ਯੈੱਸ ਪੰਜਾਬ
ਮਾਨਸਾ, 24 ਮਈ, 2022:
2022 ਵਿਧਾਨ ਸਭਾ ਚੋਣਾਂ ਵਿੱਚ ਕਾਂਗਰਸ ਟਿਕਟ ’ਤੇ ਮਾਨਸਾ ਤੋਂ ਚੋਣ ਲੜੇ ਅਤੇ ਪੰਜਾਬ ਦੇ ਸਾਬਕਾ ਸਿਹਤ ਮੰਤਰੀ ਡਾ: ਵਿਜੇ ਸਿੰਗਲਾ ਤੋਂ 63 ਹਜ਼ਾਰ ਵੋਟਾਂ ਦੇ ਵੱਡੇ ਫ਼ਰਕ ਨਾਲ ਹਾਰੇ ਨਾਮਵਰ ਗਾਇਕ ਸਿੱਧੂ ਮੂਸੇਵਾਲਾ ਨੇ ਅੱਜ ਡਾ: ਸਿੰਗਲਾ ਦੀ ਬਰਖ਼ਾਸਤਗੀ ਅਤੇ ਉਨ੍ਹਾਂ ਦੀ ਗ੍ਰਿਫ਼ਤਾਰੀ ਤੋਂ ਬਾਅਦ ਸੋਸ਼ਲ ਮੀਡੀਆ ’ਤੇ ਚੁੱਟਕੀ ਲਈ ਹੈ।
ਇੰਸਟਾਗ੍ਰਾਮ ’ਤੇ ਇਕ ‘ਸਟੋਰੀ’ ਸਾਂਝੀ ਕਰਦਿਆਂ ਮੂਲ ਰੂਪ ਵਿੱਚ ਪੰਜਾਬੀ ਸੰਦੇਸ਼ ਅੰਗਰੇਜ਼ੀ ਵਿੱਚ ਲਿਖ਼ ਕੇ ਸਾਂਝਾ ਕੀਤਾ ਹੈ।
ਇਸ ਵਿੱਚ ਮੂਸੇਵਾਲਾ ਨੇ ਜਿੱਥੇ ਨਾਲ ਹੀ ਜਿੱਤ ਤੋਂ ਬਾਅਦ ਡਾ:ਵਿਜੇ ਸਿੰਗਲਾ ਦਾ ਉਹ ਵਾਇਰਲ ਵੀਡੀਓ ਸ਼ਾਟ ਵੀ ਸਾਂਝਾ ਕੀਤਾ ਹੈ ਜਿਸ ਵਿੱਚ ਉਹ ਆਪਣੇ ਸਮਰਥਕਾਂ ਨਾਲ ਘਿਰੇ ਇਕ ਵਾਹਨ ਦੀ ਛੱਤ ’ਤੇ ਚੜ੍ਹ ਕੇ ਸਿੱਧੂ ਮੂਸੇਵਾਲਾ ਦੀ ਨਕਲ ਦੇ ਤੌਰ ’ਤੇ ਪੱਟਾਂ ’ਤੇ ਹੱਥ ਮਾਰਦੇ ਨਜ਼ਰ ਆਉਂਦੇ ਹਨ। ਇਸ ਸ਼ਾਟ ਦੇ ਪਿੱਛੇ ਸਿੱਧੂ ਮੂਸੇਵਾਲਾ ਦੇ ਮਸ਼ਹੂਰ ਗ਼ੀਤ ‘ਸਕੇਪ ਗੋਟ’ ਦੀਆਂ ਸਤਰਾਂ ਲਾਈਆਂ ਗਈਆਂ ਹਨ।
ਇਸ ਦੇ ਨਾਲ ਹੀ ਜਿਹੜਾ ਸਟੇਟਸ ਸਾਂਝਾ ਕੀਤਾ ਗਿਆ ਹੈ, ਉਸ ਵਿੱਚ ਸਿੱਧੂ ਮੂਸੇਵਾਲਾ ਨੇ ਲਿਖ਼ਿਆ ਹੈ:
ਬਾਬਾ ਕਹਿੰਦਾ ਸੀ.. .. .. ..
ਦੇਖ਼ੀ ਚੱਲ ਮਰਦਾਨਿਆ ਰੰਗ ਕਰਤਾਰ ਦੇ
ਆਪੇ ਮਰ ਜਾਂਦੇ ਜਿਹੜੇ ਦੂਜਿਆਂ ਨੂੰ ਮਾਰਦੇ
ਜ਼ਿਕਰਯੋਗ ਹੈ ਕਿ ਸਿੰਗਲਾ ਦੀ ਜਿੱਤ ਤੋਂ ਬਾਅਦ 5911 ਵਜੋਂ ਜਾਣੇ ਜਾਂਦੇ ਮੂਸੇਵਾਲਾ ਨੂੰ ਚਿੜ੍ਹਾਉਣ ਲਈ ਜੇਤੂ ਜਲੂਸ ਦੌਰਾਨ 5911 ਟਰੈਕਟਰ ਨੂੂੰ ਪੁੱਠੇ ਬੰਨੇ ਘੜੀਸਦੇ ਹੋਏ ਖੁਸ਼ੀ ਦਾ ਇਜ਼ਹਾਰ ਕੀਤਾ ਗਿਆ ਸੀ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ
