ਯੈੱਸ ਪੰਜਾਬ
ਪਟਿਆਲਾ, 11 ਅਪ੍ਰੈਲ, 2021 (ਰਾਜ ਕੁਮਾਰ ਸ਼ਰਮਾ)
ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੀ ਪਟਿਆਲਾ ਸਥਿਤ ਰਿਹਾਇਸ਼ ਮੋਤੀ ਬਾਗ ਪੈਲੇਸ ਦੇ ਸਾਹਮਣੇ ਨੌਕਰੀ ਦਿੱਤੇ ਜਾਣ ਦੀ ਆਪਣੀ ਮੰਗ ਨੂੰ ਲੈ ਕੇ ਪ੍ਰਦਰਸ਼ਨ ਕਰਨ ਲਈ ਇਕੱਤਰ ਮੁਲਾਜ਼ਮ ਜੱਥੇਬੰਦੀਆਂ ਦੇ ਮੈਂਬਰਾਂ ਦੇ ਖਿਲਾਫ਼ ਅੱਜ ਪੁਲਿਸ ਨੇ ਇਕ ਵਾਰ ਫ਼ਿਰ ਸਖ਼ਤ ਕਾਰਵਾਈ ਕੀਤੀ।
ਸਾਂਝਾਂ ਅਧਿਆਪਕ ਮੋਰਚਾ ਦੇ ਸੱਦੇ ’ਤੇ ਅੱਜ ਪਟਿਆਲਾ ਪੁੱਜੇ ਈ.ਟੀ.ਟੀ.ਅਧਿਆਪਕਾਂ ’ਤੇ ਪੁਲਿਸ ਵੱਲੋਂ ਲਾਠੀਆਂ ਵਰ੍ਹਾਈਆਂ ਗਈਆਂ ਅਤੇ ਉਨ੍ਹਾਂ ਨੂੰ ਬੱਸਾਂ ਵਿੱਚ ਬਿਠਾ ਕੇ ਥਾਣੇ ਲਿਜਾਇਆ ਗਿਆ। ਦੋਸ਼ ਹੈ ਕਿ ਪੁਲਿਸ ਨੇ ਬਿਨਾਂ ਕੋਈ ਗੱਲਬਾਤ ਸ਼ੁਰੂ ਕੀਤਿਆਂ ਅਧਿਆਪਕਾਂ ਨੂੰ ਦੌੜਾ ਦੌੜਾ ਕੇ ਕੁੱਟਿਆ।
ਅਧਿਆਪਕਾਂ ਦਾ ਦੋਸ਼ ਹੈ ਕਿ ਉਹਨਾਂ ਨੂੂੰ ਪ੍ਰਦਰਸ਼ਨ ਕਰਨ ਤੋਂ ਪਹਿਲਾਂ ਹੀ ਜਿੱਥੇ ਉਹ ਇਕੱਤਰ ਹੋਏ ਸਨ ਉੱਥੇ ਹੀ ਘੇਰ ਕੇ ਪੁਲਿਸ ਨੇ ਡਾਂਗਾਂ ਮਾਰੀਆਂ ਅਤੇ ਘੜੀਸ ਕੇ ਬੱਸਾਂ ਵਿੱਚ ਭਰ ਲਿਆ ਗਿਆ। ਇਨ੍ਹਾਂ ਵਿੱਚ ਪੁਰਸ਼ ਅਤੇ ਮਹਿਲਾ ਅਧਿਆਪਕ ਦੋਵੇਂ ਸ਼ਾਮਲ ਸਨ।
ਦੂਜੇ ਬੰਨੇ ਰਾਹ ਵਿੱਚ ਰੋਕੇ ਗਏ ਅਧਿਆਪਕਾਂ ਨੇ ਪਟਿਆਲਾ-ਸੰਗਰੂਰ ਹਾਈਵੇਅ ’ਤੇ ਭਾਖ਼ੜਾ ਨਹਿਰ ਕੋਲ ਜਾਮ ਲਗਾ ਦਿੱਤਾ ਜਿਸ ਨਾਲ ਆਵਾਜਾਈ ਪ੍ਰਭਾਵਿਤ ਹੋਈ।
ਇਸੇ ਦੌਰਾਨ ਭਾਖ਼ੜਾ ਨਹਿਰ ਦੇ ਪੁਲ ਨੇੜੇ ਇਕੱਤਰ ਹੋ ਕੇ ਮੁਜ਼ਾਹਰਾ ਕਰ ਰਹੇ ਅਧਿਆਪਕਾਂ ਵਿੱਚੋਂ 2 ਨੇ ਭਾਖ਼ੜਾ ਨਹਿਰ ਵਿੱਚ ਛਾਲ ਮਾਰ ਦਿੱਤੀ ਪਰ ਇੱਥੇ ਪੁਲਿਸ ਵੱਲੋਂ ਪਹਿਲਾਂ ਹੀ ਕੀਤੇ ਅਗਾਊਂ ਇੰਤਜ਼ਾਮਾਂ ਤਹਿਤ ਹਾਜ਼ਰ ਗੋਤਾਖ਼ੋਰਾਂ ਨੇ ਵੀ ਤੁਰੰਤ ਮਗਰ ਹੀ ਛਾਲਾਂ ਮਾਰ ਕੇ ਦੋਹਾਂ ਅਧਿਆਪਕਾਂ ਨੂੂੰ ਨਹਿਰ ਤੋਂ ਬਾਹਰ ਕੱਢ ਲਿਆ ਗਿਆ। ਦੋਹਾਂ ਅਧਿਆਪਕਾਂ ਨੂੂੰ ਉਨ੍ਹਾਂ ਦੇ ਸਾਥੀਆਂ ਨੇ ਹੀ ਮੁੱਢਲੀ ਸਹਾਇਤਾ ਦਿੱਤੀ ਅਤੇ ਉਨ੍ਹਾਂ ਦੀ ਹਾਲਤ ਠੀਕ ਦੱਸੀ ਜਾ ਰਹੀ ਹੈ।
ਜ਼ਿਕਰਯੋਗ ਹੈ ਕਿ ਈ.ਟੀ.ਟੀ.ਅਤੇ ਟੈਟ ਪਾਸ ਬੇਰੁਜ਼ਗਾਰ ਅਧਿਆਪਕਾਂ ਵਿੱਚੋਂ 2 ਮੈਂਬਰ ਪਿਛਲੇ 20 ਦਿਨਾਂ ਤੋਂ ਆਪਣੀ ਮੰਗਾਂ ਮਨਵਾਉਣ ਲਈ ਪਟਿਆਲਾ ਦੇ ਹੀ ਇਕ ਬੀ.ਐਸ.ਐਨ.ਐਲ. ਟਾਵਰ ’ਤੇ ਚੜ੍ਹੇ ਹੋਏ ਹਨ।