ਯੈੱਸ ਪੰਜਾਬ
ਨਵੀਂ ਦਿੱਲੀ, 30 ਨਵੰਬਰ, 2020 –
ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਸ੍ਰ ਮਨਜਿੰਦਰ ਸਿੰਘ ਸਿਰਸਾ ਨੇ ਅੱਜ ਕਮੇਟੀ ਦੇ ਮੈਡੀਕਲ ਸਟੋਰ ਬਾਲਾ ਪ੍ਰੀਤਮ ਦਵਾਖਾਨੇ ਤੋਂ ਘਰ ਬੈਠਿਆਂ ਦਵਾਈ ਮੰਗਵਾਉਣ ਲਈ ਗੋਲਡਨ ਐਪ ਜਾਰੀ ਕੀਤੀ।
ਇਹ ਐਪ ਜਾਰੀ ਕਰਦਿਆਂ ਸ੍ਰੀ ਸਿਰਸਾ ਨੇ ਦੱਸਿਆ ਕਿ ਜਿਸ ਫੈਕਟਰੀ ਰੇਟ ‘ਤੇ ਬਾਲਾ ਪ੍ਰੀਤਮ ਦਵਾਖਾਨੇ ‘ਤੇ ਦਵਾਈ ਉਪਲਬਧ ਹੈ, ਉਸੇ ਰੇਟ ‘ਤੇ ਲੋਕ ਖਾਸ ਤੌਰ ‘ਤੇ ਬਜ਼ੁਰਗ ਆਪਣੇ ਘਰ ਬੈਠੇ ਦਵਾਈ ਮੰਗਵਾ ਸਕਦੇ ਹਨ ਤੇ ਦਿੱਲੀ ਗੁਰਦੁਆਰਾ ਕਮੇਟੀ ਦੇ ਵਾਲੰਟੀਅਰ ਘਰ ਬੈਠੇ ਲੋਕਾਂ ਨੂੰ ਦਵਾਈ ਸਪਲਾਈ ਕਰਨਗੇ।
ਉਹਨਾਂ ਦੱਸਿਆ ਕਿ ਦਵਾਈ ਮੰਗਵਾਉਣ ਵਾਸਤੇ ਲੋਕਾਂ ਨੂੰ ਆਪੋ ਆਪਣੇ ਮੋਬਾਈਲ ਫੋਨ ‘ਤੇ ਇਹ ਐਪ ਡਾਊਨਲੋਡ ਕਰਨ ਅਤੇ ਜਦੋਂ ਚੈਕ ਕਰਨਗੇ ਤਾਂ ਬਾਲਾ ਪ੍ਰੀਤਮ ਦਵਾਖਾਨੇ ਦੀ ਆਪਸ਼ਨ ਆ ਜਾਵੇਗੀ। ਇਥੇ ਵਿਅਕਤੀ ਆਪਣੇ ਡਾਕਟਰ ਦੀ ਪ੍ਰਿਸਕ੍ਰਿਪਸ਼ਨ ਪਰਚੀ ਦੀ ਫੋਟੋ ਖਿੱਚ ਕੇ ਪਾ ਦੇਵੇ ਅਤੇ ਆਪਣੀ ਜ਼ਰੂਰਤ ਦੱਸ ਦੇਵੇ, ਇਸ ਮਗਰੋਂ ਕਮੇਟੀ ਦੇ ਵਾਲੰਟੀਅਰ ਦਵਾਈ ਉਸਦੇ ਘਰ ਤੱਕ ਪਹੁੰਚਦੀ ਕਰਨਗੇ।
ਉਹਨਾਂ ਦੱਸਿਆ ਕਿ ਇਹ ਸਹੂਲਤ ਸ਼ੁਰੂ ਕਰਨ ਵਾਸਤੇ ਅਸੀਂ ਸੀਨੀਅਰ ਸਿਟੀਜ਼ਨਜ਼ ਐਪ ਨਾਲ ਟਾਈਅਪ ਕੀਤਾ ਹੈ ਤੇ ਸਾਡਾ ਮਕਸਦ ਲੋਕਾਂ ਖਾਸ ਤੌਰ ‘ਤੇ ਬਜ਼ੁਰਗਾਂ ਨੂੰ ਘਰ ਬੈਠਿਆਂ ਹੀ ਸਸਤੀਆਂ ਦਵਾਈਆਂ ਉਪਲਬਧ ਕਰਵਾਉਣਾ ਹੈ।
ਉਹਨਾਂ ਨੇ ਲੋਕਾਂ ਨੂੰ ਵੱਧ ਤੋਂ ਵੱਧ ਗਿਣਤੀ ਵਿਚ ਐਪ ਆਪੋ ਆਪਣੇ ਫੋਨਾਂ ਵਿਚ ਡਾਊਨਲੋਡ ਕਰਨ ਦੀ ਅਪੀਲ ਵੀ ਕੀਤੀ।
