ਯੈੱਸ ਪੰਜਾਬ
ਜਲੰਧਰ, 15 ਸਤੰਬਰ, 2021 –
ਦੇਸ਼ ਭਗਤ ਯਾਦਗਾਰ ਕਮੇਟੀ ਦੇ ਪ੍ਰਧਾਨ ਅਜਮੇਰ ਸਿੰਘ, ਜਨਰਲ ਸਕੱਤਰ ਗੁਰਮੀਤ ਸਿੰਘ ਅਤੇ ਸਭਿਆਚਾਰਕ ਵਿੰਗ ਦੇ ਕਨਵੀਨਰ ਅਮੋਲਕ ਸਿੰਘ ਨੇ ਅੱਜ ਪ੍ਰੈਸ ਨਾਲ ਜਾਣਕਾਰੀ ਸਾਂਝੀ ਕਰਦਿਆਂ ਦੱਸਿਆ ਕਿ ਜਲ੍ਹਿਆਂਵਾਲਾ ਬਾਗ਼ ਦੇ ਮੂਲ ਸਰੂਪ ਦੀ ਬਹਾਲੀ ਦੀ ਮੰਗ ਲਈ ਦੇਸ਼ ਭਗਤ ਯਾਦਗਾਰ ਕਮੇਟੀ ਦਾ ਵਫ਼ਦ ਡਿਪਟੀ ਕਮਿਸ਼ਨਰ ਅੰਮ੍ਰਿਤਸਰ ਨੂੰ 20 ਸਤੰਬਰ ਨੂੰ ਮਿਲੇਗਾ।
ਉਹਨਾਂ ਦੱਸਿਆ ਕਿ ਵਫ਼ਦ ਉਸ ਦਿਨ ਜ਼ੋਰਦਾਰ ਮੰਗ ਕਰੇਗਾ ਕਿ ਸੁੰਦਰੀਕਰਨ ਅਤੇ ਨਵੀਨੀਕਰਨ ਦੇ ਨਾਂਅ ਹੇਠ ਇਤਿਹਾਸਕ ਵਿਰਾਸਤ ਨੂੰ ਸੈਰਗਾਹ ਬਣਾਉਣ ਦੀ ਨੀਤੀ ਤਹਿਤ ਕੀਤੀ ਛੇੜਛਾੜ ਬਦਲਕੇ ਉਸਦਾ ਮੂਲ ਸਰੂਪ ਬਹਾਲ ਕੀਤਾ ਜਾਏ। ਦਾਖਲਾ ਗੇਟ ’ਤੇ ਫਿੱਟ ਟਿਕਟ ਮਸ਼ੀਨਾਂ, ਪ੍ਰਵੇਸ਼ ਇਤਿਹਾਸਕ ਗਲੀ ਵਿੱਚ ਲਗਾਈਆਂ ਮੂਰਤੀਆਂ, ਕਮਲ ਦੇ ਫੁੱਲ ਤੁਰੰਤ ਹਟਾਏ ਜਾਣ। ਸ਼ਹੀਦੀ ਖੂਹ, ਅਮਰ ਜੋਤੀ, ਫਾਇਰਿੰਗ ਸਥਾਨ ਦੀ ਥੜ੍ਹੀ ਆਦਿ ਨੂੰ ਮੌਲਿਕ ਸਰੂਪ ਵਿੱਚ ਲਿਆਂਦਾ ਜਾਏ।
ਬਾਗ਼ ਦੇ ਮਿਊਜ਼ੀਅਮ ਵਿੱਚ ਲੱਗੇ ਗ਼ਦਰ ਦੇ ਝੰਡੇ ਦੇ ਪ੍ਰਮਾਣਿਕ ਰੰਗ ਯਕੀਨੀ ਬਣਾਏ ਜਾਣ, ਕੌਮੀ ਪ੍ਰਵਾਨਿਆਂ ਦੇ ਨਾਂਵਾਂ ਅੱਗੇ ‘ਸ਼ਹੀਦ’ ਲਿਖਿਆ ਜਾਏ, ਜਲ੍ਹਿਆਂਵਾਲਾ ਬਾਗ਼ ਅੰਦਰ ਦਾਖਲੇ ’ਤੇ ਰੋਕਾਂ ਲਾਉਣ ਲਈ ਵੰਨ-ਸੁਵੰਨੀਆਂ ਸ਼ਰਤਾਂ ਮੜ੍ਹਨਾ ਬੰਦ ਕੀਤਾ ਜਾਏ। ਮੁਲਕ ਦੇ ਨਾਮਵਰ ਇਤਿਹਾਸਕਾਰਾਂ ਅਤੇ ਦੇਸ਼ ਭਗਤ ਯਾਦਗਾਰ ਕਮੇਟੀ ਦੇ ਨੁੰਮਾਇੰਦੇ ਸ਼ਾਮਲ ਕਰਕੇ ਬਾਗ਼ ਦਾ ਮੂਲ ਇਤਿਹਾਸਕ ਸਰੂਪ ਬਹਾਲ ਕੀਤਾ ਜਾਏ।
ਜ਼ਿਕਰਯੋਗ ਹੈ ਕਿ ਜੇਕਰ ਕਮੇਟੀ ਦੇ ਬਾਰ-ਬਾਰ ਦਿੱਤੇ ਮੰਗ ਪੱਤਰਾਂ ਅਤੇ ਵਫ਼ਦ ਦੀਆਂ ਮੰਗਾਂ ’ਤੇ ਅਮਲ ਨਾ ਕੀਤਾ ਗਿਆ ਤਾਂ 26 ਸਤੰਬਰ ਨੂੰ ਦੇਸ਼ ਭਗਤ ਯਾਦਗਾਰ ਕਮੇਟੀ ਵੱਲੋਂ ਦੇਸ਼ ਭਗਤ ਯਾਦਗਾਰ ਹਾਲ ਜਲੰਧਰ ਅੰਦਰ ਪੰਜਾਬ ਦੀਆਂ ਸਮੂਹ ਜਨਤਕ ਜਮਹੂਰੀ ਜੱਥੇਬੰਦੀਆਂ ਦੀ ਬੁਲਾਈ ਮੀਟਿੰਗ ’ਚ ਫੈਸਲਾ ਲੈ ਕੇ, ਜਲ੍ਹਿਆਂਵਾਲਾ ਬਾਗ਼ ਅੰਮ੍ਰਿਤਸਰ ਸਾਹਮਣੇ ਵਿਸ਼ਾਲ ਵਿਖਾਵਾ ਕੀਤਾ ਜਾਏਗਾ। ਮੂਲ ਸਰੂਪ ਦੀ ਬਹਾਲੀ ਨਾ ਕਰਨ ਤੱਕ ਅਗਲੀਆਂ ਸਰਗਰਮੀਆਂ ਦੀ ਰੂਪਰੇਖਾ ਵੀ ਐਲਾਨ ਕੀਤੀ ਜਾਏਗੀ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ
