ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਇਸ ਗੱਲ ’ਤੇ ਨਾਰਾਜ਼ਗੀ ਜ਼ਾਹਿਰ ਕੀਤੀ ਹੈ ਕਿ ਉਨ੍ਹਾਂ ਵੱਲੋਂ ਕੀਤੇ ਚੋਣ ਵਾਅਦੇ ਅਤੇ ਕਾਂਗਰਸ ਦੇ ਚੋਣ ਮਨੋਰਥ ਪੱਤਰ ਅਨੁਸਾਰ ਕਾਂਗਰਸ ਸਰਕਾਰ ਵੱਲੋਂ ਆਪਣੇ ਪਹਿਲੇ ਸਾਲ ਦੇ ਅੰਦਰ ਹੀ ਡੇਢ ਲੱਖ ਤੋਂ ਉੱਪਰ ਨੌਜਵਾਨਾਂ ਨੂੰ ‘ਘਰ ਘਰ ਰੋਜ਼ਗਾਰ’ ਯੋਜਨਾ ਤਹਿਤ ਨੌਕਰੀਆਂ ਮੁਹੱਈਆ ਕਰਵਾ ਦੇਣ ਦੇ ਬਾਵਜੂਦ ਵਿਰੋਧੀ ਧਿਰਾਂ ਸਰਕਾਰ ਦੇ ਖਿਲਾਫ਼ ਭੰਡੀ ਪ੍ਰਚਾਰ ਵਿਚ ਜੁਟੀਆਂ ਹੋਈਆਂ ਹਨ।
ਐਤਵਾਰ ਨੂੰ ਲੁਧਿਆਣਾ ਵਿਖੇ ਮੁੱਖ ਮੰਤਰੀ ਦੇ ਜਨਮ ਦਿਹਾੜੇ ’ਤੇ ਲਗਾਏ ਗਏ ਰੋਜ਼ਗਾਰ ਮੇਲੇ ਦੌਰਾਨ ਜਿੱਥੇ ਕੈਪਟਨ ਅਮਰਿੰਦਰ ਸਿੰਘ ਨੇ 9592 ਨੌਜਵਾਨਾਂ ਨੂੰ ਨਿਯੁਕਤੀ ਪੱਤਰ ਵੰਡੇ ਉੱਥੇ ਉਨ੍ਹਾਂ ਇਹ ਵੀ ਦਾਅਵਾ ਕੀਤਾ ਕਿ ਇਕ ਸਾਲ ਦੇ ਅੰਦਰ ਹੀ ਉਨ੍ਹਾਂ ਦੀ ‘ਸਰਕਾਰ ਵੱਲੋਂ’ 1,61,522 ਨੌਜਵਾਨਾਂ ਨੂੰ ਨੌਕਰੀਆਂ ਮੁਹੱਈਆ ਕਰਵਾ ਦਿੱਤੀਆਂ ਗਈਆਂ ਹਨ।
ਮੁੱਖ ਮੰਤਰੀ ਨੇ ਇਸ ਭੰਡੀ ਪ੍ਰਚਾਰ ਦਾ ਵੀ ਖੰਡਨ ਕੀਤਾ ਹੈ ਕਿ ਨੌਜਵਾਨਾਂ ਨੂੰ ਨੌਕਰੀਆਂ ਬਹੁਤ ਹੀ ਘੱਟ ਤਨਖ਼ਾਹਾਂ ’ਤੇ ਮੁਹੱਈਆ ਕਰਵਾਈਆਂ ਜਾ ਰਹੀਆਂ ਹਨ ਜਿਸ ਕਰਕੇ ਨੌਕਰੀਆਂ ਪਾਉਣ ਵਾਲੇ ਨੌਜਵਾਨ ਅਤੇ ਉਨ੍ਹਾਂ ਦੇ ਪਰਿਵਾਰ ਸੰਤੁਸ਼ਟ ਨਹੀਂ ਹਨ। ਉਨ੍ਹਾਂ ਇਹ ਵੀ ਦਾਅਵਾ ਕੀਤਾ ਕਿ 3 ਲੱਖ ਰੁਪਏ ਸਾਲਾਨਾ ਭਾਵ 25 ਹਜ਼ਾਰ ਰੁਪਏ ਮਹੀਨਾ ਤੋਂ ਲੈ ਕੇ 31 ਲੱਖ ਰੁਪਏ ਸਾਲਾਨਾ ਤਕ ਦੇ ਪੈਕੇਜ ’ਤੇ ਨੌਕਰੀਆਂ ਮੁਹੱਈਆ ਕਰਵਾਈਆਂ ਗਈਆਂ ਹਨ।
ਜਦ ਇਕ ਸੂਬੇ ਦਾ ਮੁੱਖ ਮੰਤਰੀ ਅਤੇ ਖ਼ਾਸ ਕਰ ਕੈਪਟਨ ਅਮਰਿੰਦਰ ਸਿੰਘ ਜਿਹੀ ਭਰੋਸੇਯੋਗਤਾ ਅਤੇ ਕ੍ਰਿਸ਼ਮਾਈ ਸ਼ਖ਼ਸ਼ੀਅਤ ਵਾਲਾ ਮੁੱਖ ਮੰਤਰੀ ਇਹ ਕਹਿੰਦਾ ਹੈ ਤਾਂ ਘੱਟੋ ਘੱਟ ਸਾਡੇ ਕੋਲ ਕੋਈ ਐਸਾ ਕਾਰਨ ਨਹੀਂ ਰਹਿ ਜਾਂਦਾ ਕਿ ਉਕਤ ਦਾਅਵਿਆਂ ’ਤੇ ਭਰੋਸਾ ਨਾ ਕੀਤਾ ਜਾਵੇ।
ਉਂਜ ਪੰਜਾਬ ਦੇ ਆਮ ਲੋਕਾਂ ਅਤੇ ਵੋਟਰਾਂ ਵਾਂਗ ਪੰਜਾਬ ਦੇ ਮੀਡੀਆ, ਵਿਰੋਧੀ ਧਿਰਾਂ ਅਤੇ ਹੋਰ ਵਿਸ਼ਲੇਸ਼ਕਾਂ ਨੇ ਵੀ ਸਮਝਿਆ ਤਾਂ ਇਹੀ ਸੀ ਕਿ ਕੈਪਟਨ ਅਤੇ ਕਾਂਗਰਸ ਦੋਵੇਂ ਹੀ ਹਰ ਘਰ ਵਿਚ ਇਕ ਵਿਅਕਤੀ ਨੂੰ ਸਰਕਾਰੀ ਨਹੀਂ ਤਾਂ ਅਰਧ ਸਰਕਾਰੀ ਅਦਾਰਿਆਂ ਵਿਚ ਨੌਕਰੀ ਦੇਣ ਦੀ ਗੱਲ ਕਰ ਰਹੇ ਹਨ। ਇਹ ਗੱਲ ਵੱਖਰੀ ਹੈ ਕਿ ਹੁਣ ਉਸੇ ਗੱਲ ਨੂੰ ਮੂਧੀ ਮਾਰ ਕੇ ਨੌਜਵਾਨਾਂ ਨੂੰ ਨਿੱਜੀ ਅਦਾਰਿਆਂ ਵਿਚ ਨੌਕਰੀਆਂ ਮੁਹੱਈਆ ਕਰਾਉਣ ਲਈ ਸਰਕਾਰ ਵੱਲਅੋਂ ਕੇਵਲ ‘ਫ਼ੈਸਲੀਲੀਟੇਰ’ ਦੀ ਭੂਮਿਕਾ ਅਦਾ ਕੀਤੀ ਜਾ ਰਹੀ ਹੈ।
ਸਵਾਲ ਇਹ ਹੈ ਕਿ ਕੀ ਇਸ ਤੋਂ ਪਹਿਲਾਂ ਪੰਜਾਬ ਦੇ ਨੌਜਵਾਨਾਂ ਨੂੰ ਨਿੱਜੀ ਖ਼ੇਤਰ ਵਿਚ ਨੌਕਰੀਆਂ ਨਹੀਂ ਮਿਲ ਰਹੀਆਂ ਸਨ? ਕੀ ਨਿੱਜੀ ਕੰਪਨੀਆਂ ਪਹਿਲਾਂ ਨੌਜਵਾਨਾਂ ਨੂੰ ‘ਹਾਇਰ’ ਕਰ ਨਹੀਂ ਰਹੀਆਂ ਸਨ? ਕੀ ਪਹਿਲਾਂ ਕੰਪਨੀਆਂ ਦੇ ਨੌਜਵਾਨਾਂ ਨੂੰ ਭਰਤੀ ਕਰਨ ’ਤੇ ਕੋਈ ਪਾਬੰਦੀ ਸੀ? ਕੀ ਨੌਜਵਾਨਾਂ ਦੇ ਨਿੱਜੀ ਅਦਾਰਿਆਂ ਵਿਚ ਕੰਮ ਕਰਨ ’ਤੇ ਕੋਈ ‘ਬੈਨ’ ਸੀ ਜਿਹੜਾ ਕਾਂਗਰਸ ਸਰਕਾਰ ਨੇ ਆ ਕੇ ਚੁੱਕਿਆ ਜਿਸ ਨਾਲ 1 ਲੱਖ 61 ਹਜ਼ਾਰ ਨੌਜਵਾਨਾਂ ਨੂੰ ਨੌਕਰੀਆਂ ਮਿਲ ਸਕੀਆਂ। ਇਹੋ ਜਿਹੇ ‘ਪਲੇਸਮੈਂਟ ਕੰਪੇਨ’ ਤਾਂ ਹਰ ਕਾਲਜ, ਹਰ ਯੂਨੀਵਰਸਿਟੀ ਹਰ ਸਾਲ ਵਿਚ ਕਈ ਕਈ ਵਾਰ ਪਹਿਲਾਂ ਹੀ ਕਰਦੇ ਆ ਰਹੇ ਸਨ।
ਵਿਰੋਧੀ ਧਿਰਾਂ ਤਾਂ ਇੱਥੇ ਤਕ ਦੋਸ਼ ਲਗਾ ਰਹੀਆਂ ਨੇ ਕਿ ਪਹਿਲਾਂ ਤੋਂ ਹੀ ਠੇਕੇ ’ਤੇ ਨੌਕਰੀ ਕਰ ਰਹੇ ਨੌਜਵਾਨਾਂ ਦੇ ਠੇਕੇ ਨਵਿਆ ਕੇ ਉਨ੍ਹਾਂ ਨੂੰ ਵੀ ਕਾਂਗਰਸ ਸਰਕਾਰ ਵੱਲੋਂ ਦਿੱਤੀਆਂ ਗਈਆਂ ਨੌਕਰੀਆਂ ਦੀ ਗਿਣਤੀ ਵਿਚ ਸ਼ਾਮਿਲ ਕਰ ਲਿਆ ਗਿਆ ਹੈ।
ਖ਼ੈਰ ਹੁਣ ਗੱਲ ਮੁੱਕਦੀ ਜਾਪਦੀ ਹੈ ਕਿਉਂਕਿ ਖ਼ੁਦ ਕੈਪਟਨ ਅਮਰਿੰਦਰ ਸਿੰਘ ਅਤੇ ਕਾਂਗਰਸ ਦੇ ਮੈਨੀਫ਼ੈਸਟੋ ਘਾੜੇ, ਵਿੱਤ ਮੰਤਰੀ ਸ: ਮਨਪ੍ਰੀਤ ਸਿੰਘ ਬਾਦਲ ਖੁਲ੍ਹ ਕੇ ਇਸ ਗੱਲ ’ਤੇ ਆ ਗਏ ਹਨ ਕਿ ਗੱਲ ਸਰਕਾਰੀ ਨੌਕਰੀਆਂ ਦੀ ਨਾ ਤਾਂ ਸੀ ਅਤੇ ਨਾ ਹੀ ਹੋ ਸਕਣੀ ਸੰਭਵ ਹੈ।
ਆਪਾਂ ਇਕ ਵਾਰ ਫ਼ਿਰ ਉਨ੍ਹਾਂ ਅੰਕੜਿਆਂ ’ਤੇ ਮੁੜ ਆਈਏ, ਜਿਨ੍ਹਾਂ ਦੀ ਗੱਲ ਆਪਾਂ ਪਹਿਲਾਂ ਕੀਤੀ ਸੀ। 1,61,522 ਨੌਕਰੀਆਂ, 3 ਲੱਖ ਤੋਂ 31 ਲੱਖ ਦੇ ਪੈਕੇਜ ’ਤੇ।
ਸਾਡਾ ਮੰਨਣਾ ਹੈ ਕਿ ਸਾਡਾ ਸੀ.ਐਮ. ਸੱਚਾ ਹੈ। ਸਾਡੇ ਸੀ.ਐਮ. ਨੂੰ ਕੀ ਲੋੜ ਹੈ ਕੋਈ ਗ਼ਲਤ ਗੱਲ ਕਹਿਣ ਦੀ ਜਾਂ ਫ਼ਿਰ ਗ਼ਲਤ ਅੰਕੜੇ ਪੇਸ਼ ਕਰਨ ਦੀ ਪਰ ਫ਼ਿਰ ਵੀ ਨਾ ਤਾਂ ਮੀਡੀਆ ਦਾ ਇਕ ਹਿੱਸਾ ਮੁੜਦੈ ਅਤੇ ਨਾ ਹੀ ਵਿਰੋਧੀ ਧਿਰਾਂ ਮੁੜਦੀਆਂ ਨੇ।
1,61,522 ਨੌਜਵਾਨਾਂ ਨੂੰ ਇਕ ਸਾਲ ਦੇ ਅੰਦਰ ਨੌਕਰੀਆਂ ਮੁਹੱਈਆ ਕਰਵਾ ਦੇਣੀਆਂ ਕੋਈ ਛੱਟੀ ਗੱਲ ਨਹੀਂ ਹੁੰਦੀ। ਇੰਨੀ ਵੱਡੀ ਪ੍ਰਾਪਤੀ ਦੇ ਬਾਵਜੂਦ ਭੰਡੀ ਪ੍ਰਚਾਰ ਹੋ ਰਿਹੈ, ਕੀਤਾ ਕੀ ਜਾਵੇ?
ਵੈਸੇ ਤਾਂ ਮੁੱਖ ਮੰਤਰੀ ਸਾਹਿਬ ਕੋਲ ‘ਸਲਾਹਕਾਰਾਂ’ ਦੀ ਕਮੀ ਨਹੀਂ ਅਤੇ ਪਤਾ ਮੈਨੂੰ ਇਹ ਵੀ ਹੈ ਕਿ ਮੁਫ਼ਤ ਦੀਆਂ ਸਲਾਹਾਂ ਦਾ ਕੋਈ ਮੁੱਲ ਨਹੀਂ ਹੁੰਦਾ ਪਰ ਇਕ ਵਿਚਾਰ ਐ ਬਈ ਕਿਉਂ ਨਹੀਂ ਮੁੱਖ ਮੰਤਰੀ ਇਹ ਕੰਮ ਕਰਦੇ ਕਿ ਨੌਕਰੀਆਂ ਪਾ ਕੇ ਗਦ ਗਦ ਹੋਏ ਇਹਨਾਂ 1,61,522 ਨੌਜਵਾਨਾਂ ਦੀ ਸੂਚੀ ਤਿਆਰ ਕਰਕੇ ਕਿਤਾਬਚੇ ਦੇ ਰੂਪ ਵਿਚ ਛਾਪ ਦਿੱਤੀ ਜਾਵੇ। ਇਸ ਦੇ ਨਾਲ ਹੀ ਜਾਂ ਫ਼ਿਰ ਇੰਜ ਨਾ ਕਰਕੇ ਇਹ ਜਾਣਕਾਰੀ ਇਕ ਵੈਬਸਾਈਟ ਬਣਾ ਕੇ ਜਾਂ ਫ਼ਿਰ ਪਹਿਲਾਂ ਹੀ ਮੌਜੂਦ ਸਰਕਾਰੀ ਸਾਈਟਾਂ ਵਿਚੋਂ ਕਿਸੇ ਇਕ ’ਤੇ ਪਾਈ ਜਾ ਸਕਦੀ ਹੈ।
ਇਹ ਸੂਚੀ ਹੇਠ ਲਿਖ਼ੇ ਅਨੁਸਾਰ ਹੋ ਸਕਦੀ ਹੈ।
ਸੀਰੀਅਲ ਨੰਬਰ
ਨੌਕਰੀ ਪਾਉਣ ਵਾਲੇ ਦਾ ਨਾਂਅ
ਨੌਕਰੀ ਪਾਉਣ ਵਾਲੇ ਦੇ ਪਿਤਾ ਦਾ ਨਾਂਅ
ਨੌਕਰੀ ਪਾਉਣ ਵਾਲੇ ਦਾ ਪਤਾ
ਨੌਜਵਾਨ ਕਿਹੜੇ ਅਦਾਰੇ ਤੋਂ ਪੜ੍ਹੇ
ਜਿਸ ਕੰਪਨੀ ਵਿਚ ਨੌਕਰੀ ਮਿਲੀ
ਕੰਪਨੀ ਨੇ ਕਿਸ ਸ਼ਹਿਰ ਵਿਚ ਨੌਕਰੀ ਦਿੱਤੀ
ਜਿਸ ਅਹੁਦੇ ’ਤੇ ਨੌਕਰੀ ਮਿਲੀ
ਕਿੰਨੇ ਪੈਕੇਜ ’ਤੇ ਨੌਕਰੀ ਲੱਗੀ
ਮੇਰਾ ਮੰਨਣਾ ਹੈ ਕਿ ਕੈਪਟਨ ਅਮਰਿੰਦਰ ਸਿੰਘ ਲਈ ਇਹ ਵੇਰਵਾ ਜਾਰੀ ਕਰਨਾ ਕੋਈ ਔਖ਼ਾ ਨਹੀਂ ਹੋਵੇਗਾ। ਆਖ਼ਰ ਇਹ ਕੋਈ ਜਾਇਦਾਦਾਂ ਦੇ ਬੇਨਾਮੀ ਸੌਦੇ ਥੋੜ੍ਹੀ ਹੋਏ ਨੇ, ਰੇਤੇ ਦੇ ਖ਼ਦਾਨਾਂ ਦੀ ਗੱਲ ਨਹੀਂ ਕਿ ਰਾਤੋ ਰਾਤ ਟਰੱਕ ਭਰ ਕੇ ਕਿਤੇ ਲਿਜਾਏ ਗਏ ਹੋਣਗੇ ਤੇ ਕਿਸੇ ਨੂੰ ਪਤਾ ਨਾ ਹੋਏਗਾ, ਇਹ ਕੋਈ ਜ਼ੁਬਾਨੀ ਕਲਾਮੀ ਨੌਕਰੀਆਂ ਤਾਂ ਨਹੀਂ ਮਿਲੀਆਂ, ਸਭ ਕੁਝ ‘ਬਲੈਕ ਐਂਡ ਵਾਈਟ’ ਵਿਚ ਹੈ। ਕੰਪਨੀਆਂ ਨੇ ਆਪਣੇ ਰਿਕਾਰਡ ਵਿਚ ਚਾੜ੍ਹਿਆ ਹੋਵੇਗਾ, ਨੌਜਵਾਨਾਂ ਨੂੰ ‘ਪਲੇਸਮੈਂਟ ਲੈਟਰ’ ਮਿਲੇ ਹੋਣਗੇ, ਨੌਜਵਾਨਾਂ ਦੇ ਕਾਲਜਾਂ, ਯੂਨੀਵਰਸਿਟੀਆਂ ਅਤੇ ਪਰਿਵਾਰਾਂ ਨੂੰ ਪਤਾ ਹੋਵੇਗਾ।
ਜਿਹੜੀਆਂ ਕੰਪਨੀਆਂ ਅਤੇ ਯੂਨੀਵਰਸਿਟੀਆਂ ਅਤੇ 3 ਤੋਂ 31 ਲੱਖ ਦੇ ਪੈਕੇਜ ਪ੍ਰਾਪਤ ਕਰਨ ਵਾਲੇ ਨੌਜਵਾਨਾਂ ਦੀ ਗੱਲ ਕੀਤੀ ਜਾ ਰਹੀ ਹੈ ਉਨ੍ਹਾਂ ਦੀ ਸਮਰੱਥਾ ਬਾਰੇ ਸਾਨੂੰ ਕੋਈ ਸ਼ੱਕ ਨਹੀਂ ਹੈ, ਉਹਨਾਂ ਦੇ ‘ਸਕਿੱਲਜ਼’ ਤੇ ਸਾਨੂੰ ਕੋਈ ਸ਼ੁਬਹ ਨਹੀਂ ਹੈ। ਕੈਪਟਨ ਅਮਰਿੰਦਰ ਸਿੰਘ ਅੱਜ ਕਹਿ ਦੇਣ ਤਾਂ ਕਲ੍ਹ ਤਾਈਂ ਸਾਰੀਆਂ ਸੂਚੀਆਂ ਤਿਆਰ ਕਰਕੇ ਮੁੱਖ ਮੰਤਰੀ ਦੇ ਹੱਥੋਂ ‘ਲੋਕ ਅਰਪਣ’ ਕਰਵਾਈਆਂ ਜਾ ਸਕਦੀਆਂ ਹਨ।
ਮੈਨੂੰ ਲੱਗਦੈ ਕਿ ਇੰਜ ਕਰਕੇ ਕੈਪਟਨ ਅਮਰਿੰਦਰ ਸਿੰਘ ਅਤੇ ਉਨ੍ਹਾਂ ਦੀ ਸਰਕਾਰ ਕਾਂਗਰਸ ਪਾਰਟੀ ਦਾ ਸਹਿਯੋਗ ਲੈ ਕੇ ਵਿਰੋਧੀਆਂ ਦੇ ਇਸ ਭੰਡੀ ਪ੍ਰਚਾਰ ਨੂੰ ਖੁੰਢਾ ਹੀ ਨਹੀਂ ਕਰ ਸਕਦੇ, ਉਨ੍ਹਾਂ ਨੂੰ ਝੂਠੇ ਪਾ ਸਕਦੇ ਹਨ, ਉਨ੍ਹਾਂ ਦੀ ਬੋਲਤੀ ਬੰਦ ਕਰ ਸਕਦੇ ਹਨ। ਸਰਕਾਰ ਵਿਰੋਧੀ ਪ੍ਰਚਾਰ ਦੀ ਸ਼ੁਰੂ ਹੋਈ ਇਸ ਲਹਿਰ ਨੂੰ ਪੁੱਠਾ ਗੇੜਾ ਦਿੱਤਾ ਜਾ ਸਕਦਾ ਹੈ। ਇਹ ਸਾਰਾ ਕੁਝ ‘ਪਬਲਿਕ ਡੋਮੇਨ’ ਵਿਚ ਹੈ। ਇਸ ਨੂੰ ਸੂਚੀਬੱਧ ਕਰਕੇ ਲੋਕਾਂ ਵਿਚ ਲੈ ਆਉਣ ਨਾਲ ਲੋਕਾਂ ਦੇ ਸ਼ੰਕੇ ਨਵਿਰਤ ਹੋਣਗੇ, ਸਰਕਾਰ ਦੀ ਅਤੇ ਖ਼ੁਦ ਕੈਪਟਨ ਅਮਰਿੰਦਰ ਸਿੰਘ ਦੀ ਭਰੋਸੇਯੋਗਤਾ ਵਿਚ ਹੋਰ ਵਾਧਾ ਹੋਵੇਗਾ।
ਲੈ ਬਈ ਵਿਰੋਧੀਉ, ਹੋ ਜਾਉ ਤਿਆਰ, ਜਦ 1,61,522 ਦੀ ਲਿਸਟ ਛਪੀ ਫ਼ਿਰ ਵੇਖਾਂਗੇ, ਕਿਵੇਂ ਬੋਲਦੇ ਉ।
ਐੱਚ.ਐੱਸ.ਬਾਵਾ
ਸੰਪਾਦਕ
ਯੈੱਸ ਪੰਜਾਬ ਡਾਟ ਕਾਮ
12 ਮਾਰਚ, 2018