ਯੈੱਸ ਪੰਜਾਬ
ਖੰਨਾ, 24 ਫ਼ਰਵਰੀ, 2021:
ਪੰਜਾਬੀ ਗਾਇਕੀ ਵਿੱਚ ਆਪਣੀ ਇਕ ਵਿਲੱਖਣ ਪਛਾਣ ਰੱਖਦੇ, ਪੰਜਾਬੀ ਦੇ ਸਿਰਮੌਰ ਗਾਇਕਾਂ ਵਿੱਚੋਂ ਇਕ ਸਰਦੂਲ ਸਿਕੰਦਰ ਦਾ ਅੱਜ ਦਿਹਾਂਤ ਹੋ ਗਿਆ ਹੈ।
ਉਹਨਾਂ ਦੀ ਬੇਵਕਤੀ ਅਤੇ ਅਚਾਨਕ ਮੌਤ ਬਾਰੇ ਆਈ ਖ਼ਬਰ ਨਾਲ ਪੰਜਾਬੀ ਫ਼ਿਲਮ ਅਤੇ ਸੰਗੀਤ ਜਗਤ ਅਤੇ ਪੰਜਾਬੀ ਗਾਇਕੀ ਨੂੰ ਪਿਆਰ ਕਰਨ ਵਾਲਿਆਂ ਵਿੱਚ ਸੋਗ ਦੀ ਲਹਿਰ ਹੈ।
ਉਨ੍ਹਾਂ ਨੇ ਅੱਜ ਮੋਹਾਲੀ ਦੇ ਫ਼ੋਰਟਿਸ ਹਸਪਤਾਲ ਵਿਖ਼ੇ ਆਖ਼ਰੀ ਸਾਹ ਲਏ। ਉਹ ਪਿਛਲੇ ਸਾਲ ਦਸੰਬਰ ਮਹੀਨੇ ਵਿੱਚ ਕੋਰੋਨਾ ਪਾਜ਼ਿਟਿਵ ਪਾਏ ਗਏ ਸਨ ਜਿਸ ਮਗਰੋਂ ਉਨ੍ਹਾਂ ਦੀ ਹਾਲਤ ਲਗਾਤਾਰ ਨਿਘਰਦੀ ਗਈ। ਇਸ ਤੋਂ ਪਹਿਲਾਂ ਉਹ ਲੁਧਿਆਣਾ ਵਿਖ਼ੇ ਵੀ ਦਾਖ਼ਲ ਰਹੇ।
ਉਹ ਆਪਣੇ ਪਿੱਛੇ ਆਪਣੀ ਪਤਨੀ ਅਤੇ ਨਾਮਵਰ ਪੰਜਾਬੀ ਗਾਇਕਾ ਅਤੇ ਅਦਾਕਾਰਾ ਅਮਰ ਨੂਰੀ ਅਤੇ ਦੋ ਬੇਟੇ ਆਲਾਪ ਸਿਕੰਦਰ ਅਤੇ ਸਾਰੰਗ ਸਿਕੰਦਰ ਨੂੰ ਛੱਡ ਗਏ ਹਨ।
15 ਜਨਵਰੀ 1961 ਨੂੰ ਜਨਮੇ ਸਰਦੂਲ ਸਿਕੰਦਰ 60 ਸਾਲ ਦੀ ਉਮਰੇ 23 ਫ਼ਰਵਰੀ ਨੂੰ ਇਸ ਸੰਸਾਰ ਨੂੰ ਅਲਵਿਦਾ ਕਹਿ ਗਏ।
ਸਰਦੂਲ ਸਿਕੰਦਰ ਨੇ ਅਨੇਕਾਂ ਸੁਪਰਹਿੱਟ ਪੰਜਾਬੀ ਗੀਤ ਸਰੋਤਿਆਂ ਦੀ ਝੋਲੀ ਪਾਉਣ ਤੋਂ ਇਲਾਵਾ ਕਈ ਪੰਜਾਬੀ ਫ਼ਿਲਮਾਂ ਵਿੱਚ ਵੀ ਕੰਮ ਕੀਤਾ।
ਉਹਨਾਂ ਨੇ ਪੁਲਿਸ ਇਨ ਪਾਲੀਵੁੱਡ, ਜੱਗਾ ਡਾਕੂ, ਖੁਸ਼ੀਆਂ, ਪਿੰਡ ਦੀ ਕੁੜੀ, ਚੂੜੀਆਂ, ਪੰਚਾਇਤ, ਛਨਕਾਟਾ ਅਤੇ ਕੱਢਤੀਆਂ ਕਸਰਾਂ ਫ਼ਿਲਮਾਂ ਵਿੱਚ ਕੰਮ ਕੀਤਾ।
ਉਨ੍ਹਾਂ ਵੱਲੋਂ ਗਾਏ ਸੁਪਰਹਿੱਟ ਗੀਤਾਂ ਵਿੱਚ ਹੇਠ ਲਿਖ਼ੇ ਗ਼ੀਤ ਸ਼ਾਮਲ ਹਨ।
ਇਕ ਚਰਖ਼ਾ ਗਲੀ ਦੇ ਵਿੱਚ ਡਾਹ ਲਿਆ
ਫੁੱਲਾਂ ਦੀਏ ਕੱਚੀਏ ਵਪਾਰਣੇ
ਤੇਰਾ ਲਿਖ਼ ਦੂੰ ਸਫ਼ੈਦਿਆਂ ’ਤੇ ਨਾਂਅ ਜਿੰਨੇ ਨੀ ਜੀ.ਟੀ.ਰੋਡ ਦੇ ਉੱਤੇ
ਹੁਸਨਾਂ ਦੇ ਮਾਲਕੋ
ਇਕ ਕੁੜੀ ਦਿੱਲ ਉੱਤੇ ਛਾ ਗਈ
ਖ਼ਤ ਟੁਕੜੇ ਟੁਕੜੇ ਕਰ ਦੇਣੇ, ਮੈਂ ਸਾੜ ਦੇਣਾ ਤਸਵੀਰਾਂ ਨੂੰ
ਮੌਤ ਵੀ ਨੀ ਆਉਣੀ
ਨਜ਼ਰਾਂ ਤੋਂ ਗਿਰ ਗਈ
ਕਾਹਤੋਂ ਠੋਕਰਾਂ ਤੂੰ ਮਾਰੇਂ ਅੱਗੇ ਬੜੇ ਦੁੱਖ ਝੱਲੇ