ਯੈੱਸ ਪੰਜਾਬ
ਲੁਧਿਆਣਾ, 18 ਅਪ੍ਰੈਲ, 2024
ਲੁਧਿਆਣਾ ਦੇ ਸ਼ਿਮਲਾਪੁਰੀ ਇਲਾਕੇ ਵਿੱਚ ਇੱਕ ਮਾਸੂਮ ਬੱਚੀ ਦਿਲਰੋਜ਼ ਕੌਰ ਨੂੰ ਬੜੀ ਬੇਰਹਿਮੀ ਨਾਲ ਕਤਲ ਕਰਨ ਦੇ ਮਾਮਲੇ ਵਿੱਚ ਦੋਸ਼ੀ ਔਰਤ ਨੀਲਮ ਨੂੰ ਫ਼ਾਂਸੀ ਦੀ ਸਜ਼ਾ ਸੁਣਾਈ ਹੈ।
ਲੁਧਿਆਣਾ ਦੇ ਸੈਸ਼ਨ ਜੱਜ ਸ੍ਰੀ ਮੁਨੀਸ਼ ਸਿੰਗਲ ਦੀ ਅਦਾਲਤ ਵੱਲੋਂ ਅੱਜ ਢਾਈ ਸਾਲਾ ਬੱਚੀ ਦੇ ਕਤਲ ਦੇ ਮਾਮਲੇ ਵਿੱਚ ਇਹ ਸਜ਼ਾ ਸੁਣਾਏ ਜਾਣ ਮੌਕੇ ਬੱਚੀ ਦੇ ਮਾਤਾ ਪਿਤਾ ਮੌਜੂਦ ਸਨ। ਯਾਦ ਰਹੇ ਕਿ 12 ਅਪ੍ਰੈਲ ਨੂੰ ਨੀਲਮ ਨੂੰ ਅਦਾਲਤ ਵੱਲੋਂ ਦੋਸ਼ੀ ਠਹਿਰਾਏ ਜਾਣ ਉਪਰੰਤ 18 ਅਪ੍ਰੈਲ ਦੀ ਤਾਰੀਖ਼ ਸਜ਼ਾ ਸੁਣਾਉਣ ਲਈ ਨਿਸਚਿਤ ਕੀਤੀ ਗਈ ਸੀ ਅਤੇ ਅੱਜ ਅਦਾਲਤ ਨੇ ਦੋਸ਼ਣ ਨੂੰ ਫ਼ਾਂਸੀ ’ਤੇ ਲਟਕਾਉਣ ਦਾ ਹੁਕਮ ਦਿੱਤਾ ਹੈ।
ਜ਼ਿਕਰਯੋਗ ਹੈ ਕਿ ਪਰਿਵਾਰ ਦੀ ਗੁਆਂਢਣ ਅਤੇ ਖ਼ੁਦ ਦੋ ਬੱਚਿਆਂ ਦੀ ਮਾਂ, 35 ਸਾਲਾ ਨੀਲਮ ਨੇ ਬੜੀ ਬੇਰਹਿਮੀ ਨਾਲ ਢਾਈ ਸਾਲਾ ਬੱਚੀ ਦਾ ਕਤਲ ਕੀਤਾ ਸੀ। ਉਹ ਸਕੂਟਰ ’ਤੇ ਇਸ ਬੱਚੀ ਨੂੰ ਲੈ ਗਈ ਅਤੇ ਬੱਚੀ ਦੇ ਮੱਥੇ ਅਤੇ ਸਿਰ ’ਤੇ ਸੱਟ ਮਾਰਣ ਉਪਰੰਤ ਉਸਦੇ ਮੂੰਹ ਵਿੱਚ ਮਿੱਟੀ ਭਰ ਕੇ ਉਸਨੂੰ ਇੱਕ ਖੱਡਾ ਖ਼ੋਦ ਕੇ ਜ਼ਿਉਂਦੀ ਦਬਾਅ ਦਿੱਤਾ ਗਿਆ ਜਿਸ ਦੀ ਬਾਅਦ ਵਿੱਚ ਮੌਤ ਹੋ ਗਈ।
ਇਸ ਮਾਮਲੇ ਵਿੱਚ ਪੀੜਤ ਪਰਿਵਾਰ ਵੱਲੋਂ ਕੇਸ ਦੀ ਪੈਰਵਾਈ ਸੀਨੀਅਰ ਐਡਵੋਕੇਟ ਸ: ਪਰਉਪਕਾਰ ਸਿੰਘ ਘੁੰਮਣ ਨੇ ਕੀਤੀ।
ਯਾਦ ਰਹੇ ਕਿ ਇਹ ਘਟਨਾ 28 ਨਵੰਬਰ, 2021 ਨੂੰ ਵਾਪਰੀ ਸੀ ਅਤੇ ਉਕਤ ਗੁਆਂਢਣ ਨੀਲਮ ਬੱਚੀ ਨੂੰ ਸਕੂਟਰ ’ਤੇ ਸਲੇਮ ਟਾਬਰੀ ਇਲਾਕੇ ਵਿੱਚ ਲੈ ਗਈ ਸੀ ਜਿੱਥੇ ਉਸਨੇ ਇਕ ਖ਼ਾਲੀ ਪਲਾਟ ਵਿੱਚ ਇਸ ਘਿਨਾਉਣੀ ਘਟਨਾ ਨੂੰ ਅੰਜਾਮ ਦਿੱਤਾ ਸੀ। ਘਟਨਾ ਤੋਂ ਬਾਅਦ ਸੀ.ਸੀ.ਟੀ.ਵੀ. ਦੀ ਜਾਂਚ ਕਰਨ ਉਪਰੰਤ ਇਹ ਸਾਹਮਣੇ ਆ ਗਿਆ ਸੀ ਕਿ ਨੀਲਮ ਹੀ ਬੱਚੀ ਨੂੰ ਆਪਣੇ ਐਕਟਿਵਾ ਸਕੂਟਰ ’ਤੇ ਲੈ ਕੇ ਜਾਂਦੇ ਹੋਏ ਆਖ਼ਰੀ ਵਾਰ ਨਜ਼ਰ ਆਈ ਸੀ।
ਆਪਣੇ ਬਿਆਨ ਵਿੱਚ ਨੀਲਮ ਨੇ ਆਪਣੇ ਵੱਲੋਂ ਕੀਤੀ ਕਾਰਵਾਈ ਬਾਰੇ ਦੱਸਿਆ ਗਿਆ ਕਿ ਉਸਦਾ ਗੁਆਂਢੀ ਹਰਪ੍ਰੀਤ ਸਿੰਘ, ਜੋ ਪੁਲਿਸ ਵਿੱਚ ਕਾਂਸਟੇਬਲ ਸੀ, ਆਪਣੇ ਬੱਚਿਆਂ ਨੂੰ ਮਹਿੰਗੇ ਗਿਫ਼ਟਸ ਲੈ ਕੇ ਦਿੰਦਾ ਸੀ ਜਿਸ ਦੇ ਚੱਲਦਿਆਂ ਉਸਦੇ ਦੋਵੇਂ ਬੱਚੇ ਵੀ ਇਨ੍ਹਾਂ ਚੀਜ਼ਾਂ ਲਈ ਜ਼ਿਦ ਕਰਦੇ ਸਨ। ਉਸ ਮੁਤਾਬਿਕ ਕੇਵਲ ਇਸੇ ਦੇ ਚੱਲਦਿਆਂ ਉਸਨੇ ਇਹ ਕਾਰਾ ਕਰ ਦਿੱਤਾ ਸੀ।
ਅਜੇ ਇਹ ਵੇਖ਼ਣ ਵਾਲੀ ਗੱਲ ਹੈ ਕਿ ਕੀ ਨੀਲਮ ਜਾਂ ਉਸਦਾ ਪਰਿਵਾਰ ਇਸ ਸਜ਼ਾ ਦੇ ਖ਼ਿਲਾਫ਼ ਹਾਈਕੋਰਟ ਵਿੱਚ ਅਪੀਲ ਕਰਕੇ ਇਸ ਸਜ਼ਾ ’ਤੇ ਮੁੜ ਵਿਚਾਰ ਕਰਨ ਨੂੰ ਕਹੇਗਾ ਜਾਂ ਨਹੀਂ।
