ਯੈੱਸ ਪੰਜਾਬ
ਬਿਨਾਂ ਸ਼ੱਕ ਕਨੇਡਾ ਦੇ ਵਿੱਚ ਪੰਜਾਬੀਆਂ ਨੇ ਇਕ ਵੱਖਰੇ ਪੰਜਾਬ ਦੀ ਬੁਨਿਆਦ ਪੈਦਾ ਕਰ ਦਿੱਤੀ ਹੈ, ਕਿਉਂਕਿ ਕੈਨੇਡਾ ਦੇ ਵਿਚ ਹਰ ਜਗ੍ਹਾ, ਹਰ ਖੇਤਰ ਵਿੱਚ ਪੰਜਾਬੀਆਂ ਦਾ ਬੋਲਬਾਲਾ ਹੈ । ਕੈਨੇਡਾ ਦੀ ਆਰਥਿਕ ਵਿਵਸਥਾ ਨੂੰ ਓੁੱਚਾ ਚੁੱਕਣ ਦੇ ਵਿਚ ਜਿੱਥੇ ਪੰਜਾਬੀਆਂ ਨੇ ਅਹਿਮ ਭੂਮਿਕਾ ਨਿਭਾਈ ਹੈ, ਉੱਥੇ ਖੇਡਾਂ ਦੇ ਖੇਤਰ ਵਿੱਚ ਵੀ ਪੰਜਾਬੀ ਇੱਥੋਂ ਜਾ ਕੇ ਉੱਥੋਂ ਦੇ ਓਲੰਪੀਅਨ ਪੱਧਰ ਦੇ ਖਿਡਾਰੀ ਬਣ ਗਏ ਹਨ ।
ਓਲੰਪਿਕ ਖੇਡਾਂ ਕਾਮਨਵੈਲਥ ਖੇਡਾਂ ਆਦਿ ਵਿਚ ਉਨ੍ਹਾਂ ਨੇ ਵੱਡੀਆਂ ਵੱਡੀਆਂ ਮੱਲਾਂ ਮਾਰੀਆਂ ਹਨ । ਪੰਜਾਬੀ ਜਿਸ ਮੁਲਕ ਵਿੱਚ ਵੀ ਗਏ ਉਨ੍ਹਾਂ ਦਾ ਹਾਕੀ ਅਤੇ ਕਬੱਡੀ ਤੋਂ ਬਿਨਾਂ ਗੁਜ਼ਾਰਾ ਨਹੀਂ ਹੋਇਆ। ਹਾਕੀ ਪੰਜਾਬੀਆਂ ਦੇ ਖ਼ੂਨ ਵਿੱਚ ਵਸੀ ਹੋਈ ਖੇਡ ਹੈ। ਪੰਜਾਬੀ ਭਾਵੇਂ ਪਾਕਿਸਤਾਨੀ ਪੰਜਾਬ ਦਾ ਹੋਵੇ ,ਭਾਵੇਂ ਭਾਰਤੀ ਪੰਜਾਬ ਦਾ ਹੋਵੇ,ਜਦੋਂ ਹੀ ਉਹ ਹਾਕੀ ਖੇਡਣ ਲੱਗਦਾ ਹੈ ਤਾਂ ਹਾਕੀ ਉਸ ਦੇ ਸਰੀਰ ਦਾ ਹੀ ਇੱਕ ਹਿੱਸਾ ਬਣ ਜਾਂਦੀ ਹੈ । ਕੈਨੇਡਾ ਦੀ ਜਦੋਂ ਕੋਈ ਵੀ ਅੰਤਰਰਾਸ਼ਟਰੀ ਪੱਧਰ ਦੇ ਮੁਕਾਬਲੇ ਵਾਸਤੇ ਕੈਨੇਡਾ ਦੀ ਕੌਮੀ ਹਾਕੀ ਟੀਮ ਦਾ ਐਲਾਨ ਹੁੰਦਾ ਹੈ। ਉਸ ਵਿੱਚ 4 ਤੋਂ 7 ਤੱਕ ਪੰਜਾਬੀ ਖਿਡਾਰੀਆਂ ਦੀ ਗਿਣਤੀ ਲਗਪਗ ਹੁੰਦੀ ਹੀ ਹੈ ।
ਭਾਵੇਂ ਕੈਨੇਡਾ ਵਿੱਚ ਆਈਸ ਹਾਕੀ ਦਾ ਵਧੇਰੇ ਬੋਲਬਾਲਾ ਹੈ ,ਪਰ ਫੀਲਡ ਹਾਕੀ ਵੀ ਕਿਸੇ ਪੱਧਰ ਤੇ ਘੱਟ ਨਹੀਂ ਹੈ। ਭਾਵੇਂ ਫੀਲਡ ਹਾਕੀ ਬਰੈਂਪਟਨ , ਸਰੀ ਆਦਿ ਸ਼ਹਿਰਾਂ ਵਿੱਚ ਜ਼ਿਆਦਾਤਰ ਖੇਡੀ ਜਾਂਦੀ ਹੈ। ਪਰ ਹੁਣ ਦੂਸਰੇ ਸ਼ਹਿਰਾਂ ਵਿੱਚ ਵੀ ਫੀਲਡ ਹਾਕੀ ਨੇ ਆਪਣਾ ਰੰਗ ਦਿਖਾਉਣਾ ਸ਼ੁਰੂ ਕਰ ਦਿੱਤਾ ਹੈ ।
ਕੈਨੇਡਾ ਦੇ ਸ਼ਹਿਰ ਕੈਲਗਰੀ ਜਿੱਥੇ ਪੰਜਾਬੀਆਂ ਦੀ ਵੱਡੀ ਵਸੋਂ ਹੈ ਉੱਥੇ ਫੀਲਡ ਹਾਕੀ ਦਾ 10ਵਾਂ ਕੈਲਗਰੀ ਹਾਕਸ ਗੋਲਡ ਕੱਪ ਹਾਕੀ ਟੂਰਨਾਮੈਂਟ 7 ਤੋਂ 9 ਅਕਤੂਬਰ ਤੱਕ ਜੈਨਸਿਸ ਸੈਂਟਰ ਕੈਲਗਰੀ ਵਿੱਚ ਕਰਵਾਇਆ ਜਾ ਰਿਹਾ ਹੈ । ਇਸ ਵਿੱਚ ਹਾਕੀ ਪ੍ਰੀਮੀਅਮ ਵਰਗ ,ਹਾਕੀ ਸੋਸ਼ਲ ਵਰਗ, ਰੱਸਾਕਸ਼ੀ ਮਰਦ ਅਤੇ ਇਸਤਰੀਆਂ ਦੇ ਮੁਕਾਬਲੇ ,ਬਾਬਿਆਂ ਦੀ ਤਾਸ਼ ਸੀਪ ਖੇਡ , ਦਸਤਾਰ ਮੁਕਾਬਲੇ ਤੋਂ ਇਲਾਵਾ ਗਿੱਧਾ ਭੰਗੜਾ ਟੂਰਨਾਮੈਂਟ ਦੌਰਾਨ ਮੁੱਖ ਖਿੱਚ ਦਾ ਕੇਂਦਰ ਹੋਣਗੇ ।
ਹਾਕੀ ਵਿੱਚ ਭਾਗ ਲੈ ਰਹੀਆਂ ਚੋਟੀ ਦੀਆਂ 12 ਟੀਮਾਂ ਵਿਚ ਕੈਨੇਡਾ ,ਅਮਰੀਕਾ ,ਅਰਜਨਟੀਨਾ ਆਦਿ ਮੁਲਕਾਂ ਤੋਂ ਦੁਨੀਆਂ ਭਰ ਦੇ ਨਾਮੀ ਖਿਡਾਰੀ ਆਪਣੇ ਹਾਕੀ ਹੁਨਰ ਦਾ ਵਿਖਾਵਾ ਕਰਨਗੇ । ਇਸ ਤੋਂ ਇਲਾਵਾ ਸੋਸ਼ਲ ਵਰਗ ਵਿਚ ਜਿੰਨੇ ਵੀ ਸਥਾਨਕ ਖਿਡਾਰੀ ਹਨ, ਉਹ ਖੇਡਣਗੇ । ਰੱਸਾਕਸ਼ੀ ਦੇ ਮੁਕਾਬਲੇ ਵਿੱਚ 8 ਟੀਮਾਂ ਇਕ ਵੱਖਰੇ ਅੰਦਾਜ਼ ਵਿੱਚ ਨੌਜਵਾਨਾਂ ਨੂੰ ਖੇਡਾਂ ਪ੍ਰਤੀ ਪ੍ਰੇਰਿਤ ਕਰਨਗੇ। ” ਦੇਖ ਕੇ ਨਾ ਖੇਡ ਕਾਕਾ ” ਵੇਖੀਂ ਕਿਤੇ ਕੰਮ ਨਾ ਖਰਾਬ ਹੋਵੇ, ਬਾਬਿਆਂ ਦੀ ਢਾਣੀ ਦੀ ” ਤਾਸ਼ਸੀਪ ” ਵਿੱਚ 60 ਦੇ ਕਰੀਬ ਟੀਮਾਂ ਆਪਣਾ ਮਨੋਰੰਜਨ ਕਰਨਗੀਆਂ ।
ਬੱਚਿਆਂ ਨੂੰ ਸਿੱਖੀ ਪ੍ਰਤੀ ਉਤਸ਼ਾਹਤ ਕਰਨ ਦਾ ਉਪਰਾਲਾ “ਦਸਤਾਰ ਮੁਕਾਬਲਾ” ਵੀ ਆਪਣੇ ਆਪ ਵਿਚ ਇਕ ਵਿਲੱਖਣ ਪਹਿਚਾਣ ਛੱਡੇਗਾ। ਪੰਜਾਬੀ ਹੋਏ ਹੋਣ ਇਕੱਠੇ, ਉਥੇ ਨਾ ਹੋਵੇ ਗਿੱਧਾ ਭੰਗੜਾ। ਇਹ ਹੋ ਹੀ ਨੀ ਸਕਦਾ, ਫਿਰ ਕੈਲਗਰੀ ਵਿੱਚ ਵੀ ਗਿੱਧਾ ਭੰਗੜਾ ਢੋਲ ਦੀ ਤਾਲ ਤੇ ਆਪਣਾ ਰੰਗ ਵਿਖਾਏਗਾ। ਤਿੰਨੇ ਦਿਨ ਗੁਰੂ ਦਾ ਲੰਗਰ ਅਤੁੱਟ ਚੱਲੇਗਾ ਅਤੇ ਦਰਸ਼ਕਾਂ ਦੇ ਲਈ ਤੋਹਫਿਆਂ ਵਾਲੇ ਡਰਾਅ ਕੱਢੇ ਜਾਣਗੇ ।
ਕੈਲਗਰੀ ਹਾਕਸ ਕੱਪ ਕਰਵਾਉਣ ਵਿਚ ਮੋਗੇ ਅਤੇ ਲੁਧਿਆਣੇ ਵਾਲਿਆਂ ਦੀ ਅਹਿਮ ਭੂਮਿਕਾ ਹੈ । ਜ਼ਿਲ੍ਹਾ ਮੋਗਾ ਵਿੱਚ ਕੁਰਬਾਨੀਆਂ ਵਾਲਾ ,ਆਜ਼ਾਦੀ ਘੁਲਾਟੀਆਂ ਵਾਲਾ ਪਿੰਡ ਢੁੱਡੀਕੇ ਉੱਥੋਂ ਦੀ ਹਾਕੀ ਦੀ ਰਾਜਧਾਨੀ ਹੈ । ਪਿੰਡ ਢੁੱਡੀਕੇ ਦਾ ਮਹਿੰਦਰ ਸਿੰਘ ਫੌਜ ਦੀ ਹਾਕੀ ਵਿੱਚ ਧਰੂ ਤਾਰੇ ਵਾਂਗ ਚਮਕਿਆ। ਖੇਡ ਲਿਖਤਾਂ ਦਾ ਓਲੰਪੀਅਨ ਪ੍ਰਿੰਸੀਪਲ ਸਰਵਣ ਸਿੰਘ ਢੁੱਡੀਕੇ ਉੱਥੋਂ ਦੀ ਇੱਕ ਵਿਲੱਖਣ ਪਹਿਚਾਣ ਹੈ ਪਿੰਡ ਢੁਡੀਕੇ ਦਾ ਜੰਮਪਲ ਸਾਬਕਾ ਕੌਮੀ ਹਾਕੀ ਖਿਡਾਰੀ ਕਰਮਜੀਤ ਸਿੰਘ ਕਰਮਾ ਜਿਸ ਨੇ ਸਧਾਰ ਕਾਲਜ ਵਿੱਚ ਵਧੀਆ ਦਰਜੇ ਦੀ ਹਾਕੀ ਖੇਡੀ ਹੈ ਉਹ ਕੈਲਗਰੀ ਹਾਕਸ ਗੋਲਡ ਕੱਪ ਦਾ ਮੁੱਖ ਪ੍ਰਬੰਧਕ ਹੈ।
ਉਸ ਨੇ ਆਪਣੀ ਪੂਰੀ ਟੀਮ ਗੁਰਲਾਲ ਸਿੰਘ ਮਾਣੂੰਕੇ ,ਬਾਰਦੇਕੇ, ਛੱਜਾਵਾਲ ਅਤੇ ਹੋਰ ਇਲਾਕੇ ਦੇ ਹਾਕੀ ਖਿਡਾਰੀਆਂ ਅਤੇ ਖੇਡ ਪ੍ਰੇਮੀਆਂ ਨਾਲ ਮਿਲ ਕੇ ਪਿਛਲੇ 10, 15 ਸਾਲ ਤੋਂ ਕੈਲਗਰੀ ਦੇ ਵਿੱਚ ਫੀਲਡ ਹਾਕੀ ਨੂੰ ਪ੍ਰਫੁੱਲਤ ਕਰਨ ਲਈ ਬੂਟਾ ਲਾਇਆ ਸੀ। ਇਹ ਬੂਟਾ ਹੁਣ ਭਰ ਜਵਾਨੀ ਵਿੱਚ ਹੋ ਕੇ ਫਲ ਦੇਣ ਯੋਗਾ ਹੋ ਗਿਆ ਹੈ। ਖੇਡਾਂ ਖਾਸ ਕਰਕੇ ਹਾਕੀ ਦੇ ਪ੍ਰਫੁੱਲਤ ਹੋਏ ਇਸ ਬੂਟੇ ਦਾ ਆਨੰਦ ਕੈਲਗਰੀ ਵਿੱਚ ਵੱਸਦਾ ਪੂਰਾ ਪੰਜਾਬੀ ਭਾਈਚਾਰਾ ਮਾਣ ਰਿਹਾ ਹੈ ।
ਯੂਨਾਈਟਿਡ ਹਾਕਸ ਹਾਕੀ ਕਲੱਬ ਕੈਲਗਰੀ ਵਾਲਿਆਂ ਨੇ ਆਪਣਾ ਖੇਡਾਂ ਦਾ ਪੋਸਟਰ ਵੀ ਜਾਰੀ ਕਰ ਦਿੱਤਾ ਹੈ ।ਵੱਡੇ ਵੱਡੇ ਸਪਾਂਸਰਾਂ ਨੇ ਵੀ ਉਨ੍ਹਾਂ ਲਈ ਮਾਇਆ ਦਾ ਗੱਫਾ ਖੋਲ੍ਹ ਦਿੱਤਾ ਹੈ । ਕੈਲਗਰੀ ਵਿੱਚ ਵੱਸਦਾ ਪੂਰਾ ਪੰਜਾਬੀ ਭਾਈਚਾਰਾ ਤਨ ਮਨ ਧਨ ਨਾਲ ਟੂਰਨਾਮੈਂਟ ਦੀ ਕਾਮਯਾਬੀ ਲਈ ਜੁਟਿਆ ਹੋਇਆ ਹੈ । ਮੇਰਾ ਵੀ ਇਰਾਦਾ ਜਿਹਾ ਬਣਦਾ ਹੈ ਕਿ ਮੈਂ ਵੀ ਕੈਲਗਰੀ ਹਾਕੀ ਕੱਪ ਦਾ ਨਜ਼ਾਰਾ ਵੇਖ ਹੀ ਆਵਾਂ, ਜੇ ਵਾਹਿਗੁਰੂ ਨੇ ਚਾਹਿਆ ਤਾਂ ਅਕਤੂਬਰ ਮਹੀਨੇ ਕੈਲਗਰੀ ਹੋਵਾਂਗੇ । ਨਹੀਂ ਫੇਰ ਇੰਡੀਆ ਵਿੱਚੋ ਤਾਂ ਕੋਈ ਮਾਈ ਦਾ ਲਾਲ ਸਾਨੂੰ ਕੱਢ ਹੀ ਨਹੀਂ ਸਕਦਾ ।
ਵਾਹਿਗੁਰੂ ਭਲੀ ਕਰੇ ਕੈਲਗਰੀ ਹਾਕਸ ਹਾਕੀ ਕੱਪ ” ਦਿਨ ਦੁੱਗਣੀ ਰਾਤ ਚੌਗੁਣੀ” ਤਰੱਕੀ ਕਰੇ । ਇਹ ਟੂਰਨਾਮੈਂਟ ਹਾਕੀ ਦੇ ਇਤਿਹਾਸ ਦਾ ਇੱਕ ਪੰਨਾ ਬਣੇ ਅਤੇ ਸਾਡੀਆਂ ਆਉਣ ਵਾਲੀਆਂ ਪੀੜ੍ਹੀਆਂ ਲਈ ਇਕ ਪ੍ਰੇਰਨਾ ਸਰੋਤ ਹੋਵੇ । ਸਾਰੇ ਪ੍ਰਬੰਧਕਾਂ ਨੂੰ ਪ੍ਰਮਾਤਮਾ ਸੁਮੱਤ ਬਖਸ਼ੇ । ਮੇਰੀ ਤਾਂ ਓੁਸ ਦਾਤੇ ਅੱਗੇ ਇਹੋ ਦੁਆ ਹੈ । ਗੁੱਡਲੱਕ ਕੈਲਗਰੀ ਵਿਚ ਖੇਡਾਂ ਦੇ ਜ਼ਰੀਏ ਪੰਜਾਬੀ ਭਾਈਚਾਰੇ ਨੂੰ ਇਕੱਠੇ ਕਰਨ ਵਾਲਿਓ ,ਰੱਬ ਰਾਖਾ !
ਜਗਰੂਪ ਸਿੰਘ ਜਰਖੜ
ਖੇਡ ਲੇਖਕ
ਫੋਨ ਨੰਬਰ +91-9814300722
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ
