ਭਾਜਪਾ ਵਿੱਚ ਸ਼ਾਮਲ ਹੋਏ ਸ਼ੀਤਲ ਅੰਗੁਰਾਲ ਦੀ ਡਰੱਗ ‘ਕਿੰਗਪਿਨ’ ਮਨੀ ਠਾਕੁਰ ਨਾਲ ਤਸਵੀਰ ਵਾਇਰਲ

ਯੈੱਸ ਪੰਜਾਬ
ਜਲੰਧਰ, 29 ਮਾਰਚ, 2024

ਵਿਵਾਦਤ ਸਾਬਕਾ ਵਿਧਾਇਕ ਸ਼ੀਤਲ ਅੰਗੁਰਾਲ, ਜੋ ਬੀਤੇ ਦਿਨੀਂ ‘ਆਮ ਆਦਮੀ ਪਾਰਟੀ’ ਨੂੰ ਛੱਡ ਕੇ ਭਾਜਪਾ ਵਿੱਚ ਸ਼ਾਮਲ ਹੋ ਗਏ ਸਨ, ਦੀ ਡਰੱਗ ਰੈਕੇਟ ਦੇ ‘ਕਿੰਗਪਿਨ’ ਦੱਸੇ ਜਾਂਦੇ ਮਨੀ ਠਾਕੁਰ ਨਾਲ ਤਸਵੀਰ ਵਾਇਰਲ ਹੋ ਰਹੀ ਹੈ।

ਸ਼ੀਤਲ ਅੰਗੁਰਾਲ ਦੇ ਡਰੱਗ ਰੈਕੇਟ ਸਰਗਨਾ ਨਾਲ ਇਸ ਰਿਸ਼ਤੇ ਦੇ ਉਜਾਗਰ ਹੋਣ ਮਗਰੋਂ ਭਾਜਪਾ ਵਿੱਚ ਉਨ੍ਹਾਂ ਦੀ ਵਾਪਸੀ ਪਾਰਟੀ ਲਈ ਸਿਰਦਰਦੀ ਬਣ ਸਕਦੀ ਹੈ।

ਜ਼ਿਕਰਯੋਗ ਹੈ ਕਿ ਜਲੰਧਰ ਕਮਿਸ਼ਨਰੇਟ ਪੁਲਸ ਨੇ ਹਾਲ ਵਿੱਚ ਹੀ ਇੱਕ ਅੰਤਰਰਾਸ਼ਟਰੀ ਡਰੱਗ ਰੈਕੇਟ ਦਾ ਪਰਦਾਫ਼ਾਸ਼ ਕੀਤਾ ਸੀ, ਜੋ ਅਫ਼ੀਮ ਨੂੰ ਕਥਿਤ ਤੌਰ ’ਤੇ ਕੋਰੀਅਰ ਸਰਵਿਸ ਰਾਹੀਂ ਵੱਖ-ਵੱਖ ਦੇਸ਼ਾਂ ਨੂੰ ਸਪਲਾਈ ਕਰਦਾ ਸੀ।

ਇਸ ਰੈਕੇਟ ਦੇ ਸਰਗਨਾ ਦੀ ਪਛਾਣ ਜਲੰਧਰ ਦੇ ਰਹਿਣ ਵਾਲੇ ਨੌਜਵਾਨ ਮਨੀਸ਼ ਉਰਫ਼ ਮਨੀ ਠਾਕੁਰ ਵਜੋਂ ਹੋਈ ਹੈ ਜੋ ਇਸ ਵੇਲੇ ਯੂ.ਕੇ. ਵਿੱਚ ਰਹਿ ਰਿਹਾ ਹੈ। ਇਸ ਨਾਲ ਜੁੜੇ ਮਾਮਲੇ ਵਿੱਚ 5 ਕਿੱਲੋ ਅਫ਼ੀਮ ਫ਼ੜੀ ਗਈ ਸੀ ਅਤੇ ਤਿੰਨ ਕਥਿਤ ਦੋਸ਼ੀ ਅਮਨ, ਸੰਨੀ ਅਤੇ ਸਹਿਜਲ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਸੀ।

ਹੁਣ ਸ਼ੀਤਲ ਅੰਗਰੁਾਲ ਅਤੇ ਮਨੀ ਠਾਕੁਰ ਦੀਆਂ ਸੋਸ਼ਲ ਮੀਡੀਆ ’ਤੇ ਘੁੰਮ ਰਹੀਆਂ ਤਸਵੀਰਾਂ ਭਾਜਪਾ ਲਈ ਨਮੋਸ਼ੀ ਦਾ ਕਾਰਨ ਬਣ ਰਹੀਆਂ ਹਨ ਕਿਉਂਕਿ ਇਹ ਮੁੱਦਾ ਆਗਾਮੀ ਲੋਕ ਸਭਾ ਚੋਣਾਂ ਵਿੱਚ ਉਛਲਣ ਦੀ ਸੰਭਾਵਨਾ ਹੈ।

ਸ਼ੀਤਲ ਅੰਗੁਰਾਲ ਵੱਲੋਂ 2022 ਚੋਣਾਂ ਲਈ ਚੋਣ ਕਮਿਸ਼ਨ ਕੋਲ ਭਰੇ ਹਲਫ਼ਨਾਮੇ ਵਿੱਚ ਉਨ੍ਹਾਂ ਨੇ ਆਪ ਖ਼ੁਲਾਸਾ ਕੀਤਾ ਸੀ ਕਿ ਉਨ੍ਹਾਂ ਵਿਰੁੱਧ ਵੱਖ-ਵੱਖ ਧਾਰਾਵਾਂ ਤਹਿਤ 9 ਮਾਮਲੇ ਦਰਜ ਹਨ।

ਇਸੇ ਦੌਰਾਨ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਸ਼ੀਤਲ ਅੰਗੁਰਾਲ ਨੇ ਮੰਨਿਆ ਹੈ ਕਿ ਉਹ ਮਨੀ ਠਾਕੁਰ ਨੂੰ ਜਾਣਦਾ ਹੈ ਅਤੇ ਉਸਨੇ ਵਿਧਾਨ ਸਭਾ ਚੋਣਾਂ ਦੌਰਾਨ ਉਸਦੀ ਮਦਦ ਕੀਤੀ ਸੀ ਪਰ ਨਾਲ ਹੀ ਉਸਦਾ ਕਹਿਣਾ ਹੈ ਕਿ ਉਹ ਲਗਪਗ 10 ਮਹੀਨੇ ਪਹਿਲਾਂ ਯੂ.ਕੇ. ਚਲਾ ਗਿਆ ਸੀ ਅਤੇ ਉਸਨੂੰ ਪਤਾ ਨਹੀਂ ਹੈ ਕਿ ਉਹ ਉੱਥੇ ਕੀ ਕਰ ਰਿਹਾ ਹੈ। ਅੰਗੁਰਾਲ ਦਾ ਕਹਿਣਾ ਹੈ ਕਿ ਉਹ ਮਨੀ ਠਾਕੁਰ ਵੱਲੋਂ ਕੀਤੇ ਜਾ ਰਹੇ ਕੰਮਾਂ ਲਈ ਜ਼ਿੰਮੇਵਾਰ ਨਹੀਂ ਹੈ।

ਸ਼ੀਤਲ ਅੰਗੁਰਾਲ ਨੇ ਕਿਹਾ ਕਿ ਮਨੀ ਠਾਕੁਰ ਦੀ ਤਸਵੀਰ ਕੇਵਲ ਉਸਦੇ ਨਾਲ ਹੀ ਨਹੀਂ ਹੈ ਸਗੋਂ ਉਸਦੀਆਂ ਤਸਵੀਰਾਂ ਸਰਕਾਰ ਦੇ ਇੱਕ ਮੰਤਰੀ ਅਤੇ ਇੱਕ ਅਕਾਲੀ ਆਗੂ ਦੇ ਨਾਲ ਵੀ ਹਨ ਅਤੇ ਉਹ ਇਹ ਤਸਵੀਰਾਂ ਛੇਤੀ ਜਾਰੀ ਕਰਨਗੇ।

ਆਪਣੇ ਉੱਤੇ ਦਰਜ ਮਾਮਲਿਆਂ ਬਾਰੇ ਅੰਗੁਰਾਲ ਦਾ ਕਹਿਣਾ ਹੈ ਕਿ ਉਹਨਾਂ ਖ਼ਿਲਾਫ਼ ਕਈ ਮਾਮਲੇ ਖ਼ਤਮ ਹੋ ਚੁੱਕੇ ਹਨ ਅਤੇ ਹੁਣ ਕੇਵਲ ਦੋ ਮਾਮਲੇ ਹੀ ਰਹਿ ਗਏ ਹਨ ਅਤੇ ਉਨ੍ਹਾਂ ਨੂੰ ਯਕੀਨ ਹੈ ਕਿ ਅਦਾਲਤਾਂ ਤੋਂ ਉਨ੍ਹਾਂ ਨੂੰ ਇਨਸਾਫ਼ ਮਿਲੇਗਾ।