ਐੱਚ.ਐੱਸ.ਬਾਵਾ / ਯੈੱਸ ਪੰਜਾਬ
ਲੁਧਿਆਣਾ, 12 ਅਗਸਤ, 2022:
ਪੰਜਾਬ ਵਿੱਚ ਜਾਅਲੀ ਡਿਗਰੀਆਂ ਅਤੇ ਲਾਇਸੰਸਾਂ ’ਤੇ ਵਕਾਲਤ ਕਰਨ ਦਾ ਭਾਂਡਾ ਭੱਜਾ ਹੈ। ਲੁਧਿਆਣਾ ਵਿੱਚ ਸਾਹਮਣੇ ਆਏ ਇਕ ਹੈਰਾਨ ਕਰ ਦੇਣ ਵਾਲੇ ਮਾਮਲੇ ਵਿੱਚ 140 ਵਕੀਲ ਐਸੇ ਪਾਏ ਗਏ ਹਨ ਜਿਹੜੇ ਸਾਲਾਂ ਤੋਂ ਲੋਕਾਂ ਦੇ ਕੇਸਾਂ ਵਿੱਚ ਕਚਿਹਰੀਆਂ ਵਿੱਚ ਪੇਸ਼ ਹੋ ਰਹੇ ਸਨ ਪਰ ਉਨ੍ਹਾਂ ਵਿੱਚੋਂ ਕਈਆਂ ਕੋਲ ਡਿਗਰੀਆਂ ਨਹੀਂ ਸਨ ਜਾਂ ਫ਼ਿਰ ਜਾਅਲੀ ਡਿਗਰੀਆਂ ਸਨ ਅਤੇ ਇਹ ਬਾਰ ਕੌਂਸਲ ਵੱਲੋਂ ਕਿਸੇ ਹੋਰ ਦੇ ਨਾਂਅ ਜਾਰੀ ਲਾਇਸੰਸ ਨੰਬਰਾਂ ’ਤੇ ਭਾਵ ਕਿਸੇ ਹੋਰ ਵਕੀਲ ਦੇ ਲਾਇਸੰਸ ’ਤੇ ਵਕਾਲਤ ਕਰਦੇ ਆ ਰਹੇ ਸਨ।
‘ਬਾਰ ਕੌਂਸਲ’ ਦੀ 3 ਮੈਂਬਰੀ ਅਨੁਸ਼ਾਸ਼ਨੀ ਕਮੇਟੀ ਵੱਲੋਂ ਇਨ੍ਹਾਂ 140 ‘ਮੁੰਨਾਭਾਈ’ ਐਡਵੋਕੇਟਸ ਦੀ ਪਛਾਣ ਕਰਕੇ ਇਨ੍ਹਾਂ ਦੇ ਖਿਲਾਫ਼ ਕਾਰਵਾਈ ਲਈ ਲੁਧਿਆਣਾ ਪੁਲਿਸ ਕਮਿਸ਼ਨਰ ਨੂੰ ਸੰਬੰਧਤ ਜਾਂਚ ਰਿਪੋਰਟ ਅਤੇ ਵਕੀਲਾਂ ਦੇ ਨਾਂਅ ਭੇਜ ਦਿੱਤੇ ਹਨ ਅਤੇ ਇਸ ਤਰ੍ਹਾਂ ਇਨ੍ਹਾਂ ਖ਼ਿਲਾਫ਼ ਕੇਸ ਦਰਜ ਹੋਣੇ ਲਗਪਗ ਤੈਅ ਹਨ। ਇਸ ਤੋਂ ਇਲਾਵਾ ਬਾਰ ਕੌਂਸਲ ਨੇ ਤੁਰੰਤ ਪ੍ਰਭਾਵ ਨਾਲ ਇਨ੍ਹਾਂ ਵਕੀਲਾਂ ਦੇ ਅਦਾਲਤਾਂ ਵਿੱਚ ਪੇਸ਼ ਹੋਣ ’ਤੇ ਰੋਕ ਲਗਾ ਦਿੱਤੀ ਹੈ।
ਇੱਥੇ ਹੀ ਬੱਸ ਨਹੀਂ ਕਿਸੇ ਹੋਰ ਵਕੀਲ ਦੇ ਲਾਇਸੰਸ ਨੰਬਰ ’ਤੇ ਪ੍ਰੈਕਟਿਸ ਕਰਦੇ ਆ ਰਹੇ ਇਕ ਵਕੀਲ ਨੇ ਤਾਂ ਲੁਧਿਆਣਾ ਬਾਰ ਐਸੋਸੀਏਸ਼ਨ ਦੇ ਐਗਜ਼ੈਕਟਿਵ ਮੈਂਬਰ ਲਈ ਚੋਣ ਵੀ ਲੜੀ, ਇਸਦੇ ਪ੍ਰਚਾਰ ਲਈ ਪੈਂਫ਼ਲੈਟ ਵੀ ਛਪਵਾਏ ਅਤੇ ਉਹ ਚੋਣ ਜਿੱਤ ਵੀ ਗਿਆ।
‘ਬਾਰ ਕੌਂਸਲ ਪੰਜਾਬ ਐਂਡ ਹਰਿਆਣਾ’ ਦੀ ਅਨੁਸ਼ਾਸ਼ਨੀ ਕਮੇਟੀ, ਜਿਸ ਵਿੱਚ ਚੇਅਰਮੈਨ ਸ੍ਰੀ ਸੀ.ਐਮ.ਮੁੰਜਾਲ, ਮੈਂਬਰ ਸ੍ਰੀ ਹਰੀਸ਼ ਰਾਏ ਢਾਂਡਾ ਅਤੇ ਕੋ-ਆਪਟਿਡ ਮੈਂਬਰ ਸ੍ਰੀ ਵਿਕਾਸ ਬਿਸ਼ਨੋਈ ਸ਼ਾਮਿਲ ਹਨ, ਨੇ ਇਸ ਮਾਮਲੇ ਦੀ ਇਕ ਵਿਸਥਾਰਤ ਰਿਪੋਰਟ ਬਣਾਈ ਹੈ ਜਿਸ ਦਾ ਸਾਰ ਇਹ ਹੈ ਕਿ ਲੁਧਿਆਣਾ ਦੇ ਹੀ ਇਕ ਐਡਵੋਕੇਟ ਸ੍ਰੀ ਡੇਵਿਡ ਗਿੱਲ ਨੇ ਸ਼ਿਕਾਇਤ ਕੀਤੀ ਸੀ ਕਿ ਪਰਮਿੰਦਰ ਸਿੰਘ ਨਾਂਅ ਦਾ ਇਕ ਐਡਵੋਕੇਟ ਜਿਸ ਕੋਲ ਜਾਅਲੀ ਡਿਗਰੀ ਹੈ ਉਹ ਬਾਰ ਕੌਂਸਲ ਵੱਲੋਂ ਕਿਸੇ ਹੋਰ ਦੇ ਨਾਂਅ ਜਾਰੀ ਲਾਇਸੰਸ ’ਤੇ ਪ੍ਰੈਕਟਿਸ ਹੀ ਨਹੀਂ ਕਰਦਾ ਆ ਰਿਹਾ ਸਗੋਂ ਉਹ ਬਾਰ ਐਸੋਸੀਏਸ਼ਨ ਦੇ ਐਗਜ਼ੈਕਟਿਵ ਮੈਂਬਰ ਲਈ ਚੋਣ ਲੜ ਕੇ ਚੁਣਿਆ ਵੀ ਗਿਆ ਸੀ। ਪਰਮਿੰਦਰ ਸਿੰਘ ਜਿਸ ਲਾਇਸੰਸ ਨੰਬਰ ਪੀ-921/2016 ’ਤੇ ਪ੍ਰੈਕਟਿਸ ਕਰ ਰਿਹਾ ਸੀ ਉਹ ਪਟਿਆਲਾ ਦੇ ਇਕ ਵਕੀਲ ਸ੍ਰੀ ਪ੍ਰਿੰਸ ਰੂਪ ਰਾਏ ਦੇ ਨਾਮ ’ਤੇ ਹੈ।
ਇਸ ਤੋਂ ਬਾਅਦ ਅਨੁਸ਼ਾਸ਼ਨੀ ਕਮੇਟੀ ਕੋਲ ਪੇਸ਼ ਹੋਏ ਪਰਮਿੰਦਰ ਸਿੰਘ ਨੇ ਕਿਹਾ ਕਿ ਉਸਨੇ ਤਾਂ ਦੀਪਕ ਪਰਜਾਪਤੀ ਨਾਂਅ ਦੇ ਇਕ ਵਕੀਲ ਰਾਹੀਂਹੀ ਡੇਢ ਲੱਖ ਰੁਪਏ ਵਿੱਚ ਡਿਗਰੀ ਲਈ ਸੀ। ਉਸਨੇ ਇਸ ਸਾਜ਼ਿਸ਼ ਵਿੱਚ ਸ੍ਰੀ ਡੇਵਿਡ ਗਿੱਲ ਦਾ ਨਾਂਅ ਲੈਂਦਿਆਂ ਇਹ ਦੱਸਿਆ ਕਿ ਸ੍ਰੀ ਗਿੱਲ ਹੀ ਉਸਨੂੰ ਸ੍ਰੀ ਪਰਜਾਪਤੀ ਕੋਲ ਲੈ ਕੇ ਗਏ ਸਨ ਅਤੇ ਇਨ੍ਹਾਂ ਦੋਹਾਂ ਨੇ ਹੀ ਉਸਨੂੂੰ ਢਾਈ ਲੱਖ ਰੁਪਏ ਵਿੱਚ ਵਕਾਲਤ ਲਈ ਬਾਰ ਕੌਂਸਲ ਦਾ ਲਾਇਸੰਸ ਵੀ ਲੈ ਕੇ ਦਿੱਤਾ ਸੀ ਪਰ ਬਾਅਦ ਵਿੱਚ ਉਸਨੂੰ ਪਤਾ ਲੱਗ ਗਿਆ ਸੀ ਕਿ ਉਸ ਨਾਲ ਧੋਖ਼ਾ ਹੋਇਆ ਹੈ। ਪਰਮਿੰਦਰ ਸਿੰਘ ਨੇ ਦੋਸ਼ ਲਗਾਇਆ ਕਿ ਪਰਜਾਪਤੀ ਲਗਪਗ 400 ਲੋਕਾਂ ਨੂੰ ਇਸੇ ਤਰ੍ਹਾਂ ਡਿਗਰੀਆਂ ਅਤੇ ਲਾਇਸੰਸ ਦੁਆ ਚੁੱਕਾ ਹੈ।
ਅਨੁਸ਼ਾਸ਼ਨੀ ਕਮੇਟੀ ਨੇ ਉਕਤ ਸਾਰੇ ਮਾਮਲੇ ਦੀ ਰੌਸ਼ਨੀ ਵਿੱਚ 2010 ਤੋਂ 2020 ਤਕ ਦਾ ਬਾਰ ਐਸੋਸੀਏਸ਼ਨ ਲੁਧਿਆਣਾ ਦਾ ਰਿਕਾਰਡ ਅਤੇ ਬਾਰ ਕੌਂਸਲ ਦੇ ਲਾਇਸੰਸ ਨੰਬਰਾਂ ਦਾ ਮਿਲਾਣ ਕਰਵਾਇਆ ਤਾਂ ਇਹ ਸਾਹਮਣੇ ਆਇਆ ਕਿ ਇਸ ਸਮੇਂ ਦੌਰਾਨ ਹੀ ਲੁਧਿਆਣਾ ਵਿੱਚ 140 ਵਕੀਲ ਕਿਸੇ ਹੋਰ ਵਕੀਲ ਦੇ ਲਾਇਸੰਸ ਨੰਬਰ ’ਤੇ ਪ੍ਰੈਕਟਿਸ ਕਰ ਰਹੇ ਸਨ।
ਅਨੁਸ਼ਾਸ਼ਨੀ ਕਮੇਟੀ ਨੇ ਇਸ ਮਾਮਲੇ ਦੀ ਗੰਭੀਰਤਾ ਦਾ ਹਵਾਲਾ ਦਿੰਦਿਆਂ ਇਹ ਜਾਂਚ ਰਿਪੋਰਟ ਜ਼ਿਲ੍ਹਾ ਅਤੇ ਸੈਸ਼ਨਜ਼ ਜੱਜ ਨੂੰ ਭੇਜਣ ਤੋਂ ਇਲਾਵਾ ਕਾਰਵਾਈ ਲਈ ਲੁਧਿਆਣਾ ਦੇ ਪੁਲਿਸ ਕਮਿਸ਼ਨਰ ਸ੍ਰੀ ਕੌਸਤੁਭ ਸ਼ਰਮਾ ਨੂੰ ਵੀ ਭੇਜੀ ਹੈ।
ਇੱਥੇ ਇਹ ਵੀ ਵਰਨਣਯੋਗ ਹੈ ਕਿ ਇਹ ਵਰਤਾਰਾ ਕੇਵਲ ਲੁਧਿਆਣਾ ਤਕ ਹੀ ਸੀਮਤ ਨਹੀਂ ਹੋ ਸਕਦਾ ਅਤੇ ਅਜੇ ਇਸ ਮਾਮਲੇ ਦੇ ਹੋਰ ਵੱਡੇ ਅਤੇ ਹੈਰਾਨੀਜਨਕ ਪਹਿਲੂ ਸਾਹਮਣ ਆਉਣੇ ਬਾਕੀ ਹਨ।
ਹੇਠਾਂ ਅਸੀਂ ਅਨੁਸ਼ਾਸ਼ਨੀ ਕਮੇਟੀ ਦੀ ਜਾਂਚ ਰਿਪੋਰਟ, ਉਸਤੋਂ ਬਾਅਦ ਅਸਲ ਵਕੀਲਾਂ ਦੇ ਨਾਂਅ ਅਤੇ ਉਨ੍ਹਾਂ ਦੇ ਨੰਬਰ ਅਤੇ ਫ਼ਿਰ ਜਾਅਲੀ ਭਾਵ ‘ਮੁੰਨਾਭਾਈ’ ਐਡਵੋਕੇਟਸ ਦੇ ਨਾਂਵਾਂ ਵਾਲੀ ਸੂਚੀ ਹੇਠਾਂ ਛਾਪ ਰਹੇ ਹਾਂ।
ਯੈੱਸ ਪੰਜਾਬ ਦੀਆਂ ਪੰਜਾਬੀ ਖ਼ਬਰਾਂ ਲਈ ਇੱਥੇ ਕਲਿੱਕ ਕਰਕੇ ਸਾਡਾ ਫ਼ੇਸਬੁੱਕ ਪੇਜ ਲਾਈਕ ਕਰੋ