ਯੈੱਸ ਪੰਜਾਬ
ਜਲੰਧਰ, 21 ਅਕਤੂਬਰ, 2021:
‘ਪੇਂਡੂ ਤੇ ਖੇਤ ਮਜ਼ਦੂਰ ਜੱਥੇਬੰਦੀਆਂ ਦੇ ਸਾਂਝੇ ਮੋਰਚੇ’ ਵੱਲੋਂ ਦਿਹਾਤੀ ਮਜ਼ਦੂਰ ਸਭਾ ਪੰਜਾਬ ਅਤੇ ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ ਦੇ ਇੱਕ ਸਾਂਝੇ ਵਫ਼ਦ ਨੇ ਅੱਜ ਜਲੰਧਰ ਦੇ ਏਡੀਸੀ ਵਿਕਾਸ ਅਤੇ ਹੋਰਨਾਂ ਅਧਿਕਾਰੀਆਂ ਨਾਲ ਰਿਹਾਇਸ਼ੀ ਪਲਾਟਾਂ ਸਬੰਧੀ ਪਹਿਲਾਂ ਹੀ ਤਹਿਸ਼ੁਦਾ ਮੀਟਿੰਗ ਕੀਤੀ ,ਜਿਸਦੀ ਜਥੇਬੰਦੀਆਂ ਤਰਫੋਂ ਅਗਵਾਈ ਸਾਥੀ ਦਰਸ਼ਨ ਨਾਹਰ, ਹਰਮੇਸ਼ ਮਾਲੜੀ, ਬਲਦੇਵ ਸਿੰਘ ਨੂਰਪੁਰੀ, ਸਤਨਾਮ ਸਿੰਘ ਉੱਗੀ, ਨਿਰਮਲ ਸਿੰਘ ਮਲਸੀਆਂ, ਸੁਖਜਿੰਦਰ ਸਿੰਘ ਲਾਲੀ, ਨਿਰਮਲ ਸਿੰਘ ਆਧੀ ਸੁਰਿੰਦਰ ਟੋਨੀ ਅਤੇ ਹਰਪਾਲ ਸਿੰਘ ਬਿੱਟੂ ਨੇ ਕੀਤੀ।
ਆਗੂਆਂ ਨੇ ਲੋੜਵੰਦਾਂ ਨੂੰ ਰਿਹਾਇਸ਼ੀ ਪਲਾਟ ਦਿੱਤੇ ਜਾਣ ਸਮੇਂ ਕੀਤੀਆਂ ਜਾ ਰਹੀਆਂ ਬੇਨਿਯਮੀਆਂ ਅਤੇ ਪੱਖਪਾਤ ਤੋਂ ਅਫਸਰਾਂ ਨੂੰ ਜਾਣੂੰ ਕਰਵਾਉਂਦਿਆਂ ਸਮੁੱਚੇ ਲੋੜਵੰਦਾਂ ਨੂੰ ਸਰਲ ਵਿਧੀ ਨਾਲ ਪਲਾਟ ਅਲਾਟ ਕੀਤੇ ਜਾਣ ਦੀ ਮੰਗ ਕੀਤੀ।
ਉਨ੍ਹਾਂ ਕਿਹਾ ਕਿ ਸਰਕਾਰੀ ਹਿਦਾਇਤਾਂ ਦੇ ਉਲਟ ਨਾਂ ਮਾਤਰ ਪਿੰਡਾਂ ਵਿੱਚ ਹੀ ਗ੍ਰਾਮ ਸਭਾਵਾਂ ਸੱਦੀਆਂ ਗਈਆਂ ਹਨ ਅਤੇ ਭਾਰੀ ਬਹੁਗਿਣਤੀ ਪੰਚਾਇਤਾਂ ਨੇ ਮਨਮਰਜ਼ੀ ਦੀਆਂ ਸੂਚੀਆਂ ਬਣਾ ਕੇ ਉਤਾਂਹ ਭੇਜੀਆਂ ਹਨ। ਤਾਂਕਿ ਕਾਂਗਰਸ ਪਾਰਟੀ ਚੋਣਾਂ ਵੇਲੇ ਇਸ ਸਿਆਸੀ ਲਾਹਾ ਲੈ ਸਕੇ ।ਆਗੂਆਂ ਨੇ ਇਸ ‘ਤੇ ਸਖਤ ਇਤਰਾਜ਼ ਉਠਾਉਂਦਿਆਂ ਕਿਹਾ ਕਿ ਜੇਕਰ ਸਹੀ ਲੋੜਵੰਦ ਲੋਕਾਂ ਤੱਕ ਇਸ ਦਾ ਲਾਭ ਨਾ ਪਹੁੰਚਿਆ ਤਾਂ ਜਥੇਬੰਦੀਆਂ ਸ਼ੰਘਰਸ਼ ਹੋਰ ਤਿੱਖਾ ਕਰਨਗੀਆਂ।
ਅਧਿਕਾਰੀਆਂ ਨੇ ਭਰੋਸਾ ਦਿਵਾਇਆ ਕਿ ਮਜ਼ਦੂਰ ਜੱਥੇਬੰਦੀਆਂ ਹਕੀਕੀ ਲੋੜਵੰਦਾਂ ਦੀਆਂ ਸੂਚੀਆਂ ਆਪ ਤਿਆਰ ਕਰਕੇ ਬਲਾਕ ਵਿਕਾਸ ਤੇ ਪੰਚਾਇਤ ਅਫ਼ਸਰਾਂ ਤੀਕ ਪੁੱਜਦੀਆਂ ਕਰਨ ਤਾਂਕਿ ਅਸਲ ਗਰੀਬਾਂ ਨੂੰ ਇਸ ਯੋਜਨਾ ਦਾ ਲਾਭ ਮਿਲ ਸਕੇ।
ਇਹ ਵੀ ਤੈਅ ਹੋਇਆ ਕਿ ਬੀਤੇ ਸਾਲਾਂ ਵਿੱਚ ਅਲਾਟ ਕੀਤੇ ਗਏ ਪਲਾਟਾਂ ਦਾ ਕਬਜ਼ਾ ਛੇਤੀ ਤੋਂ ਛੇਤੀ ਲਾਭ ਪਾਤਰੀਆਂ ਨੂੰ ਦਿਵਾਇਆ ਜਾਵੇਗਾ।
ਵਫਦ ਦੇ ਆਗੂਆਂ ਨੇ ਪਲਾਟਾਂ ਦੀ ਅਲਾਟਮੈਂਟ ਲਈ ਫਾਰਮ ਪ੍ਰਾਪਤ ਕਰਨ ਹਿਤ 27 ਅਤੇ 28 ਅਕਤੂਬਰ ਨੂੰ ਲਾਏ ਜਾ ਰਹੇ ਕੈਂਪਾਂ ਦਾ ਸਮਾਂ ਵਧਾਉਣ ਦੀ ਮੰਗ ਕੀਤੀ ਜੋ ਅਧਿਕਾਰੀਆਂ ਵਲੋਂ ਪ੍ਰਵਾਨ ਕਰ ਲਈ ਗਈ ,ਤਾਂ ਕਿ ਹਰ ਲੋੜਵੰਦ ਦੀ ਅਰਜ਼ੀ ਵਿਭਾਗੀ ਅਧਿਕਾਰੀਆਂ ਤੱਕ ਪੁਚਾਈ ਜਾ ਸਕੇ।
ਆਗੂਆਂ ਨੇ ਐਲਾਨ ਕੀਤਾ ਕਿ ਬੇਜ਼ਮੀਨੇ-ਦਲਿਤਾਂ ਦੀਆਂ ਬਕਾਇਆ ਹੱਕੀ ਮੰਗਾਂ ਦੇ ਸਨਮਾਨ ਜਨਕ ਨਿਪਟਾਰੇ ਲਈ 29 ਅਕਤੂਬਰ ਨੂੰ ਸੱਤ ਮਜਦੂਰ ਜਥੇਬੰਦੀਆਂ ਦੇ ਸਾਂਝੇ ਮੋਰਚੇ ਵਲੋਂ ਮੋਰਿੰਡਾ ਵਿਖੇ ਸਾਂਝੀ ਰੋਸ ਰੈਲੀ ਕਰਨ ਉਪਰੰਤ ਮੁੱਖ ਮੰਤਰੀ ਪੰਜਾਬ ਦੀ ਰਿਹਾਇਸ਼ ਵੱਲ ਰੋਹ ਭਰਪੂਰ ਮਜ਼ਦੂਰ ਮਾਰਚ ਕਰਨ ਦਾ ਨਿਰਣਾ ਅਟਲ ਹੈ। ਉਹਨਾਂ ਪੰਜਾਬ ਦੇ ਸਮੂਹ ਕਿਰਤੀਆਂ ਨੂੰ 29 ਅਕਤੂਬਰ ਨੂੰ ਪਰਿਵਾਰਾਂ ਸਮੇਤ ਮੋਰਿੰਡੇ ਪਹੁੰਚਣ ਦੀ ਅਪੀਲ ਕੀਤੀ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ
