ਯੈੱਸ ਪੰਜਾਬ
ਜਲੰਧਰ, 6 ਮਾਰਚ, 2021:
ਜਲੰਧਰ ਦੇ ਪ੍ਰੀਤ ਨਗਰ ਇਲਾਕੇ ਵਿੱਚ ਸਨਿਚਰਵਾਰ ਨੂੰ ਚਿੱਟੇ ਦਿਨੀਂ ਵਾਪਰੀ ਇਕ ਘਟਨਾ ਵਿੱਚ ਇਕ ਕਾਰੋਬਾਰੀ ਦੀ ਉਸਦੇ ਸ਼ੋਅਰੂਮ ਵਿੱਚ ਹੀ ਗੋਲੀਆਂ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ।
ਘਟਨਾ ਜਲੰਧਰ ਦੇ ਗਹਿਮਾ ਗਹਿਮ ਇਲਾਕੇ ਪ੍ਰੀਤ ਨਗਰ, ਸੋਢਲ ਰੋਡ ਵਿਖ਼ੇ ਸਨਿਚਰਵਾਰ ਦੁਪਹਿਰ ਲਗਪਗ ਪੌਣੇ ਦੋ ਵਜੇ ਵਾਪਰੀ ਜਿੱਥੇ ਪੀ.ਪੀ.ਆਰ. ਮਾਰਕੀਟ ਪੀ.ਵੀ.ਸੀ. ਕਾਰੋਬਾਰੀ ਦੇ ਸ਼ੋਅਰੂਮ ਵਿੱਚ ਵੜ ਕੇ ਹਮਲਾਵਰਾਂ ਨੇ ਉਸਤੇ ਕਈ ਫ਼ਾਇਰ ਕੀਤੇ ਅਤੇ ਫ਼ਰਾਰ ਹੋਣ ਵਿੱਚ ਸਫ਼ਲ ਹੋ ਗਏ।
ਗੁਰਮੀਤ ਸਿੰਘ ਟਿੰਕੂ ਨਾਂਅ ਦੇ ਇਸ ਵਪਾਰੀ ਨੂੰ ਤੁਰੰਤ ਇਕ ਨਿੱਜੀ ਹਸਪਤਾਲ ਵਿਖ਼ੇ ਲਿਜਾਇਆ ਗਿਆ ਜਿੱਥੇ ਉਸਦੀ ਮੌਤ ਹੋ ਗਈ। ਘਟਨਾ ਜੋ ਕਿਸੇ ਪੁਰਾਣੀ ਰੰਜਿਸ਼ ਦਾ ਨਤੀਜਾ ਦੱਸੀ ਜਾ ਰਹੀ ਹੈ ਸੀ.ਸੀ.ਟੀ.ਵੀ.ਕੈਮਰੇ ਵਿੱਚ ਕੈਦ ਹੋ ਗਈ ਦੱਸੀ ਜਾਂਦੀ ਹੈ।
ਪਤਾ ਲੱਗਾ ਹੈ ਕਿ 5-6 ਨਕਾਬਪੋਸ਼ ਹਮਲਾਵਰ ਅੰਦਰ ਆਏ ਜਦਕਿ ਇਕ ਦੁਕਾਨ ਦੇ ਬਾਹਰ ਕਾਰ ਵਿੱਚ ਬੈਠਾ ਰਿਹਾ। ਉਨ੍ਹਾਂ ਨੇ 7 ਗੋਲੀਆਂ ਚਲਾਈਆਂ ਜਿਸ ਵਿੱਚੋਂ ਟਿੰਕੂ ਨੂੰ ਤਿੰਨ ਗੋਲੀਆਂ ਲੱਗੀਆਂ। ਗੋਲੀਆਂ ਚਲਾਏ ਜਾਣ ’ਤੇ ਉਹ ਦੁਕਾਨ ਦੇ ਉੱਪਰ ਜਾਣ ਲਈ ਭੱਜਿਆ ਪਰ ਗੋਲੀ ਲੱਗ ਜਾਣ ਕਾਰਨ ਗੰਭੀਰ ਜ਼ਖ਼ਮੀ ਹੋ ਗਿਆ। ਇਸੇ ਦੌਰਾਨ ਦੁਕਾਨ ’ਤੇ ਕੰਮ ਕਰਦੀ ਰਿਤੂ ਨਾਂਅ ਦੀ ਇਕ ਲੜਕੀ ਵੀ ਜ਼ਖ਼ਮੀ ਹੋ ਗਈ।
ਪਤਾ ਲੱਗਾ ਹੈ ਕਿ ਇਹ ਵਿਵਾਦ ਉਸ ਵੇਲੇ ਭਖ਼ ਗਿਆ ਸੀ ਜਦ ਕਿਸੇ ਆਯੋਜਨ ਲਈ ਬਣਨ ਵਾਲੀਆਂ ਕਮੇਟੀਆਂ ਵਿੱਚ ਦੋ ਧੜੇ ਆਹਮੋ ਸਾਹਮਣੇ ਹੋ ਗਏ। ਇਸੇ ਨੂੰ ਲੈ ਕੇ ਇਸ ਤੋਂ ਪਹਿਲਾਂਵੀ ਦੂਜੀ ਧਿਰ ਵੱਲੋਂ ਟਿੰਕੂ ਨੂੰ ਘੇਰਿਆ ਗਿਆ ਸੀ। ਇਸ ਮਗਰੋਂ ਟਿੰਕੂ ’ਤੇ ਦੋਸ਼ ਲੱਗਾ ਸੀ ਕਿ ਉਸਨੇ ਵਿਰੋਧੀ ਧਿਰ ਦੇ ਘਰ ’ਤੇ ਪਥਰਾਅ ਕੀਤਾ ਸੀ। ਮਾਮਲਾ ਪੁਲਿਸ ਕੋਲ ਵੀ ਪੁੱਜਾ ਸੀ। ਇਸ ਮਾਮਲੇ ਵਿੱਚ ਕਿਸੇ ਰਾਜਸੀ ਆਗੂ ਦੀ ਦਖ਼ਲਅੰਦਾਜ਼ੀ ਵੀ ਦੱਸੀ ਜਾ ਰਹੀ ਹੈ।