ਯੈੱਸ ਪੰਜਾਬ
ਮਾਨਸਾ, 6 ਦਸੰਬਰ, 2022:
ਕੌਮਾਂਤਰੀ ਪ੍ਰਸਿੱਧੀ ਪ੍ਰਾਪਤ ਪੰਜਾਬੀ ਗਾਇਕ-ਰੈੱਪਰ ਸਿੱਧੂ ਮੂਸੇਵਾਲਾ ਦੇ ਕਤਲ ਮਾਮਲੇ ਵਿੱਚ ਹੁਣ ਹੋਰ ਪ੍ਰਸਿੱਧ ਗਾਇਕਾਂ ਬੱਬੂ ਮਾਨ ਅਤੇ ਮਨਕੀਰਤ ਔਲਖ਼ ਸਣੇ ਕਈ ਹੋਰਨਾਂ ਤੋਂ ਪੁੱਛ ਗਿੱਛ ਦੀ ਤਿਆਰੀ ਕੀਤੀ ਜਾ ਰਹੀ ਹੈ।
ਇਕ ਪੰਜਾਬੀ ਨਿਊਜ਼ ਚੈਨਲ ਅਨੁਸਾਰ ਮਾਨਸਾ ਪੁਲਿਸ ਇਨ੍ਹਾਂ ਦੋਹਾਂ ਗਾਇਕਾਂ ਤੋਂ ਇਲਾਵਾ ਕਈ ਹੋਰ ਲੋਕਾਂ ਤੋਂ ਪੁੱਛਗਿੱਛ ਲਈ ਹੁਣ ‘ਉੱਪਰੋਂ’ ਹਰੀ ਝੰਡੀ ਮਿਲਣ ਦੀ ਉਡੀਕ ਵਿੱਚ ਹੈ।
ਜ਼ਿਕਰਯੋਗ ਹੈ ਕਿ ਸਿੱਧੂ ਮੂਸੇਵਾਲਾ ਦੇ ਪਿਤਾ ਸ: ਬਲਕੌਰ ਸਿੰਘ ਅਤੇ ਮਾਤਾ ਚਰਨ ਕੌਰ ਰੈਪਰ ਦੇ ਕਤਲ ਤੋਂ ਬਾਅਦ ਲਗਾਤਾਰ ਇਹ ਕਹਿੰਦੇ ਆ ਰਹੇ ਹਨ ਕਿ ਫ਼ੜੇ ਜਠ ਰਹੇ ਲੋਕ ਤਾਂ ਮਾਤਰ ਮੋਹਰਾ ਹਨ ਜਦਕਿ ਪੁਲਿਸ ਨੂੰ ਉਨ੍ਹਾਂ ਤਕ ਪੁੱਜਣਾ ਚਾਹੀਦਾ ਹੈ ਜਿਨ੍ਹਾਂ ਨੇ ਇਹ ਕਤਲ ਕਰਵਾਇਆ ਹੈ। ਇਸ ਮਾਮਲੇ ਵਿੱਚ ਉਹ ਇਹ ਵੀ ਕਈ ਵਾਰ ਆਖ਼ ਚੁੱਕੇ ਹਨ ਕਿ ਇਹ ਇੰਡਸਟਰੀ ਨਾਲ ਸੰਬੰਧਤ ਲੋਕ ਹਨ।
ਇਸ ਤੋਂ ਇਲਾਵਾ ਵੀ ਬੱਬੂ ਮਾਨ ਅਤੇ ਮਨਕੀਰਤ ਔਲਖ਼ ਉਹ ਗਾਇਕ ਹਨ ਜਿਨ੍ਹਾਂ ਦਾ ਸਿੱਧੂ ਦੇ ਹੁੰਦਿਆਂ ਸਿੱਧੂ ਨਾਲ ਸੋਸ਼ਲ ਮੀਡੀਆ ’ਤੇ ਤਕਰਾਰ ਅਤੇ ਚੈਲੰਜਬਾਜ਼ੀ ਚੱਲਦੀ ਰਹੀ ਅਤੇ ਗਾਣਿਆਂ ਵਿੱਚ ਵੀ ਇਕ ਦੂਜੇ ਨੂੰ ਚੋਭਾਂ ਲਾਈਆਂ ਜਾਂਦੀਆਂ ਸਨ।
ਚੈਨਲ ਦਾ ਇਹ ਵੀ ਦਾਅਵਾ ਹੈ ਕਿ ਮਾਨਸਾ ਪੁਲਿਸ ਨੇ ਫ਼ਿਲਮ ਅਤੇ ਮਿਊਜ਼ਿਕ ਇੰਡਸਟਰੀ ਨਾਲ ਸੰਬੰਧਤ ਪ੍ਰੋਡਿਊਸਰਾਂ ਅਤੇ ਹੋਰ ਕਈ ਲੋਕਾਂ ਦੀ ਇਕ ਸੂਚੀ ਤਿਆਰ ਕੀਤੀ ਹੈ ਜਿਨ੍ਹਾਂ ਤੋਂ ਇਸ ਮਾਮਲੇ ਵਿੱਚ ਪੁੱਛ ਗਿੱਛ ਕੀਤੀ ਜਾਵੇਗੀ।
ਇਸ ਤੋਂ ਇਲਾਵਾ ਇਹ ਵੀ ਕਿਹਾ ਜਾ ਰਿਹਾ ਹੈ ਕਿ ਲਾਰੈਂਸ ਬਿਸ਼ਨੋਈ ਗਰੁੱਪ ਨਾਲ ਸੰਬੰਧਤ ਰਹੇ ਅਕਾਲੀ ਆਗੂ ਵਿੱਕੀ ਮਿੱਡੂਖ਼ੇੜਾ ਦੇ ਭਰਾ ਅਜੇਪਾਲ ਤੋਂ ਵੀ ਪੁਲਿਸ ਨੇ ਲਗਪਗ ਇਕ ਘੰਟਾ ਪੁੱਛ ਗਿੱਛ ਕੀਤੀ ਹੈ ਅਤੇ ਉਸਤੋਂ ਹੋਰ ਪੁੱਛਗਿੱਛ ਵੀ ਕੀਤੀ ਜਾ ਸਕਦੀ ਹੈ।
ਯਾਦ ਰਹੇ ਕਿ ਲਾਰੈਂਸ ਗਰੁੱਪ ਇਹ ਦਾਅਵਾ ਕਰਦਾ ਆ ਰਿਹਾ ਹੈ ਕਿ ਸਿੱਧੂ ਮੂਸੇਵਾਲਾ ਦਾ ਕਤਲ ਵਿੱਕੀ ਮਿੱਡੂਖ਼ੇੜਾ ਤੇ ਗੁਰਲਾਲ ਬਰਾੜ ਦੇ ਕਤਲ ਦਾ ਬਦਲਾ ਲੈਣ ਲਈ ਕੀਤਾ ਗਿਆ ਸੀ। ਵਿੱਕੀ ਮਿੱਡੂਖ਼ੇੜਾ ਲਾਰੈਂਸ ਦੇ ਨਜ਼ਦੀਕੀਆਂ ਵਿੱਚ ਸੀ ਜਦਕਿ ਗੁਰਲਾਲ ਬਰਾੜ ਵਿਦੇਸ਼ ਬੈਠੇ ‘ਮਾਸਟਰਮਾਈਂਡ’ ਗੋਲਡੀ ਬਰਾੜ ਦਾ ਚਚੇਰਾ ਭਰਾ ਸੀ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ