ਦਲਜੀਤ ਕੌਰ
ਸੰਗਰੂਰ, 28 ਨਵੰਬਰ, 2022:
ਸਾਡੇ ਸਮਾਜ ਵਿੱਚ ਅਨਪੜ੍ਹਤਾ, ਅਗਿਆਨਤਾ ਤੇ ਲਾਈਲੱਗਤਾ ਕਾਰਨ ਅੰਧਵਿਸ਼ਵਾਸ, ਵਹਿਮਾਂ-ਭਰਮਾਂ ਤੇ ਰੂੜ੍ਹੀਵਾਦੀ ਵਿਚਾਰਾਂ ਦਾ ਬੋਲਬਾਲਾ ਹੈ। ਇਸ ਵਿੱਚ ਫਸੇ ਵਿਕਤੀ ਅਖੌਤੀ ਸਿਆਣਿਆਂ ਦੇ ਭਰਮਜਾਲ ‘ਚ ਪੈ ਜਾਂਦੇ ਹਨ। ਕਈ ਅਖੌਤੀ ਸਿਆਣਿਆਂ ਨੂੰ ਅਖੌਤੀ ਭੂਤ-ਪ੍ਰੇਤ ਕੱਢਣ ਪ੍ਰਤੀ ਲੋਕਾਂ ਨੂੰ ਭਰਮਜਾਲ ਵਿੱਚ ਪਾਉਣ ਦੀ ‘ਜਾਚ’ ਆ ਜਾਂਦੀ ਹੈ।
ਉਹ ਆਪਣੇ ਘਰ ਜਾਂ ਕਿਸੇ ਪੀਰ ਫਕੀਰ ਦੇ ਬੂਹੇ ‘ਤੇ ਚੌਕੀਂ ਲਾ ਲੈਂਦੇ ਹਨ। ਜਿਆਦਾਤਰ ਚੌਕੀਆਂ ਵੀਰਵਾਰ ਨੂੰ ਹੀ ਲਗਦੀਆਂ ਹਨ। ਅਜਿਹੇ ਅਖੌਤੀ ਸਿਆਣਿਆਂ ਕੋਲ-ਦੋ ਚਾਰ ਵਿਅਕਤੀ ਜਾਂ ਆਖ ਲਈਏ ਇਨ੍ਹਾਂ ਦੇ ਚੇਲੇ-ਚਪਟੇ ਜਰੂਰ ਹੁੰਦੇ ਨੇ, ਜੋ ਇਨਾਂ ਦੀ ਝੂਠੀ ਸ਼ਲਾਘਾ ਕਰਦੇ ਰਹਿੰਦੇ ਹਨ। ਉਹ ਦਲਾਲੀ ਦਾ ਕੰਮ ਹੀ ਕਰਦੇ ਹਨ ਅਤੇ ਕਮਜੋਰ ਮਾਨਸਿਕਤਾ ਵਾਲੇ ਮਾਨਸਿਕ ਰੋਗੀਆਂ ਨੂੰ ਇਨ੍ਹਾਂ ਪਰਜੀਵੀਆਂ ਕੋਲ ਲਿਆਉਂਦੇ ਹਨ।
ਅਜਿਹੇ ਅਖੌਤੀ ਸਿਆਣਿਆਂ ਦੀਆਂ ਦੁਕਾਨਦਾਰੀ ਵਧੀਆ ਚਲਦੀ ਹੈ। ਮਾਨਸਿਕ ਰੋਗਾਂ ਅਤੇ ਸਰੀਰਕ ਅਲਾਮਤਾਂ ਨਾਲ ਸਤਾਏ ਲੋਕਾਂ ਦੀ ਇਹ ਅੰਨੇਵਾਹ ਲੁੱਟ ਕਰਦੇ ਹਨ। ਸਿਰਫ ਆਰਥਿਕ ਲੁੱਟ-ਖਸੁੱਟ ਹੀ ਨਹੀਂ ਕਰਦੇ, ਸਗੋਂ ਕਈ ਵਾਰੀ ਸਰੀਰਕ ਲੁੱਟ ਵੀ ਕਰ ਜਾਂਦੇ ਹਨ।
ਕਈ ਅਖੌਤੀ ਸਿਆਣੇ ਜਾਦੂ-ਟੂਣੇ ਕਰਦੇ ਤੇ ਧਾਗੇ-ਤਵੀਤ ਦਿੰਦੇ ਨੇ, ਬੱਚਾ ਨਾ ਹੋਣ ਜਾਂ ਕੁੜੀਆਂ ਹੀ ਕੁੜੀਆਂ ਹੋਣ ਦੀ ਸਥਿਤੀ ਵਿੱਚ, ਮੁੰਡਾ ਹੋ ਜਾਣ ਦੀ ਚਾਹਤ ਵਾਲੀਆਂ ਔਰਤਾਂ ਕਈ ਵਾਰ ਆਪਣੀ ਆਰਥਿਕ ਲੁੱਟ ਦੇ ਨਾਲ ਨਾਲ ਸਰੀਰਕ ਲੁੱਟ ਦਾ ਸ਼ਿਕਾਰ ਵੀ ਹੋ ਜਾਂਦੀਆਂ ਹਨ।
ਕਈ ਸਿਆਣੇ ਕਾਨੂੰਨੀ ਫੈਸਲੇ ਵੀ ਦੱਸਦੇ ਹਨ। ਇਨ੍ਹਾਂ ਦੀ ਚੌਕੀ ‘ਤੇ ਜ਼ਦੋ ਦੋਸ਼ੀ ਵਿਅਕਤੀ ਦਾ ਪਰਿਵਾਰਕ ਮੈਂਬਰ ਜਾਂਦਾ ਹੈ ਤਾਂ ਇਹ ਅਖੌਤੀ ਸਿਆਣੇ ਉਸ ਦੇ ਦੋਸ਼ ਮੁਕਤ ਕਰਨ ਬਾਰੇ ਕਹਿ ਕੇ ਪੂਰੀ ਲੁੱਟ ਕਰਦੇ ਹਨ, ਜਦ ਉਸ ਦੀ ਅਖੌਤੀ ਕਹੀ ਗਲ ਕੁਦਰਤੀ ਸੱਚ ਹੋ ਜਾਦੀ ਹੈ ਤਾਂ ਉਸ ਸਮੇਂ ਇਨ੍ਹਾਂ ਦੇ ਵਾਰੇ ਨਿਆਰੇ ਹੋ ਜਾਂਦੇ ਹਨ।
ਸਾਡੇ ਕੋਲ ਇਕ ਕੇਸ ਆਇਆ। ਇਕ ਵਿਅਕਤੀ ਕਿੱਤੇ ਵਜੋਂ ਵਧੀਆ ਮੰਨਿਆਂ-ਪ੍ਰਮੰਨਿਆਂ ਲੱਕੜ ਦਾ ਮਿਸਤਰੀ ਸੀ। ਉਸ ਦੀਆਂ ਚਾਰ ਧੀਆਂ ਸਨ। ਇਸ ਲਈ ਉਹ ਸਦਾ ਘੋਰ ਨਿਰਾਸ਼ਾ ਵਿੱਚ ਡੁੱਬਿਆ ਰਹਿੰਦਾ। ਉਹ ਹਰ ਸਮੇਂ ਉਚਾਟ ਰਹਿੰਦਾ। ਉਸਨੂੰ ਕੁਝ ਵੀ ਨਹੀਂ ਸੀ ਸੁੱਝਦਾ। ਉਸਦੇ ਮਨ ਉੱਤੇ ਬਹੁਤ ਗਹਿਰਾ ਪ੍ਰਭਾਵ ਪਿਆ ਅਤੇ ਉਹ ਚਿੰਤਾ ਦੇ ਡੂੰਘੇ ਸਮੁੰਦਰ ਵਿੱਚ ਡੁੱਬ ਗਿਆ। ਉਹ ਆਪਣੀਆਂ ਧੀਆਂ ਦੇ ਭਵਿੱਖ ਬਾਰੇ ਸੋਚਦਾ ਰਹਿੰਦਾ।
ਅਜੇ ਉਸਦੀਆਂ ਲੜਕੀਆਂ ਕੰਵਾਰੀਆਂ ਸਨ। ਚਿੰਤਾ ਤੇ ਨਿਰਾਸਾ ‘ਚ ਡੁੱਬਣ ਕਾਰਨਤੇ ਅੰਧਵਿਸ਼ਵਾਸੀ ਪਰਿਵਾਰ ਹੋਣ ਕਾਰਨ ਉਸਨੂੰ ਮਹਿਸੂਸ ਹੋਣ ਲੱਗਾ ਕਿ ਉਸਨੂੰ ਕੋਈ ਓਪਰੀ ਸ਼ੈਅ ਚਿੰਬੜ ਗਈ ਹੈ, ਜਿਸ ਕਾਰਨ ਉਹ ਹਰ ਸਮੇਂ ਡਰਦਾ ਰਹਿੰਦਾ।
ਉਸ ਦੇ ਮਨ ਵਿੱਚ ਇਹ ਭਰਮ ਪੈਦਾ ਹੋ ਗਿਆ ਹੈ ਕਿ ਉਸਨੂੰ ਕੋਈ ਭੂਤ-ਪ੍ਰੇਤ ਚਿੰਬੜੀ ਹੈ। ਜਦੋਂ ਇਸ ਤਰ੍ਹਾਂ ਦਿਲਗੀਰੀ ਵਧਦੀ ਗਈ ਤਾਂ ਉਸ ਦੀ ਘਰ ਵਾਲੀ ਉਸਨੂੰ ਆਪਣੇ ਪਿੰਡ ਦੇ ਸਿਆਣੇ ਕੋਲ ਲੈ ਗਈ ਜੋ ਪੁੱਛਾਂ ਦੇਣ ਦਾ ਕੰਮ ਕਰਦਾ ਸੀ। ਉਸ ਅਖੌਤੀ ਸਿਆਣੇ ਨੇ ਉਸਨੂੰ ਆਪਣੇ ਚੁੰਗਲ ਵਿੱਚ ਫਸਾ ਲਿਆ ਅਤੇ ਕਹਿੰਦਾ ਇਸਨੂੰ ਦੋ ਚੂੜੇਲਾ ਚਿੰਬੜੀਆਂ ਹੋਈਆਂ ਹਨ।
ਉਹ ਲਗਾਤਾਰ ਇਕ ਤੋਂ ਬਾਅਦ ਦੂਜੇ ਅਖੌਤੀ ਸਿਆਣੇ ਕੋਲ ਜਾਂਦੇ ਰਹੇ। ਸਾਰਿਆਂ ਨੇ ਇਲਾਜ ਲਈ ਕੜਾਹੀ ਤੇ ਢਾਲੇ ਦੇ ਨਾਉਂ ਹੇਠ ਕਾਫੀ ਪੈਸੇ ਲਿਆ। ਛੇ ਮਹੀਨੇ ਵੱਖ-ਵੱਖ ਸਿਆਣਿਆਂ ਕੋਲ ਜਾਂਦੇ ਰਹੇ, ਹਾਲਤ ਬਦ ਤੋਂ ਬਦਤਰ ਹੁੰਦੀ ਗਈ, ਕਈ ਸਿਆਣਿਆਂ ਕੋਲ ਲੁੱਟ ਕਰਾਉਣ ਤੋਂ ਬਾਅਦ ਉਨ੍ਹਾਂ ਨੇ ਇਕ ਅਧਿਆਪਕ ਦੇ ਕਹਿਣ ਤੇ ਤਰਕਸ਼ੀਲ ਸੁਸਾਇਟੀ ਪੰਜਾਬ ਇਕਾਈ ਸੰਗਰੂਰ ਸਾਡੇ ਨਾਲ ਸੰਪਰਕ ਕੀਤਾ।
ਸਾਡੀ ਤਿੰਨ ਮੈਂਬਰੀ ਕਮੇਟੀ ਮਾਸਟਰ ਪਰਮਵੇਦ, ਕ੍ਰਿਸ਼ਨ ਸਿੰਘ, ਗੁਰਦੀਪ ਸਿੰਘ ਤੇ ਆਧਾਰਿਤ ਤਰਕਸ਼ੀਲ ਟੀਮ ਨੇ ਮਨੋਵਿਗਿਆਨਕ ਤੇ ਵਿਗਿਆਨਕ ਆਧਾਰ ਤੇ ਪੜਤਾਲ ਕਰਨ ਉਪਰੰਤ ਪਾਇਆ ਗਿਆ ਕਿ ਆਪਣੀਆਂ ਲੜਕੀਆਂ ਦੇ ਭਵਿੱਖ ਤੇ ਆਪਣੇ ਕੰਮ ਬਾਰੇ ਚਿੰਤਤ ਸੀ। ਉਸ ਉਪਰੰਤ ਅਖੌਤੀ ਸਿਆਣਿਆਂ ਨੇ ਉਸਨੂੰ ਮਾਨਸਿਕ ਰੋਗੀ ਬਣਾਇਆ ਹੋਇਆ ਸੀ।
ਉਸਨੂੰ ਭੂਤ ਪ੍ਰੇਤ ਦੀ ਅਣਹੋਂਦ ਬਾਰੇ ਵਿਸਵਾਸ਼ ਦਿਵਾਉਣ ਤੋਂ ਬਾਅਦ ਉਸਾਰੂ ਤੇ ਸਾਰਥਿਕ ਸੁਝਾਅ ਦਿੱਤੇ। ਉਹ ਗੱਲਬਾਤ ਵਿਧੀ ਰਾਹੀਂ ਪੂਰੀ ਤਰ੍ਹਾਂ ਸਾਡੇ ਵਿਸ਼ਵਾਸ ਵਿੱਚ ਆ ਚੁਕਿਆ ਸੀ। ਉਸ ਦੇ ਮਨ ਵਿਚੋਂ ਮਨੋ ਕਲਪਤ ਭੂਤਾਂ ਪ੍ਰੇਤਾਂ, ਚੂੜੇਲਾਂ ਦੇ ਡਰ ਨੂੰ ਸਾਫ ਕੀਤਾ। ਉਹ ਕਾਫੀ ਠੀਕ ਮਹਿਸੂਸ ਕਰ ਰਿਹਾ ਸੀ। ਉਸ ਦੇ ਕਾਰੋਬਾਰ ਬਾਰੇ ਵਿਸਥਾਰਤ ਗਲਬਾਤ ਕੀਤੀ, ਸਾਰੇ ਭਰਮ ਦੂਰ ਕੀਤੇ। ਉਸ ਦੇ ਚਿਹਰੇ ਤੇ ਆਈ ਮੁਸਕਰਾਹਟ ਉਸਦੇ ਠੀਕ ਹੋਣ ਦੀ ਗਵਾਹੀ ਸੀ।
ਗੱਲਬਾਤ ਰਾਹੀ ਉਸਦੇ ਅਚੇਤ ਮਨ ਬੈਠਾ ਅਖੌਤੀ ਚੂੜੇਲਾਂ ਦੇ ਡਰ ਨੂੰ ਦੂਰ ਕੀਤਾ
ਮਾਸਟਰ ਪਰਮਵੇਦ ਨੇ ਦੱਸਿਆ ਕਿ ਕੁੱਝ ਦਿਨਾਂ ਬਾਅਦ ਜਦੋਂ ਦੁਬਾਰਾ ਉਹਨਾਂ ਕੋਲ਼ ਆਇਆਂ ਤਾ ਉਸਦੀਆਂ ਅੱਖਾਂ ਵਿੱਚ ਚਮਕ ਸੀ ਅਤੇ ਉਹ ਖੁਸ਼ ਨਜ਼ਰ ਆ ਰਿਹਾ ਸੀ। ਉਸਨੇ ਆਪਣਾ ਕਿੱਤਾ ਪੂਰੀ ਮਿਹਨਤ ਤੇ ਤਨਦੇਹੀ ਨਾਲ ਕਰਨਾ ਸੁਰੂ ਕਰ ਦਿੱਤਾ ਸੀ। ਉਸ ਦੇ ਘਰ ਵਿੱਚ ਮੁੜ ਖੁਸ਼ੀਆਂ ਪਰਤ ਆਈਆਂ। ਉਸ ਦੇ ਪਰਿਵਾਰ ਨੂੰ ਅਖੌਤੀ ਭੂਤਾਂ ਪ੍ਰੇਤਾਂ ਦੀ ਅਸਲੀਅਤ ਬਾਰੇ ਵਿਸਥਾਰ ਪੂਰਵਕ ਸਮਝਾਇਆ, ਤਰਕਸ਼ੀਲ ਮੈਗਜੀਨ ਪੜ੍ਹਨ ਲਈ ਪ੍ਰੇਰਿਤ ਕੀਤਾ ਤੇ ਵਿਗਿਆਨਕ ਵਿਚਾਰਾਂ ਵਾਲਾ ਕਾਫ਼ੀ ਸਾਹਿਤ ਪੜ੍ਹਨ ਲਈ ਦਿੱਤਾ ਤੇ ਵਿਗਿਆਨਕ ਸੋਚ ਅਪਣਾਉਣ ਦਾ ਸੁਨੇਹਾ ਦੇ ਕੇ ਤੋਰਿਆ।
ਯੈੱਸ ਪੰਜਾਬ ਦੀਆਂ ਪੰਜਾਬੀ ਖ਼ਬਰਾਂ ਲਈ ਇੱਥੇ ਕਲਿੱਕ ਕਰਕੇ ਸਾਡਾ ਫ਼ੇਸਬੁੱਕ ਪੇਜ ਲਾਈਕ ਕਰੋ