ਯੈੱਸ ਪੰਜਾਬ
ਲੁਧਿਆਣਾ, 5 ਅਪ੍ਰੈਲ, 2020:
ਲੁਧਿਆਣਾ ਦੀ ਇਕ ਬਜ਼ੁਰਗ ਔਰਤ ਸੁਰਿੰਦਰ ਕੌਰ ਦੀ ਅੱਜ ਸਥਾਨਕ ਫ਼ੇਰਟਿਸ ਹਸਪਤਾਲ ਵਿਚ ਮੌਤ ਹੋ ਗਈ। ਇਸ ਦੇ ਨਾਲ ਹੀ ਰਾਜ ਵਿਚ ਕੋਰੋਨਾਵਾਇਰਸ ਕਾਰਨ ਹੋਈਆਂ ਮੌਤਾਂ ਦੀ ਗਿਣਤੀ 6 ਹੋ ਗਈ ਹੈ। ਲੁਧਿਆਣਾ ਵਿਚ ਕੋਰੋਨਾਵਾਇਰਸ ਕਾਰਨ ਹੋਈ ਇਹ ਦੂਜੀ ਮੌਤ ਹੈ।
ਸੁਰਿੰਦਰ ਕੌਰ ਨੇ ਅੱਜ ਬਾਅਦ ਦੁਪਹਿਰ ਲਗਪਗ 2.30 ਵਜੇ ਅੰਤਿਮ ਸਾਹ ਲਏ। ਯਾਦ ਰਹੇ ਕਿ 31 ਮਾਰਚ ਨੂੰ ਉਸ ਅੰਦਰ ਕੋਰੋਨਾਵਾਇਰਸ ਦੇ ਲੱਛਣ ਪਾਏ ਜਾਣ ਮਗਰੋਂ ਉਸਦੇ ਟੈਸਟ ਕੀਤੇ ਗਏ ਸਨ ਜੋ ਪਾਜ਼ਿਟਿਵ ਆਏ ਸਨ। ਇਸ ਦੇ ਨਾਲ ਹੀ ਉਸਨੂੰ ਸਿਵਲ ਹਸਪਤਾਲ ਲਿਜਾ ਕੇ ਆਈਸੋਲੇਟ ਕਰ ਦਿੱਤਾ ਗਿਆ ਸੀ। ਜਿਸ ਮਗਰੋਂ ਉਸਨੂੰ ਫ਼ੋਰਟਿਸ ਵਿਚ ਦਾਖ਼ਲ ਕਰਵਾਇਆ ਗਿਆ ਸੀ।
72 ਸਾਲਾ ਸੁਰਿੰਦਰ ਕੌਰ, ਸ਼ਿਮਲਾਪੁਰੀ ਇਲਾਕੇ ਦੀ ਰਹਿਣ ਵਾਲੀ ਸੀ ਅਤੇ ਉਹ ਲੁਧਿਆਣਾ ਵਿਚ ਪਹਿਲਾਂ ਕੋਰੋਨਾਵਾਇਰਸ ਦਾ ਸ਼ਿਕਾਰ ਹੋਈ 42 ਸਾਲਾ ਔਰਤ ਪੂਜਾ ਰਾਣੀ ਦੇ ਸੰਪਰਕ ਵਿਚ ਸੀ ਜਿਸ ਕਾਰਨ ਉਸਨੂੰ ਵੀ ਇਹ ਨਾਮੁਰਾਦ ਬਿਮਾਰੀ ਲੱਗ ਗਈ। ਦੱਸਿਆ ਜਾਂਦਾ ਹੈ ਕਿ ਉਹ ਪੂਜਾ ਰਾਣੀ ਦੀ ਗੁਆਂਢਣ ਸੀ ਅਤੇ ਉਸ ਨਾਲ ਉਸਦਾ ਲਗਾਤਾਰ ਮੇਲ ਜੋਲ ਸੀ।
ਸੁਰਿੰਦਰ ਕੌਰ ਆਪਣੇ 75 ਸਾਲਾ ਪਤੀ ਨਾਲ ਰਹਿੰਦੀ ਸੀ ਅਤੇ ਉਨ੍ਹਾਂ ਦੇ ਪਰਿਵਾਰ ਵਿਚ ਦੋ ਪੁੱਤਰ, ਨੂੰਹਾਂ ਅਤੇ 4 ਪੋਤੇ ਪੋਤੀਆਂ ਹਨ। ਸੁਰਿੰਦਰ ਕੌਰ ਬਾਰੇ ਪਤਾ ਲੱਗਣ ’ਤੇ ਪਰਿਵਾਰ ਦੇ ਬਾਕੀ 9 ਜੀਆਂ ਨੂੰ ਵੀ ਏਕਾਂਤਵਾਸ ਵਿਚ ਰੱਖ਼ਿਆ ਗਿਆ ਸੀ ਪਰ ਉਹਨਾਂ ਦੇ ਟੈਸਟ ਨੈਗੇਟਿਵ ਆਏ ਦੱਸੇ ਜਾਂਦੇ ਹਨ। ਸੁਰਿੰਦਰ ਕੌਰ ਦੀ ਕੋਈ ‘ਟਰੈਵਲ ਹਿਸਟਰੀ’ ਨਹੀਂ ਸੀ ਅਤੇ ਇਹ ਮੰਨਿਆਂ ਜਾਂਦਾ ਹੈ ਕਿ ਪੂਜਾ ਰਾਣੀ ਦੇ ਸੰਪਰਕ ਵਿਚ ਆਉਣ ਕਾਰਨ ਹੀ ਉਹ ਪਾਜ਼ਿਟਿਵ ਪਾਈ ਗਈ ਸੀ।
ਇਸ ਨੂੰ ਵੀ ਪੜ੍ਹੋ:
ਪੰਜਾਬ ’ਚ 3 ਹੋਰ ਕੋਰੋਨਾ ਪਾਜ਼ਿਟਿਵ ਮਾਮਲੇ ਸਾਹਮਣੇ ਆਏ, ਕੁਲ ਗਿਣਤੀ 68 ਪੁੱਜੀ
ਯੈੱਸ ਪੰਜਾਬ ਦੀਆਂ ‘ਅਪਡੇਟਸ’ TELEGRAM ਤੇ ਪ੍ਰਾਪਤ ਕਰਨ ਲਈ TELEGRAM ਐਪ ਡਾਊਨਲੋਡ ਕਰਕੇ ਇੱਥੇ ਕਲਿੱਕ ਕਰੋ