ਯੈੱਸ ਪੰਜਾਬ
ਊਨਾ ਸਾਹਿਬ, 22 ਫ਼ਰਵਰੀ, 2020:
ਗੁਰਮਤਿ ਪ੍ਰਚਾਰਕ ਸੰਤ ਸਭਾ ਦੇ ਪ੍ਰਧਾਨ ਬਾਬਾ ਸਰਬਜੋਤ ਸਿੰਘ ਬੇਦੀ ਨੇ ਪੰਜਾਬ ਪੁਲਿਸ ਦੇ ਮੁਖੀ ਦਿਨਕਰ ਗੁਪਤਾ ਦੇ ਉਸ ਬਿਆਨ ਦੀ ਸਖਤ ਸ਼ਬਦਾਂ ਵਿਚ ਨਿਖੇਧੀ ਕੀਤੀ ਹੈ, ਜਿਸ ਵਿਚ ਉਸਨੇ ਸਾਰੇ ਸਿਖਾਂ ਨੂੰ ਦਹਿਸ਼ਤਗਰਦ ਗਰਦਾਨ ਦਿਤਾ ਹੈ।
ਬਾਬਾ ਬੇਦੀ ਨੇ ਕਿਹਾ ਹੈ ਕਿ ਦਿਨਕਰ ਗੁਪਤਾ ਦੇ ਬਿਆਨ ਵਿਚੋਂ ਸਿਖ ਵਿਰੋਧੀ ਨਫਰਤ ਸਪਸ਼ਟ ਰੂਪ ਵਿਚ ਝਲਕਦੀ ਹੈ। ਬਾਬਾ ਬੇਦੀ ਨੇ ਕਿਹਾ ਹੈ ਕਿ ਅਸਲੀ ਗੱਲ ਇਹ ਹੈ ਕਿ ਯੂਨਾਈਟਡ ਨੇਸ਼ਨਜ ਦੇ ਸਕਤਰ ਜਨਰਲ ਦਾ ਕੁਝ ਦਿਨ ਪਹਿਲਾਂ ਸਿਖ ਪੰਥ ਦੇ ਸਭ ਤੋਂ ਪਾਵਨ ਅਸਥਾਨ ਸ੍ਰੀ ਕਰਤਾਰਪੁਰ ਸਾਹਿਬ ਦੇ ਦਰਸ਼ਨ ਕਰਨ ਆਉਣਾ ਅਤੇ ਇਸ ਲਾਂਘੇ ਦੇ ਖੋਲ੍ਹਣ ਲਈ ਪਾਕਿਸਤਾਨ ਸਰਕਾਰ ਦੀ ਤਾਰੀਫ ਕਰਨੀ ਗੁਪਤੇ ਵਰਗੇ ਫਿਰਕਾਪ੍ਰਸਤ ਮਨਾਂ ਨੂੰ ਚੰਗੀ ਨਹੀਂ ਲਗੀ।
ਇਸ ਲਈ ਦਿਨਕਰ ਗੁਪਤਾ ਦਾ ਇਹ ਬਿਆਨ ਕਿਸੇ ਵਡੀ ਸਾਜਿਸ਼ ਵਸ ਦਿਤਾ ਗਿਆ ਜਾਪਦਾ ਹੈ। ਦਰਅਸਲ ਇਹ ਹੇਠਲੇ ਪੁਲਿਸ ਅਫਸਰਾਂ ਨੂੰ ਸਿਖ ਨੌਜਵਾਨਾਂ ਨੂੰ ਝੂਠੇ ਕੇਸਾਂ ਵਿਚ ਫਸਾਉਣ ਲਈ ਦਿਤੀ ਗਈ ਹਰੀ ਝੰਡੀ ਹੈ। ਅਤੇ ਜੇ ਦਿਨਕਰ ਗੁਪਤਾ ਦੀ ਇਹ ਗੱਲ ਸਚੀ ਹੈ ਤਾਂ ਫਿਰ ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਨੇ ਇਸ ਲਾਂਘੇ ਨੂੰ ਖੋਲ੍ਹਣ ਦਾ ਸਵਾਗਤ ਕਿਉਂ ਕੀਤਾ ਸੀ।
ਬਾਬਾ ਬੇਦੀ ਨੇ ਕਿਹਾ ਹੈ ਕਿ ਜੇ ਪਾਕਿਸਤਾਨ ਦੇ ਕਹਿਣ ਉਤੇ 6 ਘੰਟੇ ਵਿਚ ਸਿਖ ਅਤਵਾਦੀ ਬਣ ਸਕਦੇ ਹਨ ਤਾਂ ਫਿਰ ਹੁਣ ਤਕ ਸਾਰੇ ਸਿਖ ਅਤਵਾਦੀ ਬਣ ਜਾਣੇ ਚਾਹੀਦੇ ਸਨ।
ਇਸ ਨੂੰ ਵੀ ਪੜ੍ਹੋ:
ਕਰਤਾਰਪੁਰ ਲਾਂਘੇ ਬਾਰੇ ਡੀ.ਜੀ.ਪੀ. ਦਾ ਬਿਆਨ ਸਿੱਖ ਵਿਰੋਧੀ ਸੋਚ ਦਾ ਪ੍ਰਗਟਾਵਾ: ਲੌਂਗੋਵਾਲ
ਬਾਬਾ ਬੇਦੀ ਨੇ ਕਿਹਾ ਹੈ ਕਿ ਅੰਦਰਲੀ ਗੱਲ ਇਹ ਹੈ ਕਿ ਗੁਰੂ ਗ੍ਰੰਥ ਸਾਹਿਬ ਦੀ ਬੇਅਦਬੀ ਵਾਲੇ ਮਸਲੇ ਵਿਚ ਪੰਜਾਬ ਸਰਕਾਰ ਦੇ ਸੀ ਬੀ ਆਈ ਦੀ ਪੜਤਾਲ ਨੂੰ ਰੱਦ ਕਰਨ ਦੇ ਫੈਸਲੇ ਦੀ ਸੁਪਰੀਮ ਕੋਰਟ ਵਲੋਂ ਹੋਈ ਪੁਸ਼ਟੀ ਨੇ ਇਕ ਵਾਰ ਫਿਰ ਸੁਮੇਧ ਸੈਣੀ ਦੇ ਜੇਲ੍ਹ ਵਿਚ ਜਾਣ ਦੀਆਂ ਸੰਭਾਵਨਾਵਾਂ ਬਣਾ ਦਿਤੀਆ ਹਨ ਅਤੇ ਕਾਂਗਰਸ ਪਾਰਟੀ ਦੀ ਇਕ ਧਿਰ ਵੀ ਬੇਅਦਬੀ ਕਾਂਡ ਦੇ ਦੋਸ਼ੀਆਂ ਨੂੰ ਸਜਾਵਾਂ ਦੇਣ ਦੀ ਮੰਗ ਕਰ ਰਹੀ ਹੈ, ਇਸ ਲਈ ਇਸ ਮੰਗ ਨੂੰ ਤਾਰਪੀਡੋ ਕਰਨ ਲਈ ਵੀ ਇਹ ਨਸਲੀ ਬਿਆਨਬਾਜੀ ਕੀਤੀ ਜਾ ਰਹੀ ਜਾਪਦੀ ਹੈ।
ਬਾਬਾ ਬੇਦੀ ਨੇ ਕਿਹਾ ਹੈ ਕਿ ਅਜਿਹੇ ਨਸਲਪ੍ਰਸਤ ਤੇ ਫਿਰਕਾਪ੍ਰਸਤ ਪੁਲਿਸ ਅਫਸਰ ਕੋਲੋ ਸਿਖਾਂ ਨੂੰ ਇਨਸਾਫ ਦੀ ਕੀ ਆਸ ਹੋ ਸਕਦੀ ਹੈ।
ਬਾਬਾ ਬੇਦੀ ਨੇ ਪੁਛਿਆ ਹੈ ਕਿ ਗੁਪਤਾ ਦੀ ਬਿਆਨਬਾਜੀ ਉਤਰਪ੍ਰਦੇਸ਼ ਦੇ ਮੁਖ ਮੰਤਰੀ ਤੋਂ ਵਖਰੀ ਕਿਵੇਂ ਹੈ।
ਬਾਬਾ ਬੇਦੀ ਨੇ ਕੈਪਟਨ ਅਮਰਿੰਦਰ ਸਿੰਘ ਕੋਲੋ ਮੰਗ ਕੀਤੀ ਹੈ ਕਿ ਬੜੀ ਮੁਸ਼ਕਿਲ ਨਾਲ ਸਿਖਾਂ ਦੇ ਪੰਜਾਬ ਪੁਲਿਸ ਉਤੇ ਬਣੇ ਭਰੋਸੇ ਨੂੰ ਬਰਕਰਾਰ ਰਖਣ ਲਈ ਦਿਨਕਰ ਗੁਪਤਾ ਨੂੰ ਫੌਰੀ ਇਸ ਅਹੁਦੇ ਤੋਂ ਬਦਲਿਆ ਜਾਵੇ।
ਬਾਬਾ ਬੇਦੀ ਨੇ ਕਿਹਾ ਹੈ ਕਿ ਦਿਨਕਰ ਗੁਪਤਾ ਦੇ ਇਸ ਸ਼ਰਾਰਤਪੂਰਨ ਬਿਆਨ ਨੂੰ ਅਦਾਲਤ ਵਿਚ ਵੀ ਚੁਣੌਤੀ ਦਿਤੀ ਜਾਵੇਗੀ। ਬਾਬਾ ਬੇਦੀ ਨੇ ਪੰਜਾਬ ਸਰਕਾਰ ਨੂੰ ਅਜਿਹੇ ਫਿਰਕਾਪ੍ਰਸਤ ਅਫਸਰਾਂ ਤੋਂ ਸੁਚੇਤ ਰਹਿਣ ਦੀ ਅਪੀਲ ਵੀ ਕੀਤੀ ਹੈ।
