ਯੈੱਸ ਪੰਜਾਬ
ਚੰਡੀਗੜ੍ਹ, ਮਈ 8, 2024
ਡਾਲਫਿਨ (ਪੀ.ਜੀ.) ਕਾਲਜ, ਚੰਡੀਗੜ੍ਹ ਨੂੰ ਹਾਲ ਹੀ ਵਿੱਚ ਦਿ ਲਲਿਤ ਚੰਡੀਗੜ੍ਹ ਵਿਖੇ ਆਯੋਜਿਤ 6ਵੇਂ ਐਜੂਕੇਸ਼ਨ ਲੀਡਰ ਕਨਕਲੇਵ ਅਵਾਰਡਸ (ਈ.ਏਲ.ਸੀ.ਏ.) ਵਿੱਚ ਵੱਕਾਰੀ “ਲੀਡਿੰਗ ਪੈਰਾਮੈਡੀਕਲ ਇੰਸਟੀਚਿਊਟ ਆਫ ਨਾਰਥ ਇੰਡੀਆ – 2024” ਪੁਰਸਕਾਰ ਨਾਲ ਸਨਮਾਨਿਤ ਕੀਤਾ ਗਿਆ । ਇਹ ਮਾਨਤਾ ਉੱਚ ਗੁਣਵੱਤਾ ਵਾਲੀ ਪੈਰਾ-ਮੈਡੀਕਲ ਸਿੱਖਿਆ ਪ੍ਰਦਾਨ ਕਰਨ ਵਿੱਚ ਕਾਲਜ ਦੀ ਉੱਤਮਤਾ ਨੂੰ ਉਜਾਗਰ ਕਰਦੀ ਹੈ।
ਆਬਜ਼ਰਵ ਨਾਓ ਐਜੂਕੇਸ਼ਨ ਅਤੇ ਏਸਰ ਦੁਆਰਾ ਆਯੋਜਿਤ, ਅਵਾਰਡ ਸਮਾਰੋਹ ਵਿੱਚ ਸਿੱਖਿਆ ਦੇ ਖੇਤਰ ਤੋਂ ਜੁਡੀ ਜਾਣੀ ਮਾਨੀ ਹਸਤੀਆਂ ਨੇ ਰਾਸ਼ਟਰੀ ਸਿੱਖਿਆ ਨੀਤੀ ਦੇ ਤਹਿਤ ਪਾਠਕ੍ਰਮ ਵਿੱਚ ਤਬਦੀਲੀਆਂ, ਸੰਸਥਾਵਾਂ ਉੱਤੇ ਵਿਸ਼ਵੀਕਰਨ ਦੇ ਪ੍ਰਭਾਵ, ਸਿੱਖਿਆ ਲਈ ਭਵਿੱਖ ਦੇ ਦ੍ਰਿਸ਼ਟੀਕੋਣ, ਡਿਜੀਟਲ ਪਰਿਵਰਤਨ, ਆਰਟੀਫਿਸ਼ੀਅਲ ਇੰਟੇਲੀਜੈਂਸ (ਏ ਆਈ) ਦੇ ਨਾਲ ਵਿਅਕਤੀਗਤ ਸਿੱਖਿਆ ਸਮੇਤ ਉੱਚ ਸਿੱਖਿਆ ਵਿੱਚ ਤਰੱਕੀ ਬਾਰੇ ਚਰਚਾ ਕੀਤੀ।
ਡਾਲਫਿਨ (ਪੀ.ਜੀ.) ਕਾਲਜ ਦੇ ਵਾਈਸ ਚੇਅਰਮੈਨ ਸ੍ਰੀ ਵਿਭਵ ਮਿੱਤਲ ਨੇ ਇਸ ਮੌਕੇ ‘ਤੇ ਆਬਜ਼ਰਵ ਨਾਓ ਦੇ ਸਹਿ-ਸੰਸਥਾਪਕ ਅਤੇ ਸੀਈਓ ਜੀਤ ਸ਼ਰਮਾ ਅਤੇ ਮੁੱਖ ਸੰਪਾਦਕ ਤਾਨੀਆ ਟਿਕੂ ਤੋਂ ਪੁਰਸਕਾਰ ਪ੍ਰਾਪਤ ਕੀਤਾ।
ਡਾਲਫਿਨ (ਪੀ.ਜੀ.) ਕਾਲਜ ਮਹਾਰਾਜਾ ਰਣਜੀਤ ਸਿੰਘ ਪੰਜਾਬ ਟੈਕਨੀਕਲ ਯੂਨੀਵਰਸਿਟੀ, ਬਠਿੰਡਾ ਤੋਂ ਮਾਨਤਾ ਪ੍ਰਾਪਤ ਹੈ ਅਤੇ ਅੰਡਰ-ਗ੍ਰੈਜੂਏਟ ਅਤੇ ਪੋਸਟ-ਗ੍ਰੈਜੂਏਟ ਪੈਰਾ-ਮੈਡੀਕਲ ਪ੍ਰੋਗਰਾਮਾਂ ਦੀ ਵਿਸ਼ਾਲ ਸ਼੍ਰੇਣੀ ਪੇਸ਼ ਕਰਦਾ ਹੈ। ਕਾਲਜ ਨੇ ਆਪਣੇ ਆਪ ਨੂੰ ਖੇਤਰ ਵਿੱਚ ਇੱਕ ਮੋਹਰੀ ਸੰਸਥਾ ਵਜੋਂ ਸਥਾਪਿਤ ਕੀਤਾ ਹੈ।
ਵਿਭਵ ਮਿੱਤਲ ਨੇ ਵੀ ਇਸ ਮੌਕੇ ‘ਤੇ “ਉੱਚ ਸਿੱਖਿਆ ਵਿੱਚ ਡਿਜੀਟਲ ਮੁਲਾਂਕਣ” ਵਿਸ਼ੇ ‘ਤੇ ਕੀਮਤੀ ਜਾਣਕਾਰੀ ਸਾਂਝੀ ਕਰਦੇ ਹੋਏ ਇੱਕ ਪੈਨਲਿਸਟ ਵਜੋਂ ਹਿੱਸਾ ਲਿਆ।
ਉਨ੍ਹਾਂ ਨੇ ਹੁਨਰ ਆਧਾਰਿਤ ਸਿੱਖਿਆ ਦੇ ਪਸਾਰ ਦੀ ਲੋੜ ਦੇ ਨਾਲ-ਨਾਲ ਉਦਯੋਗ ਅਤੇ ਵਿਦਿਅਕ ਸੰਸਥਾਵਾਂ ਵਿਚਕਾਰ ਸਹਿਯੋਗ ਦੀ ਮਹੱਤਤਾ ‘ਤੇ ਜ਼ੋਰ ਦਿੱਤਾ। ਉਨ੍ਹਾਂ ਜ਼ੋਰ ਦੇ ਕੇ ਕਿਹਾ ਕਿ ਇਹ ਸਾਂਝੇ ਉਪਰਾਲੇ ਨੌਜਵਾਨਾਂ ਅਤੇ ਦੇਸ਼ ਦੇ ਭਵਿੱਖ ਨੂੰ ਸੰਵਾਰਨ ਲਈ ਮਹੱਤਵਪੂਰਨ ਹੋਣਗੇ।