ਯੈੱਸ ਪੰਜਾਬ
ਊਧਮ ਸਿੰਘ ਨਗਰ, ਉੱਤਰਾਖ਼ੰਡ, 28 ਮਾਰਚ, 2024:
ਉੱਤਰਾਖੰਡ ਵਿੱਚ ਸਥਿਤ ਇਤਹਾਸਕ ਸਥਾਨ ਗੁਰਦੁਆਰਾ ਗੁਰੂ ਨਾਨਕ ਮਤਾ ਦੀ ਕਾਰਸੇਵਾ ਵਿੱਚ ਲੱਗੇ ਬਾਬਾ ਤਰਸੇਮ ਦਾ ਵੀਰਵਾਰ ਸਵੇਰੇ ਉਨ੍ਹਾਂ ਦੇ ਡੇਰੇ ਵਿਖ਼ੇ ਦੋ ਹਥਿਆਰਬੰਦ ਹਮਲਾਵਰਾਂ ਨੇ ਗੋਲੀਆਂ ਮਾਰ ਕੇ ਕਤਲ ਕਰ ਦਿੱਤਾ।
ਡੇਰਾ ਕੰਪਲੈਕਸ ਦੇ ਅੰਦਰ ਹੀ ਸਵੇਰੇ ਸੈਰ ਲਈ ਨਿਕਲਦੇ ਬਾਬਾ ਤਰਸੇਮ ਸਿੰਘ ਸਵੇਰੇ ਲਗਪਗ 6.30 ਵਜੇ ਇਕੱਲੇ ਹੀ ਇੱਕ ਕੁਰਸੀ ’ਤੇ ਬੈਠੇ ਸਨ ਜਦ ਇੱਕ ਬਾਈਕ ’ਤੇ ਸਵਾਰ ਦੋ ਵਿਅਕਤੀ ਸਿੱਧੇ ਬਾਬਾ ਤਰਸੇਮ ਸਿੰਘ ਦੀ ਕੁਰਸੀ ਦੇ ਕੋਲ ਪਹੁੰਚੇ ਅਤੇ ਉਨ੍ਹਾਂ ’ਤੇ ਇੱਕ ਫ਼ਾਇਰ ਕੀਤਾ।
ਗੋਲੀ ਲੱਗਣ ’ਤੇ ਬਾਬਾ ਤਰਸੇਮ ਸਿੰਘ ਕੁਰਸੀ ਤੋਂ ਉੱਠੇ ਤਾਂ ਤੇਜ਼ੀ ਨਾਲ ਬਾਈਕ ਘੁਮਾਉਂਦੇ ਹੋਏ ਵਾਪਸੀ ਕਰਨ ਤੋਂ ਪਹਿਲਾਂ ਇੱਕ ਗੋਲੀ ਹੋਰ ਮਾਰੀ ਗਈ ਜਿਸ ਨਾਲ ਉਹ ਹੇਠਾਂ ਡਿੱਗ ਪਏ।
ਗੋਲੀਆਂ ਦੀ ਆਵਾਜ਼ ਸੁਣ ਕੇ ਉਨ੍ਹਾਂ ਦੇ ਸਮਰਥਕ ਆਏ ਪਰ ਤਦ ਤਕ ਬਾਈਕ ਸਵਾਰ ਫ਼ਰਾਰ ਹੋ ਚੁੱਕੇ ਸਨ। ਬਾਬਾ ਤਰਸੇਮ ਸਿੰਘ ਨੂੰ ਖਟੀਮਾ ਦੇ ਹਸਪਤਾਲ ਵਿਖ਼ੇ ਲਿਜਾਇਆ ਗਿਆ ਜਿੱਥੇ ਉਨ੍ਹਾਂ ਦੀ ਮੌਤ ਹੋ ਗਈ।
ਗੁਰਦੁਆਰਾ ਬੰਗਲਾ ਸਾਹਿਬ ਤੋਂ ਕਾਰਸੇਵਾ ਮੁਖੀ ਬਾਬਾ ਬਚਨ ਸਿੰਘ ਵੀ ਨਾਨਕਮਤਾ ਪਹੁੰਚ ਰਹੇ ਹਨ। ਬਾਬਾ ਤਰਸੇਮ ਸਿੰਘ ਦੀ ਮ੍ਰਿਤਕ ਦੇਹ ਪੋਸਟਮਾਰਟਮ ਲਈ ਰੱਖੀ ਗਈ ਹੈ।
ਅਭਿਨਵ ਕੁਮਾਰ ਡੀ.ਜੀ.ਪੀ.ਉੱਤਰਾਖੰਡ ਨੇ ਦੱਸਿਆ ਕਿ ਉੱਚ ਅਧਿਕਾਰੀ ਮੌਕੇ ’ਤੇ ਪੁੱਜੇ ਹਨ। ਉਨ੍ਹਾਂ ਕਿਹਾ ਕਿ ਇਸ ਮਾਮਲੇ ਵਿੱਚ ਇੱਕ ਐ.ਆਈ.ਟੀ.ਦਾ ਗਠਨ ਕੀਤਾ ਜਾ ਰਿਹਾ ਹੈ ਜਿਸ ਵਿੱਚ ਐਸ.ਟੀ.ਐਫ. ਦੇ ਲੋਕ ਵੀ ਸ਼ਾਮਲ ਹੋਣਗੇ।
ਉਨ੍ਹਾਂ ਕਿਹਾ ਕਿ ਸਥਾਨਕ ਲੋਕਾਂ ਦੀ ਮਦਦ ਨਾਲ ਇਸ ਕਤਲ ਪਿਛਲੀ ਸਾਜ਼ਿਸ਼ ਦਾ ਖੁਲਾਸਾ ਕੀਤਾ ਜਾਵੇਗਾ ਅਤੇ ਦੋਸ਼ੀਆਂ ਨੂੰ ਜਲਦ ਤੋਂ ਜਲਦ ਗ੍ਰਿਫ਼ਤਾਰ ਕੀਤਾ ਜਾਵੇਗਾ।