ਯੈੱਸ ਪੰਜਾਬ
ਜਲੰਧਰ, 10 ਜੁਲਾਈ, 2020:
ਪਹਿਲਾਂ ਹੀ ਪੰਜਾਬ ਦੇ ‘ਟੌਪ ਕੋਰੋਨਾ ਹੌਟਸਪੌਟਸ’ ਵਿਚ ਸ਼ੁਮਾਰ ਜਲੰਧਰ ਵਿਚ ਸ਼ੁੱਕਰਵਾਰ ਨੂੰ ਇਕ ਹੋਰ ਕੋਰੋਨਾ ‘ਬਲਾਸਟ’ ਹੋਇਆ ਹੈ।
ਅੱਜ ਜਲੰਧਰ ਵਿਚ 50 ਨਵੇਂ ਮਾਮਲੇ ਸਾਹਮਣੇ ਆਏ ਹਨ।
ਇਸ ਦੇ ਨਾਲ ਹੀ ਜਲੰਧਰ ਵਿਚ ਹੁਣ ਤਕ ਸਾਹਮਣੇ ਆਏ ਪਾਜ਼ਿਟਿਵ ਮਾਮਲਿਆਂ ਦੀ ਗਿਣਤੀ ਵਧਕੇ 1100 ਤੋਂ ਪਾਰ ਹੋ ਗਈ ਹੈ। ਜ਼ਿਲ੍ਹੇ ਵਿਚ ਹੁਣ ਤਕ ਕੋਰੋਨਾ ਕਾਰਨ 22 ਮੌਤਾਂ ਹੋ ਚੁੱਕੀਆਂ ਹਨ।
ਉਂਜ ਜ਼ਿਲ੍ਹੇ ਅੰਦਰ 676 ਵਿਅਕਤੀ ਪਾਜ਼ਿਟਿਵ ਟੈਸਟ ਕੀਤੇ ਜਾਣ ਮਗਰੋਂ ਰਾਜ਼ੀ ਵੀ ਹੋ ਚੁੱਕੇ ਹਨ। ਇਸ ਵੇਲੇ ਜ਼ਿਲ੍ਹੇ ਵਿਚ ਐਕਟਿਵ ਕੇਸਾਂ ਦੀ ਗਿਣਤੀ 400 ਹੋ ਚੁੱਕੀ ਹੈ।
ਯਾਦ ਰਹੇ ਕਿ ਬੀਤੇ ਕਲ੍ਹ ਜਲੰਧਰ ਦਿਹਾਤੀ ਦੇ ਐਸ.ਐਸ.ਪੀ. ਸ: ਨਵਜੋਤ ਸਿੰਘ ਮਾਹਲ ਅਤੇ ਐਸ.ਡੀ.ਐਮ. ਸ਼ਾਹਕੋਟ ਡਾ: ਸੰਜੀਵ ਸ਼ਰਮਾ ਦੇ ਨਾਲ ਨਾਲ 38 ਨਵੇਂ ਪਾਜ਼ਿਟਿਵ ਕੇਸ ਆਏ ਸਨ।
ਵੀਰਵਾਰ ਨੂੰ ਰਾਜ ਸਰਕਾਰ ਵੱਲੋਂ ਜਾਰੀ ਮੈਡੀਕਲ ਬੁਲੇਟਿਨ ਅਨੁਸਾਰ ਰਾਜ ਵਿਚ ਵੀਰਵਾਰ ਨੂੰ 234 ਨਵੇਂ ਕੇਸ ਸਾਹਮਣੇ ਆਏ ਸਨ ਜਿਸ ਨਾਲ ਪਾਜ਼ਿਟਿਵ ਕੇਸਾਂ ਦਾ ਅੰਕੜਾ ਵਧ ਕੇ 7140 ਹੋ ਗਿਆ ਸੀ। ਅੱਜ ਇਹ ਅੰਕੜਾ ਹੁਣ ਤਕ ਹੀ 7200 ਪਾਰ ਕਰ ਚੁੱਕਾ ਹੈ।
ਰਾਜ ਵਿਚ ਵੀਰਵਾਰ ਤਕ ਹੀ ਕੋਰੋਨਾ ਦੀ ਕਰੋਪੀ ਕਾਰਨ ਮਾਰੇ ਗਏ ਵਿਅਕਤੀਆਂ ਦੀ ਗਿਣਤੀ 183 ਤਕ ਹੋ ਚੁੱਕੀ ਸੀ।
