ਅੱਜ-ਨਾਮਾ
ਛਿੜ ਗਈ ਕਿਤੇ ਜਦ ਬਾਤ ਬੰਗਾਲ ਵਾਲੀ,
ਕਰਤਾਰੇ ਕਿਹਾ ਨਹੀਂ ਬੰਤਿਆ ਪੁੱਛ ਭਾਈ।
ਬੀਬੀ ਮਮਤਾ ਬਈ ਸ਼ੇਰਨੀ ਬਣੀ ਫਿਰਦੀ,
ਕਹਿੰਦੀ ਸਾਨੂੰ ਨਹੀਂ ਸਮਝਿਓ ਤੁੱਛ ਭਾਈ।
ਮੋਦੀ-ਸ਼ਾਹ ਦੀ ਓਧਰ ਪਈ ਟੀਮ ਕਹਿੰਦੀ,
ਕਰਨੀ ਅਸੀਂ ਵੀ ਨੀਵੀਂ ਨਹੀਂ ਮੁੱਛ ਭਾਈ।
ਲੱਭਦੀ ਲਹਿਰ ਨਾ ਖੱਬੀ ਉਸ ਰਾਜ ਅੰਦਰ,
ਬਣ ਗਿਆ ਕਿੱਦਾਂ ਈ ਕੁਛ ਦਾ ਕੁਛ ਭਾਈ।
ਭਾਈਚਾਰਕ ਜਿਹੀ ਜਿੱਥੇ ਸੀ ਪੌਣ ਵਗਦੀ,
ਵਗੀ ਜਾਂਦੀ ਕੁਲਹਿਣੀ ਜਿਹੀ ਵਾਅ ਭਾਈ।
ਵਧਦਾ ਰਾਸ਼ਨ ਦਾ ਭਾਅ ਉਹ ਵਧੀ ਜਾਂਦਾ,
ਘਟ ਗਿਆ ਜਾਨ ਮਨੁੱਖੀ ਦਾ ਭਾਅ ਭਾਈ।
-ਤੀਸ ਮਾਰ ਖਾਂ
ਜੂਨ 13, 2019