ਯੈੱਸ ਪੰਜਾਬ
ਮੋਹਾਲੀ, 25 ਨਵੰਬਰ, 2022:
ਅਬੋਹਰ ਦੀ ਰਹਿਣ ਵਾਲੀ ਅਤੇ ਪੰਚਕੂਲਾ ਦੇ ਇਕ ਨਿੱਜੀ ਹਸਪਤਾਲ ਵਿੱਜ ਸੇਵਾ ਨਿਭਾਅ ਰਹੀ ਨਸੀਬ ਨਾਂਅ ਦੀ ਇਕ ਨਰਸ ਨੂੰ ਗ਼ਲਾ ਘੁੱਟ ਕੇ ਮਾਰ ਮੁਕਾਉਣ ਅਤੇ ਉਸਦੀ ਲਾਸ਼ ਨੂੰ ਸੋਹਾਣਾ ਦੇ ਇਕ ਪਾਰਕ ਨੇੜੇ ਟੋਭੇ ਵਿੱਚ ਸੁੱਟ ਕੇ ਪਰਿਵਾਰ ਸਮੇਤ ਫ਼ਰਾਰ ਹੋਏ ਬਰਖ਼ਾਸਤ ਏ.ਐਸ.ਆਈ. ਰਸ਼ਪ੍ਰੀਤ ਸਿੰਘ ਨੂੰ ਪੁਲਿਸ ਨੇ ਗ੍ਰਿਫ਼ਤਾਰ ਕਰ ਲਿਆ ਹੈ।
ਪੁਲਿਸ ਨੂੰ ਸੀ.ਸੀ.ਟੀ.ਵੀ.ਫੁੱਟੇਜ ਅਤੇ ਫ਼ੋਨ ਕਾਲ ਡਿਟੇਲਜ਼ ਤੋਂ ਇਹ ਲਗਪਗ ਸਪਸ਼ਟ ਹੋ ਚੁੱਕਾ ਸੀ ਕਿ ਨਸੀਬ ਦੇ ਕਤਲ ਨੂੰ ਰਸ਼ਪ੍ਰੀਤ ਨੇ ਹੀ ਅੰਜਾਮ ਦਿੱਤਾ ਹੋਵੇਗਾ ਅਤੇ ਉਸਦੀ ਪੁਸ਼ਟੀ ਇੱਥੋਂ ਵੀ ਹੋ ਰਹੀ ਸੀ ਕਿ ਵਾਰਦਾਤ ਤੋਂ ਬਾਅਦ ਰਸ਼ਪ੍ਰੀਤ ਸਿੰਘ ਆਪਣੇ ਘਰ ਤੋਂ ਪਰਿਵਾਰ ਸਮੇਤ ਫ਼ਰਾਰ ਹੋ ਗਿਆ ਸੀ।
ਪੋਸਟ ਮਾਰਟਮ ਵਿੱਚ ਇਹ ਸਾਹਮਣੇ ਆਇਆ ਸੀ ਕਿ ਨਸੀਬ ਦੇ ਗ਼ਲੇ ਦੀ ਹੱਡੀ ਟੁੱਟੀ ਹੋਈ ਸੀ ਅਤੇ ਪੁਲਿਸ ਨੂੰ ਇਹ ਵੀ ਸਬੂਤ ਮਿਲੇ ਸਨ ਕਿ ਸੋਹਾਣਾ ਸਥਿਤ ਘਰ ਵਿੱਚ ਹੀ ਨਸੀਬ ਨਾਲ ਹੋਈ ਤਕਰਾਰ ਮਗਰੋਂ ਉਸਨੇ ਕੁੜੀ ਦਾ ਗ਼ਲਾ ਘੁੱਟ ਕੇ ਉਸਦੀ ਲਾਸ਼ ਟਿਕਾਣੇ ਲਾ ਦਿੱਤੀ ਸੀ। ਇਹ ਘਟਨਾ ਵੀ ਸੀ.ਸੀ.ਟੀ.ਵੀ.ਵਿੱਚ ਕੈਦ ਹੋ ਗਈ ਸੀ ਜਿਸ ਵਿੱਚ ਇਕ ਸਕੂਟੀ ’ਤੇ ਲਾਸ਼ ਲੱਦ ਕੇ ਇਕ ਵਿਅਕਤੀ ਟੋਭੇ ਵਿੱਚ ਸੁੱਟਦਾ ਨਜ਼ਰ ਆਇਆ ਸੀ।
ਪੀ.ਜੀ.ਵਿੱਚ ਆਪਣੀ ਇਕ ਸਹੇਲੀ ਨਾਲ ਰਹਿ ਰਹੀ ਨਸੀਬ 14 ਨਵੰਬਰ ਨੂੰ ਕੰਮ ਲਈ ਨਿਕਲੀ ਸੀ ਪਰ ਮੁੜ ਘਰ ਨਹੀਂ ਪਰਤੀ ਸੀੇ ਜਿਸ ਮਗਰੋਂ ਇਹ ਮਾਮਲਾ ਪੁਲਿਸ ਦੇ ਧਿਆਨ ਵਿੱਚ ਲਿਆਂਦਾ ਗਿਆ।
ਕਿਹਾ ਜਾ ਰਿਹਾ ਹੈ ਕਿ ਰਸ਼ਪ੍ਰੀਤ ਅਤੇ ਨਸੀਬ ਦੇ ਪ੍ਰੇਮ ਸੰਬੰਧ ਸਨ ਅਤੇ ਦੋਵੇਂ ਆਪਸ ਵਿੱਚ ਮਿਲਦੇ ਸਨ ਹਾਲਾਂਕਿ ਰਸ਼ਪ੍ਰੀਤ ਸਿੰਘ ਵਿਆਹਿਆ ਹੋਇਆ ਸੀ। ਇਸੇ ਦੌਰਾਨ ਹੀ ਹੋਈ ਇਕ ਤਕਰਾਰ ਭਿਆਨਕ ਰੂਪ ਧਾਰ ਗਈ ਅਤੇ ਨਸੀਬ ਨੂੰ ਆਪਣੀ ਜਾਨ ਤੋਂ ਹੱਥ ਧੋਣਾ ਪਿਆ।
ਯੈੱਸ ਪੰਜਾਬ ਦੀਆਂ ਪੰਜਾਬੀ ਖ਼ਬਰਾਂ ਲਈ ਇੱਥੇ ਕਲਿੱਕ ਕਰਕੇ ਸਾਡਾ ਫ਼ੇਸਬੁੱਕ ਪੇਜ ਲਾਈਕ ਕਰੋ