ਯੈੱਸ ਪੰਜਾਬ
3 ਅਕਤੂਬਰ, 2022:
‘ਆਮ ਆਦਮੀ ਪਾਰਟੀ’ ਦੀ ਸ: ਭਗਵੰਤ ਸਿੰਘ ਮਾਨ ਦੀ ਅਗਵਾਈ ਵਾਲੀ ਸਰਕਾਰ ਨੇ ਅੱਜ ਪੰਜਾਬ ਵਿਧਾਨ ਸਭਾ ਵਿੱਚ ਭਰੋਸੇ ਦਾ ਵੋਟ ਜਿੱਤ ਕੇ ਕਥਿਤ ਤੌਰ ’ਤੇ ਭਾਜਪਾ ਵੱਲੋਂ ਚਲਾਏ ਗਏ ‘ਅਪ੍ਰੇਸ਼ਨ ਲੋਟਸ’ ਨੂੰ ਫ਼ੇਲ੍ਹ ਕਰ ਦੇਣ ਦਾ ਦਾਅਵਾ ਕੀਤਾ।
ਮੁੱਖ ਮੰਤਰੀ ਵੱਲੋਂ ਇਸ ਵਿਸ਼ੇਸ਼ ਇਜਲਾਸ ਦੇ ਪਹਿਲੇ ਦਿਨ ਪੇਸ਼ ਕੀਤੇ ਭਰੋਸੇ ਦੇ ਮਤੇ ਦੇ ਹੱਕ ਵਿੱਚ 93 ਵੋਟਾਂ ਪਈਆਂ ਜਿਨ੍ਹਾਂ ਵਿੱਚ ਅਕਾਲੀ ਦਲ ਦੇ ਸ: ਮਨਪ੍ਰੀਤ ਸਿੰਘ ਇਆਲੀ ਅਤੇ ਬਸਪਾ ਦੇ ਸ੍ਰੀ ਨਛੱਤਰ ਪਾਲ ਦੀ ਵੋਟ ਵੀ ਗਿਣੀ ਗਈ।
ਹੋਇਆ ਇੰਜ ਕਿ ਅੱਜ ਜਿਸ ਵੇਲੇ ਭਰੋਸੇ ਦੇ ਮਤ ’ਤੇ ਵੋਟਿੰਗ ਹੋਣ ਲੱਗੀ ਉਸ ਵੇਲੇ ਸਦਨ ਵਿੱਚ ‘ਆਮ ਆਦਮੀ ਪਾਰਟੀ’ ਦੇ ਸਾਰੇ ਵਿਧਾਇਕ ਸ਼ਾਮਲ ਸਨ ਪਰ ਸ: ਸੰਧਵਾਂ ਦੇ ਸਪੀਕਰ ਹੋਣ ਕਰਕੇ ਉਨ੍ਹਾਂ ਦੀ ਵੋਟ ਨਹੀਂ ਸੀ ਪੈ ਸਕਦੀ ਅਤੇ ਇਸ ਤਰ੍ਹਾਂ 91 ਵੋਟਾਂ ਉਹ ਗਿਣੀਆਂ ਗਈਆਂ।
ਇਸ ਤੋਂ ਇਲਾਵਾ ਕਾਂਗਰਸ ਅਤੇ ਭਾਜਪਾ ਦੇ ਵਿਧਾਇਕ ਸਦਨ ਵਿੱਚ ਹਾਜ਼ਰ ਨਹੀਂ ਸਨ ਜਦਕਿ ਅਕਾਲੀ ਦਲ ਅਤੇ ਬਸਪਾ ਦਾ ਇਕ ਇਕ ਵਿਧਾਇਕ ਸ:ਇਆਲੀ ਅਤੇ ਸ੍ਰੀ ਨਛੱਤਰ ਪਾਲ ਹਾਜ਼ਰ ਸਨ। ਅਕਾਲੀ ਦਲ ਦੇ ਦੋ ਵਿਧਾਇਕ ਡਾ: ਸੁਖਵਿੰਦਰ ਸੁੱਖੀ ਅਤੇ ਸ੍ਰੀਮਤੀ ਗਨੀਵ ਕੌਰ ਵੀ ਸਦਨ ਵਿੱਚ ਹਾਜ਼ਰ ਨਹੀਂ ਸਨ।
ਸਪੀਕਰ ਸ:ਕੁਲਤਾਰ ਸਿੰਘ ਸੰਧਵਾਂ ਨੇ ਆਵਾਜ਼ ਮਤ ਨਾਲ ਗਿਣਤੀ ਕਰਵਾਈ ਤਾਂ 91 ਵੋਟਾਂ ‘ਆਮ ਆਦਮੀ ਪਾਰਟੀ’ ਦੀਆਂ ਮਿਲੀਆਂ। ਹਾਲਾਂਕਿ ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਸ: ਇਆਲੀ ਅਤੇ ਸ੍ਰੀ ਨਛੱਤਰ ਪਾਲ ਨੇ ਵਿਰੋਧ ਕੀਤਾ ਪਰ ਉਨ੍ਹਾਂ ਦੀਆਂ ਵੋਟਾਂ ਵੀ ਗਿਣ ਲਈਆਂ ਗਈਆਂ ਅਤੇ ਸਪੀਕਰ ਨੇ ਐਲਾਨ ਕਰ ਦਿੱਤਾ ਕਿ ਭਰੋਸੇ ਦੇ ਮਤ ਨੂੰ 93 ਵੋਟਾਂ ਹਾਸਲ ਹੋਈਆਂ ਹਨ ਅਤੇ ਵਿਰੋਧ ਵਿੱਚ ਕੋਈ ਵੋਟ ਨਹੀਂ ਪਈ।
ਜਿਵੇਂ ਹੀ ਸੈਸ਼ਨ ਖ਼ਤਮ ਹੋਇਆ ਤਾਂ ਸ: ਇਆਲੀ ਨੇ ਦਾਅਵਾ ਕੀਤਾ ਕਿ ਉਨ੍ਹਾਂ ਨੇ ਅਤੇ ਬਸਪਾ ਵਿਧਾਇਕ ਸ੍ਰੀ ਨਛੱਤਰ ਪਾਲ ਨੇ ਤਾਂ ਹੱਕ ਵਿੱਚ ਹਾਮੀ ਨਹੀਂ ਭਰੀ ਫ਼ਿਰ ਉਨ੍ਹਾਂ ਦੀਆਂ ਵੋਟਾਂ ਕਿਵੇਂ ਗਿਣ ਲਈਆਂ ਗਈਆਂ। ਉਨ੍ਹਾਂ ਕਿਹਾ ਕਿ ਜਦ ਉਹ ਆਪ ਸਦਨ ਵਿੱਚ ਭਰੋਸਾ ਮਤ ਦੇ ਵਿਰੋਧ ਵਿੱਚ ਭਾਸ਼ਣ ਦੇ ਚੁੱਕੇ ਸਨ ਫ਼ਿਰ ਉਨ੍ਹਾਂ ਦਾ ਹੱਕ ਵਿੱਚ ਵੋਟ ਪਾਉਣ ਦਾ ਸਵਾਲ ਹੀ ਨਹੀਂ।
ਸ: ਇਆਲੀ ਅਤੇ ਬਸਪਾ ਵਿਧਾਇਕ ਨੇ ਸਪੀਕਰ ਨੂੰ ਚਿੱਠੀ ਲਿਖ਼ ਕੇ ਰਿਕਾਰਡ ਦਰੁਸਤ ਕਰਨ ਲਈ ਕਿਹਾ ਹੈ, ਪਰ ਸਪੀਕਰ ਸ: ਸੰਧਵਾਂ ਦਾ ਕਹਿਣਾ ਹੈ ਕਿ ਸਭ ਕੁਝ ਕਾਇਦੇ ਅਨੁਸਾਰ ਹੋਇਆ ਹੈ ਅਤੇ ਭਰੋਸੇ ਦਾ ਮਤ 93 ਵੋਟਾਂ ਨਾਲ ਹੀ ਪਾਸ ਹੋਇਆ ਹੈ।
ਯੈੱਸ ਪੰਜਾਬ ਦੀਆਂ ਪੰਜਾਬੀ ਖ਼ਬਰਾਂ ਲਈ ਇੱਥੇ ਕਲਿੱਕ ਕਰਕੇ ਸਾਡਾ ਫ਼ੇਸਬੁੱਕ ਪੇਜ ਲਾਈਕ ਕਰੋ