ਯੈੱਸ ਪੰਜਾਬ
ਸਿਰਸਾ, 31 ਜੁਲਾਈ, 2021:
ਸਿਰਸਾ ਦੇ ਪਿੰਡ ਦਾਦੂ ਹਰਿਆਣਾ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਬਾਬਾ ਬਲਜੀਤ ਸਿੰਘ ਦਾਦੂਵਾਲ ਨੂੰ ਮਿਲਣ ਜਾਣਾ ਚਾਹੁੰਦੇ ਭਾਜਪਾ ਨੇਤਾ ਅਤੇ ਕੌਮੀ ਐਸ.ਸੀ. ਕਮਿਸ਼ਨ ਦੇ ਚੇਅਰਮੈਨ ਸ੍ਰੀ ਵਿਜੇ ਸਾਂਪਲਾ ਦਾ ਅੱਜ ਕਿਸਾਨਾਂ ਨੇ ਜ਼ਬਰਦਸਤ ਵਿਰੋਧ ਕੀਤਾ ਅਤੇ ਪਿੰਡ ਦਾਦੂ ਨੂੰ ਜਾਂਦੇ ਸਾਰੇ ਰਸਤੇ ਜਾਮ ਕਰ ਦਿੱਤੇ ਜਿਸ ਕਾਰਨ ਸ੍ਰੀ ਸਾਂਪਲਾ ਅੱਜ ਕਾਫ਼ੀ ਸਮਾਂ ਇੰਤਜ਼ਾਰ ਕਰਨ ਦੇ ਬਾਵਜੂਦ ਵੀ ਪਿੰਡ ਦਾਦੂ ਵੱਲ ਨਹੀਂ ਜਾ ਸਕੇ ਅਤੇ ਉਨ੍ਹਾਂ ਦੀ ਮੁਲਾਕਾਤ ਨਹੀਂ ਹੋ ਸਕੀ।
ਸ੍ਰੀ ਸਾਂਪਲਾ ਦੀ ਪਿੰਡ ਦਾਦੂ ਦੀ ਫ਼ੇਰੀ ਬਾਰੇ ਕਿਸਾਨਾਂ ਨੂੰ ਪਤਾ ਲੱਗਣ ’ਤੇ ਕਿਸਾਨਾਂ ਨੇ ਸ੍ਰੀ ਸਾਂਪਲਾ ਦੀ ਆਮਦ ਤੋਂ ਪਹਿਲਾਂ ਹੀ ਰਾਹ ਮੱਲ ਲਏ ਅਤੇ ਕਿਸਾਨੀ ਅਤੇ ਕਾਲੇ ਝੰਡੇ ਲੈ ਕੇ ਤਿਆਰ ਬਰ ਤਿਆਰ ਕਿਸਾਨਾਂ ਨੇ ਨਾਅਰੇਬਾਜ਼ੀ ਸ਼ੁਰੂ ਕਰ ਦਿੱਤੀ ਜਿਸ ਦੇ ਚੱਲਦਿਆਂ ਪੁਲਿਸ ਵੱਖ ਵੱਖ ਥਾਂਵਾਂ ’ਤੇ ਮੌਕੇ ’ਤੇ ਪੁੱਜੀ।
ਇਸ ਦੌਰਾਨ ਪੁਲਿਸ ਵੱਲੋਂ ਕਾਫ਼ੀ ਜ਼ੋਰ ਲਗਾਉਣ ’ਤੇ ਵੀ ਕਿਸਾਨ ਨਹੀਂ ਮੰਨੇ ਅਤੇ ਉਨ੍ਹਾਂ ਨੇ ਸ੍ਰੀ ਸਾਂਪਲਾ ਨੂੰ ਲਾਂਘਾ ਦੇਣ ਤੋਂ ਇਨਕਾਰ ਕਰ ਦਿੱਤਾ ਜਿਸ ਮਗਰੋਂ ਕਾਫ਼ੀ ਘੰਟਿਆਂ ਬਾਅਦ ਸ੍ਰੀ ਸਾਂਪਲਾ ਨੂੰ ਬਾਬਾ ਦਾਦੂਵਾਲ ਨੂੂੰ ਮਿਲੇ ਬਿਨਾਂ ਹੀ ਵਾਪਿਸ ਜਾਣਾ ਪਿਆ।
ਆਪਣੀ ਵਾਪਸੀ ਤੋਂ ਪਹਿਲਾਂ ਸ੍ਰੀ ਸਾਂਪਲਾ ਨੇ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਉਹਨਾਂ ਦੀ ਇਹ ਫ਼ੇਰੀ ਕੋਈ ਸਿਆਸੀ ਫ਼ੇਰੀ ਨਹੀਂ ਸੀ ਅਤੇ ਉਹ ਬਾਬਾ ਦਾਦੂਵਾਲ ਦੇ ਗੁਰਦੁਆਰਾ ਸਾਹਿਬ ਵਿਖ਼ੇ ਜਾ ਰਹੇ ਸਨ। ਉਹਨਾਂ ਕਿਹਾ ਕਿ ਇਹ ਇਕ ਧਾਰਮਿਕ ਮੁਲਾਕਾਤ ਸੀ, ਉਹਨਾਂ ਨੇ ਤਾਂ ਗੁਰੂ ਘਰ ਮੱਥਾ ਟੇਕਣਾ ਸੀ।
ਉਹਨਾਂ ਕਿਹਾ ਕਿ ਕਿਸਾਨਾਂ ਨੇ ਐਸ.ਸੀ. ਕਮਿਸ਼ਨ ਦੇ ਚੇਅਰਮੈਨ ਦਾ ਰਾਹ ਰੋਕ ਕੇ ਸਰਕਾਰੀ ਕੰਮ ਵਿੱਚ ਅੜਿੱਕਾ ਡਾਹਿਆ ਹੈ ਜੋ ਕਿ ਇਕ ਅਪਰਾਧ ਹੈ। ਉਹਨਾਂ ਇਹ ਵੀ ਕਿਹਾ ਕਿ ਕਿਉਂਕਿ ਐਸ.ਸੀ. ਕਮਿਸ਼ਨ ਦਾ ਰਾਹ ਰੋਕਿਆ ਗਿਆ ਹੈ ਇਸ ਲਈ ਕਿਸਾਨਾਂ ’ਤੇ ਐਸ.ਸੀ. ਐਕਟ ਵੀ ਲੱਗੇਗਾ। ਉਹਨਾਂਦਾਅਵਾ ਕੀਤਾ ਕਿ ਇਸ ਸੰਬੰਧੀ ਕਿਸਾਨਾਂ ਦੇ ਖਿਲਾਫ਼ ਸਿਰਸਾ ਪੁਲਿਸ ਨੇ ਐਫ.ਆਈ.ਆਰ. ਦਰਜ ਕਰ ਲਈ ਹੈ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ
