ਯੈੱਸ ਪੰਜਾਬ
ਜਲੰਧਰ, 24 ਮਈ, 2022 –
ਸਹੀਦ ਭਗਤ ਸਿੰਘ ਨੌਜਵਾਨ ਸਭਾ (ਐਸ.ਬੀ.ਵਾਈ.ਐਫ.) ਪੰਜਾਬ ਨੇ ਗ਼ਦਰ ਲਹਿਰ ਦੇ ਮਹਾਨ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਦਾ ਜਨਮ ਦਿਹਾੜਾ ਦੇਸ ਭਗਤ ਯਾਦਗਾਰ ਜਲੰਧਰ ਦੇ ਬਾਬਾ ਜਵਾਲਾ ਸਿੰਘ ਠੱਠੀਆਂ ਆਡੀਟੋਰੀਅਮ ਵਿਖੇ ਨੌਜਵਾਨਾਂ ਦੀ ਪ੍ਰਭਾਵਸ਼ਾਲੀ ਸੂਬਾਈ ਕਨਵੈਨਸ਼ਨ ਕਰਕੇ ਮਨਾਇਆ।
ਸਭਾ ਦੇ ਸਥਾਪਨਾ ਦਿਵਸ ਨੂੰ ਸਮਰਪਿਤ ਉਕਤ ਕਨਵੈਨਸਨ ਦਾ ਉਦਘਾਟਨ ਕਰਦਿਆਂ ਲਾਇਲਪੁਰ ਖਾਲਸਾ ਕਾਲਜ ਫਾਰ ਵੂਮੈਨ ਜਲੰਧਰ ਦੀ ਪਿ੍ਰੰਸੀਪਲ ਡਾਕਟਰ ਨਵਜੋਤ ਕੌਰ ਨੇ ਨੌਜਵਾਨ ਵਰਗ ਨੂੰ ਦਰਪੇਸ਼ ਆਰਥਿਕ-ਸਮਾਜਿਕ ਸਮੱਸਿਆਵਾਂ ਅਤੇ ਸਰਕਾਰਾਂ ਦੀ ਦੋਖੀ ਭੂਮਿਕਾ ਬਾਰੇ ਵਿਸਥਾਰਪੂਰਵਕ ਚਾਨਣਾ ਪਾਇਆ। ਉਨ੍ਹਾਂ ਕਿਹਾ ਕਿ ਸੁਤੰਤਰਤਾ ਸੰਗਰਾਮ ਦੇ ਮਹਾਨ ਸ਼ਹੀਦਾਂ ਅਤੇ ਗਦਰੀ ਸੂਰਬੀਰਾਂ ਦੀਆਂ ਕੁਰਬਾਨੀਆਂ ਅਤੇ ਯਾਦਾਂ ਨੂੰ ਨੌਜਵਾਨਾਂ ਦੇ ਚੇਤਿਆਂ ’ਚੋਂ ਮਿਟਾਉਣ ਦੇ ਹੁਕਮਰਾਨਾਂ ਵੱਲੋਂ ਸੁਚੇਤ ਯਤਨ ਕੀਤੇ ਜਾ ਰਹੇ ਹਨ।
ਸ਼ਹੀਦ-ਇ-ਆਜਮ ਭਗਤ ਸਿੰਘ ਜਿਹੇ ਲਾਸਾਨੀ ਕ੍ਰਾਂਤੀਕਾਰੀਆਂ, ਨਾਰਾਇਣ ਗੁਰੂ ਜਿਹੇ ਰੈਡੀਕਲ ਸਮਾਜ ਸੁਧਾਰਕਾਂ
ਅਤੇ ਫੈਜ਼ ਅਹਿਮਦ ਫ਼ੈਜ ਜਿਹੇ ਪ੍ਰਗਤੀਵਾਦੀ ਲੇਖਕਾਂ ਨੂੰ ਵਿੱਦਿਅਕ ਸਿਲੇਬਸ ’ਚੋਂ ਮਨਫੀ ਕਰਨਾ ਇਸੇ ਸਾਜ਼ਿਸ਼ ਦੀਆਂ ਪ੍ਰਤੱਖ ਮਿਸਾਲਾਂ ਹਨ।
ਕਨਵੈਨਸ਼ਨ ਦੀ ਪ੍ਰਧਾਨਗੀ ਸੂਬਾਈ ਪ੍ਰਧਾਨ ਮਨਜਿੰਦਰ ਸਿੰਘ ਢੇਸੀ, ਕੁਲਵੰਤ ਸਿੰਘ ਮੱਲੂ ਨੰਗਲ, ਹਰਜਿੰਦਰ ਕੌਰ ਗੋਲੀ, ਮੱਖਣ ਸੰਗਰਾਮੀ, ਹਰਨੇਕ ਸਿੰਘ ਗੁੱਜਰਵਾਲ, ਰਵਿੰਦਰ ਸਿੰਘ ਲੋਹਗੜ੍ਹ ਨੇ ਕੀਤੀ। ਮੰਚ ਸੰਚਾਲਕ ਦੇ ਫਰਜ ਗਗਨਦੀਪ ਸਰਦੂਲਗੜ੍ਹ ਨੇ ਬਾਖੂਬੀ ਨਿਭਾਏ।
ਸੂਬੇ ਭਰ ’ਚੋਂ ਉਤਸ਼ਾਹ ਪੂਰਬਕ ਪੁੱਜੇ ਨੌਜਵਾਨਾਂ ਨੂੰ ਸੰਬੋਧਨ ਕਰਦਿਆਂ ਸਭਾ ਦੇ ਜਨਰਲ ਸਕੱਤਰ ਧਰਮਿੰਦਰ ਸਿੰਘ ਮੁਕੇਰੀਆਂ ਨੇ ਕਿਹਾ ਕਿ ਕੇਂਦਰੀ ਅਤੇ ਸੂਬਾਈ ਸਰਕਾਰਾਂ ਵੱਲੋਂ ਅੰਨ੍ਹੇਵਾਹ ਲਾਗੂ ਕੀਤੀਆਂ ਜਾ ਰਹੀਆਂ ਨਿੱਜੀਕਰਨ ਦੀਆਂ ਨੀਤੀਆਂ ਸਦਕਾ ਅਥਾਹ ਬੇਰੁਜਗਾਰੀ-ਅਰਧ ਬੇਰੁਜ਼ਗਾਰੀ ਪੈਦਾ ਹੋਈ ਹੈ ਜਿਸ ਚੋਂ ਉਪਜੇ ਰੋਹ ਅਤੇ ਨਿਰਾਸ਼ਾ ਦੇ
ਨਤੀਜੇ ਵਜੋਂ ਸਮਾਜ ’ਚ ਤੇਜ਼ੀ ਨਾਲ ਬਦਅਮਨੀ ਫੈਲ ਰਹੀ ਹੈ।
ਉਨ੍ਹਾਂ ਕਿਹਾ ਕਿ ਕੇਂਦਰ ਦੀ ਮੋਦੀ ਸਰਕਾਰ, ਬੇਰੁਜ਼ਗਾਰ ਅਤੇ ਅਰਧ ਬੇਰੁਜ਼ਗਾਰ ਨੌਜਵਾਨਾਂ ਨੂੰ ਯੋਗ ਤਨਖਾਹਾਂ ਸਹਿਤ ਪੱਕਾ ਰੁਜ਼ਗਾਰ ਦੇਣ ਦੀ ਥਾਂ, ਹਿੰਦੂਤਵੀ, ਫਿਰਕੂ-ਫਾਸ਼ੀ ਸੰਘ ਪਰਿਵਾਰ ਦੇ ਆਦੇਸ਼ਾਂ ਅਨੁਸਾਰ ਇਨ੍ਹਾਂ ਦਾ ਇਸਤੇਮਾਲ ਭਾਈਚਾਰਕ ਸਾਂਝ ਨੂੰ ਖੇਰੂੰ-ਖੇਰੂੰ ਕਰਨ ਲਈ ਕਰ ਰਹੀ ਹੈ।
ਧਰਮਿੰਦਰ ਸਿੰਘ ਨੇ ਕਿਹਾ ਪੰਜਾਬ ਦੇ ਬਹੁਗਿਣਤੀ ਨੌਜਵਾਨ ਬੇਰੁਜ਼ਗਾਰ ਹਨ ਜਿਸ ਦੇ ਦੁਰ ਪ੍ਰਭਾਵਾਂ ਕਰਕੇ ਘਰੇਲੂ ਤੇ ਸਮਾਜਿਕ ਹਿੰਸਾ, ਨਸ਼ਾ ਤਸਕਰੀ ਸਮੇਤ ਹਰ ਕਿਸਮ ਦੇ ਅਪਰਾਧ ਅਤੇ ਖੁਦਕੁਸ਼ੀਆਂ ਆਦਿ ਨਾਂਹ ਪੱਖੀ ਵਰਤਾਰੇ ਵਧਦੇ ਜਾ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਪੰਜਾਬ ਦੀ ਮੌਜੂਦਾ ਸਰਕਾਰ ਪ੍ਰਾਂਤ ਵਾਸੀਆਂ ਦੀਆਂ ਮੁਸ਼ਕਿਲਾਂ, ਖਾਸ ਕਰਕੇ ਵਿਆਪਕ ਬੇਰੁਜ਼ਗਾਰੀ ਦੇ ਖਾਤਮੇ ਸੰਬੰਧੀ ਪਿਛਲੀਆਂ ਸਰਕਾਰਾਂ ਦੀਆਂ ਤਬਾਹਕੁੰਨ ਨੀਤੀਆਂ ਅਤੇ ਲੋਕ ਦੋਖੀ ਪਹੁੰਚ ਨਾਲੋਂ ਸਪਸ਼ਟ ਨਿਖੇੜਾ ਕਰਦੀ ਕਿਧਰੇ ਨਹੀਂ ਦਿਸਦੀ।
ਉਨ੍ਹਾਂ ਨੌਜਵਾਨਾਂ ਨੂੰ ਸੱਦਾ ਦਿੱਤਾ ਕਿ ਹਰ ਬਾਲਗ ਨੌਜਵਾਨ ਨੂੰ ਢੁਕਵੀਆਂ ਉਜ਼ਰਤਾਂ ਸਹਿਤ ਪੱਕਾ ਰੁਜ਼ਗਾਰ ਦੇਣ ਅਤੇ ਰੁਜ਼ਗਾਰ ਮਿਲਣ ਤੱਕ ਗੁਜ਼ਾਰੇ ਯੋਗ ਬੇਰੁਜ਼ਗਾਰੀ ਭੱਤਾ ਦਿੱਤੇ ਜਾਣ, ਸਭਨਾਂ ਨੂੰ ਮਾਤ ਭਾਸ਼ਾ ਵਿੱਚ ਇੱਕਸਾਰ ਤੇ ਮਿਆਰੀ ਸਿੱਖਿਆ ਸਰਕਾਰ ਵੱਲੋਂ ਮੁਫਤ ਦਿੱਤੇ ਜਾਣ, ਨਸ਼ਾ ਤਸਕਰੀ ਸਮੇਤ ਹਰ ਕਿਸਮ ਦੇ ਅਪਰਾਧਾਂ ਨੂੰ ਨੱਥ ਪਾਏ ਜਾਣ, ਸਾਰੇ ਵਿਭਾਗਾਂ ’ਚ ਖਾਲੀ ਪਈਆਂ ਪੋਸਟਾਂ ਪੱਕੇ ਤੌਰ ’ਤੇ ਭਰਨ, ਠੇਕਾ ਭਰਤੀ ਤੇ ਆਊਟ ਸੋਰਸਿੰਗ ਬੰਦ ਕਰਨ
ਅਤੇ ਪੁਰਾਣੀ ਪੈਨਸ਼ਨ ਸਕੀਮ ਬਹਾਲ ਕਰਨ ਆਦਿ ਮੰਗਾਂ ਦੀ ਪ੍ਰਾਪਤੀ ਦੇ ਸੰਘਰਸ਼ ਵਿੱਢਣ।
ਉਨ੍ਹਾਂ ਸੱਦਾ ਦਿੱਤਾ ਕਿ ਉਕਤ ਮੰਗਾਂ ਦੀ ਪ੍ਰਾਪਤੀ ਲਈ ਪਿੰਡਾਂ/ਸ਼ਹਿਰਾਂ ਅੰਦਰ ਨੌਜਵਾਨਾਂ ਨੂੰ ਲਾਮਬੰਦ ਕਰਕੇ 15 ਤੋਂ 31 ਜੁਲਾਈ ਤੱਕ ਸਕੂਟਰ/ਮੋਟਰ ਸਾਇਕਲ ਮਾਰਚ ਤੇ ਰੈਲੀਆਂ/ਇਕੱਠ ਕਰਕੇ ਪੰਜਾਬ ਦੇ ਵਿਧਾਇਕਾਂ ਨੂੰ ਮੰਗ ਪੱਤਰ ਦਿੱਤੇ ਜਾਣਗੇ। ਇਸ ਮੌਕੇ ਐਲਾਨ ਕੀਤਾ ਗਿਆ ਕਿ ਸਭਾ ਵੱਲੋਂ ਨੌਜਵਾਨਾਂ ਨੂੰ ਆਜ਼ਾਦੀ ਘੁਲਾਟੀਆਂ ਅਤੇ ਅਤੀਤ ਦੇ
ਲੋਕ ਹਿਤੂ ਸੰਗਰਾਮਾਂ ਦੇ ਮਹਾਨ ਪ੍ਰੇਰਣਾਦਾਇਕ ਵਿਰਸੇ ਨਾਲ ਅਤੇ ਖੇਡਾਂ ਤੇ ਸਭਿਆਚਾਰਕ ਸਰਗਰਮੀਆਂ ਨਾਲ ਜੋੜਣ, ਹਰ ਰੰਗ ਦੀਆਂ ਫਿਰਕੂ ਅਤੇ ਵੱਖਵਾਦੀ ਤਾਕਤਾਂ ਦੇ ਕੋਝੇ ਮਨਸੂਬਿਆਂ ਤੋਂ ਲੋਕਾਈ ਨੂੰ ਸੁਚੇਤ ਕਰਨ ਅਤੇ ਚੌਗਿਰਦੇ ਦੀ ਰਾਖੀ ਬਾਬਤ ਚੇਤਨਾ ਵਧਾਉਣ ਆਦਿ ਕਾਰਜਾਂ ਵਿੱਚ ਲਾਮਿਸਾਲ ਤੇਜੀ ਲਿਆਂਦੀ ਜਾਵੇਗੀ। ਜਤਿੰਦਰ ਕੁਮਾਰ ਫਰੀਦਕੋਟ, ਸ਼ਮਸ਼ੇਰ ਸਿੰਘ ਬਟਾਲਾ, ਹਰਮੀਤ ਸਿੰਘ ਦਾਊਦ, ਸੁਲੱਖਣ ਸਿੰਘ ਤੁੜ, ਦੀਪਕ ਠਾਕੁਰ, ਦਵਿੰਦਰ ਸਿੰਘ ਕੁਲਾਰ, ਮਨਪ੍ਰੀਤ ਜੋਨਸ ਨੇ ਵੀ ਵਿਚਾਰ ਰੱਖੇ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ