੂੰ ਵੇਖ਼ ਕੇ ਪਤਾ ਲੱਗਦਾ ਹੈ ਕਿ ਉਹਨਾਂ ਨੇ 18 ਦਸੰਬਰ ਨੂੰ ਹੀ ਇਹ ਪੱਤਰ ਲਿਖ਼ ਕੇ ਦਸਤਖ਼ਤ ਕਰ ਲਏ ਸਨ ਪਰ ਅੱਜ 9 ਦਿਨਾਂ ਬਾਅਦ 27 ਦਸੰਬਰ ਨੂੰ ਉਨ੍ਹਾਂ ਨੇ ਨਿਰਾਸ਼ ਹੋ ਕੇ ਆਪਣੀ ਜਾਨ ਦੇ ਦੇਣ ਦੇ ਫ਼ੈਸਲੇ ਨੂੰ ਅੰਤਿਮ ਰੂਪ ਦਿੱਤਾ।
ਟਿਕਰੀ ਬਾਰਡਰ ਪਹੁੰਚੇ ਹੋਏ ਸ: ਰਾਏ ਦੇ ਬਾਕੀ ਸਾਥੀ ਤਾਂ ਵਾਪਸ ਆ ਗਏ ਸਨ ਪਰ ਉਹ ਉੱਥੇ ਹੀ ਟਿਕੇ ਰਹੇ ਅਤੇ ਅੱਜ ਉਨ੍ਹਾਂ ਸਵੇਰੇ ਸਲਫ਼ਾ ਨਿਗਲ ਲਈ ਜਿਸ ਮਗਰੋਂ ਉਨ੍ਹਾਂ ਨੂੰ ਐਂਬੂਲੈਂਸ ਰਾਹੀਂ ਪਹਿਲਾਂ ਬਹਾਦੁਰਗੜ੍ਹ ਦੇ ਹਸਪਤਾਲ ਵਿਖ਼ੇ ਲਿਜਾਇਆ ਗਿਆ ਜਿੱਥੋਂ ਉਨ੍ਹਾਂ ਦੀ ਗੰਭੀਰ ਹਾਲਤ ਨੂੰ ਵੇਖ਼ਦਿਆਂ ਉਨ੍ਹਾਂ ਨੂੰ ਪੀ.ਜੀ.ਆਈ. ਰੋਹਤਕ ਰੈਫ਼ਰ ਕੀਤਾ ਗਿਆ ਪਰ ਉੱਥੇ ਪੁੱਜਣ ਤੋਂ ਪਹਿਲਾਂ ਹੀ ਉਨ੍ਹਾਂ ਨੇ ਪ੍ਰਾਣ ਤਿਆਗ ਦਿੱਤੇ।
ਬਾਰ ਐਸੋਸੀਏਸ਼ਨ ਜਲਾਲਾਬਾਦ ਦੇ ਮੈਂਬਰ ਸ: ਅਮਰਜੀਤ ਸਿੰਘ ਰਾਏ ਨੇ ਮੌਤ ਨੂੰ ਗ਼ਲੇ ਲਾਉਣ ਲਈ ਸਲਫ਼ਾਸ ਖ਼ਾਣ ਤੋਂ ਪਹਿਲਾਂ ਬਕਾਇਦਾ ਅੰਗਰੇਜ਼ੀ ਵਿੱਚ ਇਕ ਪੱਤਰ ਪ੍ਰਧਾਨ ਮੰਤਰੀ ਮੋਦੀ ਦੇ ਨਾਂਅ ਲਿਖ਼ਿਆ। ਇਸ ਪੱਤਰ ਦੇ ਅੰਤ ਵਿੱਚ ਉਨ੍ਹਾਂ ਨੇ ਆਪਣੇ ਦਸਤਖ਼ਤ ਕਰਨ ਤੋਂ ਪਹਿਲਾਂ ਇਹ ਵੀ ਲਿਖ਼ਿਆ ਕਿ ‘ਨਿਆਂਪਾਲਿਕਾ ਵੀ ਜਨਤਾ ਵਿੱਚ ਆਪਣਾ ਵਿਸ਼ਵਾਸ ਗੁਆ ਚੁੱਕੀ ਹੈ।’
ਇਸ ਤੋਂ ਇਲਾਵਾ ਆਪਣੀ ਕੰਪਿਊਟਰਾਈਜ਼ਡ ਚਿੱਠੀ ਦੇ ਅਖ਼ੀਰ ਵਿੱਚ ਸ: ਰਾਏ ਨੇ ਹੱਥ ਨਾਲ ਪੰਜਾਬੀ ਵਿੱਚ ਹੇਠਾਂ ਦਿੱਤੀਆਂ ਸਤਰਾਂ ਵੀ ਲਿਖ਼ੀਆਂ ਹਨ:
ਕਿਸਾਨ ਦੀ ਮਜਬੂਰੀ ਏ, ਮੋਦੀ ਦੀ ਮਗਰੂਰੀ ਏ
ਇਸ ਸ਼ਮਾ ਨੂੰ ਜਗਦੇ ਰੱਖਣ ਲਈ, ਖ਼ੂਨ ਦਾ ਤੇਲ ਜ਼ਰੂਰੀ ਏ
ਭਾਰਤੀ ਕਿਸਾਨ ਮਜ਼ਦੂਰ ਏਕਤਾ, ਜ਼ਿੰਦਾਬਾਦ
‘ਡਿਕਟੇਟਰ ਮੋਦੀ ਦੇ ਨਾਂਅ ਚਿੱਠੀ’ ਸਿਰਲੇਖ਼ ਹੇਠ ਅੰਗਰੇਜ਼ੀ ਵਿੱਚ ਲਿਖ਼ੀ ਚਿੱਠੀ ਦਾ ਭਾਵਅਰਥ ਹੇਠ ਅਨੁਸਾਰ ਹੈ:
ਭਾਰਤ ਦੀ ਆਮ ਜਨਤਾ ਨੇ ਤੁਹਾਨੂੰ ਪੂਰਨ ਬਹੁਮਤ ਦਿੱਤਾ ਸੀ ਤਾਂ ਜੋ ਤੁਸੀਂ ਉਨ੍ਹਾਂ ਦੀ ਰੱਖ਼ਿਆ ਕਰ ਸਕੋ ਅਤੇ ਉਨ੍ਹਾਂ ਨੂੰ ਖੁਸ਼ਹਾਲ ਬਣਾ ਸਕੋ।
ਪਰ ਮੈਨੂੰ ਬੜੇ ਦੁੱਖ ਅਤੇ ਅਫਸੋਸ ਨਾਲ ਤੁਹਾਨੂੰ ਇਹ ਲਿਖ਼ਣਾ ਪੈ ਰਿਹਾ ਹੈ ਕਿ ਤੁਸੀਂ ਅੰਬਾਨੀ ਅਤੇ ਅਡਾਨੀ ਦੀ ਸ਼ਮੂਲੀਅਤ ਵਾਲੇ ਇਕ ਵਿਸ਼ੇਸ਼ ਗਰੁੱਪ ਦੇ ਪ੍ਰਧਾਨ ਮੰਤਰੀ ਬਣ ਗਏ ਹੋ।
ਕਿਸਾਨਾਂ ਅਤੇ ਮਜ਼ਦੂਰਾਂ ਸਮੇਤ ਆਮ ਲੋਕ ਤੁਹਾਡੇ ਲਿਆਂਦੇ ਕਾਲੇ ਖ਼ੇਤੀ ਕਾਨੂੰਨਾਂ ਕਰਨ ਠਗੇ ਗਏ ਮਹਿਸੂਸ ਕਰ ਰਹੇ ਹਨ ਅਤੇ ਉਨ੍ਹਾਂ ਨੂੰ ਆਪਣਾ ਭਵਿੱਖ ਧੁੰਦਲਾ ਨਜ਼ਰ ਆ ਰਿਹਾ ਹੈ।
ਸੜਕਾਂ ਅਤੇ ਰੇਲ ਟਰੈਕਾਂ ’ਤੇ ਬੈਠੇ ਲੋਕ ਵੋਟਾਂ ਲਈ ਨਹੀਂ ਆਪਣੇ ਪਰਿਵਾਰਾਂ ਅਤੇ ਅਗਲੀਆਂ ਪੀੜ੍ਹੀਆਂ ਦੀ ਰੋਜ਼ੀ ਲਈ ਬੈਠੇ ਹਨ।
ਕੁਝ ਪੂੰਜੀਪਤੀਆਂ ਦੇ ਫ਼ਾਇਦੇ ਲਈ ਤੁਸੀਂ ਆਮ ਆਦਮੀ ਨੂੰ ਅਤੇ ਖ਼ੇਤੀ ਨੂੰ ਤਬਾਹ ਕਰ ਰਹੇ ਹੋ, ਜਿਹੜੀ ਕਿ ਭਾਰਤ ਦੀ ਰੀੜ੍ਹ ਦੀ ਹੱਡੀ ਹੈ।
ਮੇਰੀ ਬੇਨਤੀ ਹੈ ਕਿ ਕੁਝ ਪੂੰਜੀਪਤੀਆਂ ਵਾਸਤੇ ਕਿਸਾਨਾਂ, ਮਜ਼ਦੂਰਾਂ ਅਤੇ ਆਮ ਲੋਕਾਂ ਦੀ ਰੋਜ਼ੀ ਰੋਟੀ ਨਾ ਖ਼ੋਹੀ ਜਾਵੇ ਅਤੇ ਉਨ੍ਹਾਂ ਨੂੰ ਸਲਫ਼ਾਸ ਖ਼ਾਣ ਲਈ ਮਜਬੂਰ ਨਾ ਕੀਤਾ ਜਾਵੇ।
ਸਮਾਜਿਕ ਤੌਰ ’ਤੇ ਤੁਸੀਂ ਆਮ ਲੋਕਾਂ ਨਾਲ ਧੋਖ਼ਾ ਕੀਤਾ ਹੈ ਅਤੇ ਸਿਆਸੀ ਤੌਰ ’ਤੇ ਤੁਸੀਂ ਆਪਣੀਆਂ ਭਾਈਵਾਲ ਪਾਰਟੀਆਂ ਨਾਲ ਧੋਖ਼ਾ ਕੀਤਾ ਹੈ ਜਿਨ੍ਹਾਂ ਵਿੱਚ ਅਕਾਲੀ ਦਲ ਵੀ ਸ਼ਾਮਿਲ ਹੈ।
ਇਹ ਸਮਝ ਲਓ ਕਿ ਲੋਕਾਂ ਦੀ ਆਵਾਜ਼ ਪਰਮਾਤਮਾ ਦੀ ਆਵਾਜ਼ ਹੁੰਦੀ ਹੈ। ਇਹ ਕਿਹਾ ਜਾ ਰਿਹਾ ਹੈ ਕਿ ਤੁਹਾਨੂੰ ਗੋਧਰਾ ਵਾਂਗ ਕੁਰਬਾਨੀਆਂ ਦੀ ਤਾਲਾਸ਼ ਹੈ ਅਤੇ ਮੈਂ ਤੁਹਾਡੀ ਗੁੂੰਗੀ ਬੋਲੀ ਆਤਮਾ ਨੂੰ ਜਗਾਉਣ ਲਈ ਇਸ ਵੱਡੇ ਅੰਦੋਲਨ ਵਿੱਚ ਆਪਣੀ ਕੁਰਬਾਨੀ ਪੇਸ਼ ਕਰਦਾ ਹਾਂ।
ਅਮਰਜੀਤ ਸਿੰਘ, ਐਡਵੋਕੇਟ 18 ਦਸੰਬਰ, 2020
ਬਾਰ ਐਸੋਸੀਏਸ਼ਨ, ਜਲਾਲਾਬਾਦ, ਫ਼ਾਜ਼ਿਲਕਾ।