ਯੈੱਸ ਪੰਜਾਬ
ਜਲੰਧਰ, 10 ਫ਼ਰਵਰੀ, 2020:
ਜਲੰਧਰ ਵਿਚ ਗੁਰੂ ਰਵਿਦਾਸ ਪ੍ਰਕਾਸ਼ ਪੁਰਬ ਦੇ ਸੰਬੰਧ ਵਿਚ ਲੱਗੇ ਮੇਲੇ ਤੋਂ ਵਾਪਸ ਜਾ ਰਹੇ ਦੋ ਨੌਜਵਾਨਾਂ ਦੀ ਐਕਟਿਵਾ ਖੜ੍ਹੀ ਬੱਸ ਨਾਲ ਜਾ ਟਕਰਾਈ ਜਿਸ ਨਾਲ ਇਕ ਦੀ ਮੌਤ ਹੋ ਗਈ ਜਦਕਿ ਦੂਜਾ ਹਸਪਤਾਲ ਵਿਚ ਜ਼ੇਰ ਏ ਇਲਾਜ ਹੈ।
ਮ੍ਰਿਤਕ ਦੀ ਪਛਾਣ 21 ਸਾਲਾ ਪ੍ਰਿੰਸ ਪੁੱਤਰ ਵਿਜੇ ਕੁਮਾਰ ਵਾਸੀ ਬਸਤੀ ਗੁਜ਼ਾਂਦੇ ਰੂਪ ਵਿਚ ਹੋਈ ਹੈ ਜਦਕਿ ਉਸਦਾ ਦੋਸਤ ਕਾਰਤਿਕ ਭਗਤ ਵਾਸੀ ਬਸਤੀ ਗੁਜ਼ਾਂ ਹਸਪਤਾਲ ਵਿਚ ਦਾਖ਼ਲ ਹੈ ਅਤੇ ਉਸਦੀ ਹਾਲਤ ਗੰਭੀਰ ਦੱਸੀ ਜਾ ਰਹੀ ਹੈ।
ਮ੍ਰਿਤਕ ਪ੍ਰਿੰਸ ਦੇ ਪਿਤਾ ਵਿਜੇ ਕੁਮਾਰ ਨੇ ਦੱਸਿਆ ਕਿ ਉਨ੍ਹਾਂ ਦਾ ਬੇਟਾ ਅਤੇ ਉਸਦਾ ਦੋਸਤ ਰਾਤ ਕਰੀਬ 1 ਵਜੇ ਮੇਲਾ ਵੇਖ਼ ਕੇ ਵਾਪਸ ਆ ਰਹੇ ਸਨ ਪ੍ਰਿੰਸ ਐਕਟਿਵਾ ’ਤੇ ਕਾਰਤਿਕ ਭਗਤ ਨੂੰ ਉਸਦੇ ਘਰ ਛੱਡਣ ਜਾ ਰਿਹਾ ਸੀ ਤਾਂ ਮਿੱਠੂ ਬਸਤੀ ਰੋਡ ’ਤੇ ਖੜ੍ਹੀ ਇਕ ਨਿੱਜੀ ਬੱਸ ਨਾਲ ਟੱਕਰ ਹੋ ਗਈ ਜਿਸ ਨਾਲ ਪ੍ਰਿੰਸ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ ਜਦਕਿ ਕਾਰਤਿਕ ਨੂੰ ਨਾਜ਼ੁਕ ਹਾਲਤ ਵਿਚ ਹਸਪਤਾਲ ਦਾਖ਼ਲ ਕਰਵਾਇਆ ਗਿਆ।
ਘਟਨਾ ਦੀ ਸੂਚਨਾ ਮਿਲਦੇ ਹੀ ਬਸਤੀ ਬਾਵਾ ਖ਼ੇਲ ਦੀ ਪੁਲਿਸ ਮੌਕੇ ’ਤੇ ਪੁੱਜੀ ਅਤੇ ਜਾਂਚ ਸ਼ੁਰੂ ਕਰ ਦਿੱਤੀ।