ਯੈੱਸ ਪੰਜਾਬ
ਜਲੰਧਰ, ਮਾਰਚ 1, 2021:
ਅੱਜ ਪਿੰਡ ਗੜ੍ਹੀ ਵਿੱਚ ਪਿੰਡ ਦੇ ਨੌਜਵਾਨਾਂ ਵੱਲੋਂ ਕਿਸਾਨਾਂ ਦੇ ਮੋਰਚੇ ਲਈ ਟਰਾਲੀ ਅਤੇ ਜੱਥਾ ਭੇਜਣ ਸਮੇ ਬਹੁਜਨ ਸਮਾਜ ਪਾਰਟੀ ਦੇ ਸੂਬਾ ਪ੍ਰਧਾਨ ਸਰਦਾਰ ਜਸਵੀਰ ਸਿੰਘ ਗੜ੍ਹੀ ਨੇ ਕਿਹਾ ਕਿ ਜੋ ਸਿੰਘੁ ਬਾਰਡਰ ਤੇ ਘੱਟੋ ਘੱਟ 3 ਮਹੀਨੇ ਤੋਂ ਕਿਸਾਨਾਂ ਦਾ ਮੋਰਚਾ ਲੱਗਿਆ ਹੋਇਆ ਹੈ, ਉਸ ਮੋਰਚੇ ਨੂੰ ਕੁਚਲਣ ਲਈ ਭਾਜਪਾ ਅਤੇ ਕਾਂਗਰਸ ਸਰਕਾਰ ਤਰ੍ਹਾਂ-ਤਰ੍ਹਾਂ ਦੀਆ ਕੋਝੀਆਂ ਚਾਲਾਂ ਚੱਲ ਰਹੀ ਹੈ।
ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਕੋਝੀ ਚਾਲ ਦੀ ਸ਼ੁਰੂਆਤ ਆਪਣੇ ਜੱਦੀ ਪਿੰਡ ਮਹਿਰਾਜ ਤੋਂ ਕੀਤੀ, ਜਿਸ ਵਿਚ ਮੁੱਖ ਮੰਤਰੀ ਨੇ ਕਿਸਾਨਾਂ ਦੇ ਬਰਾਬਰ ਦੀ ਲੀਡਰਸ਼ਿਪ ਪੈਦਾ ਕਰਨ ਦੀ ਬਹੁਤ ਵੱਡੀ ਸ਼ਾਜਿਸ ਕੀਤੀ ਹੈ ਤਾਂਕਿ ਕਿਸਾਨ ਅੰਦੋਲਨ ਦੀਆਂ ਧਿਰਾਂ ਆਪਣੇ ਸਹੀ ਮਕਸਦ ਵਿੱਚ ਕਾਮਯਾਬ ਨਾ ਹੋ ਸਕਣ। ਪਿੰਡ ਗੜ੍ਹੀ ਦੇ ਨੌਜਵਾਨਾਂ ਦੇ ਜੱਥੇ ਨੂੰ ਦਿੱਲੀ ਭੇਜਦੇ ਸਮੇ ਸੂਬਾ ਪ੍ਰਧਾਨ ਗੜ੍ਹੀ ਨੇ ਕਿਹਾ ਕਿ ਅਸੀਂ ਕਿਸਾਨਾਂ ਦੇ ਮੋਰਚੇ ਦਾ ਪੂਰਨ ਤੋਰ ਤੇ ਸਮਰਥਨ ਕਰਦੇ ਹਾਂ ਤੇ ਬਸਪਾ ਹਰ ਤਰਾਂ ਨਾਲ ਕਿਸਾਨਾਂ ਦਾ ਸਾਥ ਦੇਵੇਗੀ।
ਓਹਨਾਂ ਕਿਹਾ ਕਿ ਪਿਛਲੇ ਦਿਨੀਂ ਪੰਜਾਬ ਸਰਕਾਰ ਨੇ ਇੱਕ ਹੋਰ ਨਵਾਂ ਡਰਾਮਾ ਸ਼ੁਰੂ ਕੀਤਾ ਕਿ 1 ਮਾਰਚ ਤੋਂ ਦੇਸ਼ ‘ਚ ਕੋਰੋਨਾ ਦੇ ਵਧਦੇ ਕਹਿਰ ਕਰਕੇ 100 ਤੋਂ ਜਿਆਦਾ ਵਿਅਕਤੀ ਇਨਡੋਰ ਤੇ 200 ਤੋਂ ਜਿਆਦਾ ਵਿਅਕਤੀ ਆਊਟਡੋਰ ਵਿੱਚ ਸ਼ਾਮਿਲ ਨਹੀਂ ਹੋ ਸਕਦੇ। ਜਦਕਿ ਪੂਰੇ ਪੱਛਮੀ ਬੰਗਾਲ, ਅਸਮ, ਤਾਮਿਲਨਾਡੂ ਆਦਿ ਵਿੱਖੇ ਵਿਧਾਨ ਸਭਾ ਚੋਣਾਂ ਹੋ ਰਹੀਆਂ ਹਨ, ਭਾਜਪਾ ਤੇ ਕਾਂਗਰਸ ਵਾਲੇ ਵੱਡੀਆਂ ਵੱਡੀਆਂ ਰੈਲੀਆਂ ਕਰ ਰਹੀ ਹੈ, ਉਦੋਂ ਕੋਰੋਨਾ ਇਹਨਾਂ ਭਾਜਪਾ ਕਾਂਗਰਸ ਵਾਲਿਆਂ ਨੂੰ ਕੁਝ ਨਹੀਂ ਕਹਿੰਦਾ।
ਪੰਜਾਬ ਦੀ ਕਾਂਗਰਸ ਸਰਕਾਰ ਆਪਣੇ ਵਿਰੋਧੀਆਂ ਦੀ ਆਵਾਜ਼ ਨੂੰ ਬੰਦ ਕਰਨ ਲਈ ਕੋਰੋਨਾ ਦੀਆ ਹਦਾਇਤਾਂ ਦੀ ਆੜ ਵਿਚ ਵਿਰੋਧੀ ਧਿਰਾਂ ਦੇ ਇਕੱਠਾਂ ਉਪਰ ਸੇਂਸਰਸ਼ਿਪ ਲਗ਼ਾ ਰਹੀ ਹੈ, ਕਾਂਗਰਸ ਨੂੰ ਡਰ ਹੈ ਕਿ ਪੰਜਾਬ ਵਿਚ ਕਿਤੇ ਵਿਰੋਧੀ ਦਲ ਇਕੱਠੇ ਹੋ ਕੇ ਕਾਂਗਰਸ ਨੂੰ ਘੇਰ ਨਾ ਲੈਣ, ਘਰ-ਘਰ ਨੌਕਰੀ ਦੀ ਕੋਈ ਗੱਲ ਨਾ ਕਰ ਲਵੇ, ਪੰਜਾਬ ਦੇ ਕਿਸਾਨ ਕਰਜ਼ਾ ਕੁਰਕੀ ਬਾਰੇ ਸਵਾਲ ਨਾ ਖੜੇ ਕਰ ਲੈਣ।
ਪੰਜਾਬ ਸਰਕਾਰ ਨੇ ਦਲਿਤਾਂ ਦਾ ਪੋਸਟ ਮੈਟ੍ਰਿਕ ਸਕਾਲਰਸ਼ਿਪ, ਸ਼ਗਨ ਸਕੀਮ, ਕਰਜ਼ਾ ਮੁਆਫੀ ਤੇ ਚਾਰ ਚਾਰ ਮਰਲਿਆ ਦੀ ਗੱਲ ਕੀਤੀ ਪਰ ਸਰਕਾਰ ਨੇ ਹੁਣ ਤੱਕ ਇੱਕ ਵੀ ਮਸਲਾ ਹੱਲ ਨਹੀਂ ਦਿੱਤਾ। ਹੁਣ ਪੰਜਾਬ ਦਾ ਹਾਥੀ ਕਾਂਗਰਸ ਦੀ ਸਿਰੀ ਨੱਪਣ ਲਈ ਪੂਰੇ ਪੰਜਾਬ ਵਿੱਚ ਰੈਲੀਆਂ ਕਰ ਰਿਹਾ ਹੈ ਤੇ 2022 ਵਿੱਚ ਕਾਂਗਰਸ ਦੀ ਧੌਣ ਫੜਕੇ ਰਹੇਗੀ। ਬਸਪਾ ਨੂੰ ਰੋਕਣ ਲਈ ਕਾਂਗਰਸ ਤਰਾਂ ਤਰਾਂ ਦੇ ਹੱਥਕੰਡੇ ਆਪਣਾ ਰਹੀ ਹੈ।
ਬਹੁਜਨ ਸਮਾਜ ਪਾਰਟੀ ਗੁਰੂਆਂ ਦੇ ਬਰਾਬਰਤਾ ਦੇ ਸੰਦੇਸ਼ਾ ਤੇ ਚੱਲਣ ਵਾਲੀ ਪਾਰਟੀ ਹੈ। ਅਸੀਂ ਕਿਸੇ ਨਾਲ ਨਾਜਾਇਜ਼ ਨਹੀਂ ਹੋਣ ਦਿਆਂਗੇ ਚਾਹੇ ਕੋਈ ਕਿਸਾਨ ਹੈ ਜਾਂ ਦਲਿਤ, ਸਾਡੇ ਲਈ ਸਭ ਇੱਕੋ ਸਮਾਨ ਨੇ। ਆਖਰੀ ਸ਼ਬਦਾਂ ਵਿੱਚ ਸਰਦਾਰ ਜਸਵੀਰ ਸਿੰਘ ਗੜ੍ਹੀ ਨੇ ਕਿਹਾ ਕਿ 2022 ਵਿਚ ਬਸਪਾ ਕਾਂਗਰਸ ਨਾਲ ਟੱਕਰ ਲਵੇਗੀ, 2022 ਵਿਚ ਕਾਂਗਰਸ ਨੂੰ ਕਿਸੇ ਵੀ ਹਾਲ ਵਿਚ ਜਿੱਤਣ ਨਹੀਂ ਦੇਵੇਗੀ। ਇਸ ਮੌਕੇ ਤੇ ਪੰਚ ਮੱਖਣ ਲਾਲ, ਪੰਚ ਸ਼ੇਖਰ ਸ਼ਰਮਾ, ਅਮਰਜੀਤ ਸਿੰਘ, ਮੋਹਨ ਲਾਲ, ਹੁਸਨ ਲਾਲ ਕਾਲਾ ਤੇ ਹੋਰ ਨੌਜਵਾਨ ਸਾਥੀ ਸ਼ਾਮਿਲ ਸਨ।
