ਯੈੱਸ ਪੰਜਾਬ
ਜਲੰਧਰ, 17 ਜਨਵਰੀ, 2021:
ਭਾਜਪਾ ਦੀ ਸੰਸਦ ਮੈਂਬਰ ਅਤੇ ਬਾਲੀਵੁੱਡ ਅਦਾਕਾਰਾ ਹੇਮਾ ਮਾਲਿਨੀ ਵੱਲੋਂ ਬੀਤੇ ਦਿਨੀਂ ਸੰਘਰਸ਼ਸ਼ੀਲ ਕਿਸਾਨਾਂ ਬਾਰੇ ਕੀਤੀ ਟਿੱਪਣੀ ਦੇ ਜਵਾਬ ਵਿੱਚ ਪੰਜਾਬ ਦੀ ਇਕ ਕਿਸਾਨ ਜੱਥੇਬੰਦੀ ਨੇ ਬੀਬੀ ਹੇਮਾ ਮਾਲਨੀ ਨੂੰ ਇਕ ਚਿੱਠੀ ਲਿਖ਼ੀ ਹੈ।
ਯਾਦ ਰਹੇ ਕਿ ਹੇਮਾ ਮਾਲਿਨੀ ਨੇ ਪਿਛਲੇ ਡੇਢ ਮਹੀਨੇ ਤੋਂ ਵੀ ਵੱਧ ਸਮੇਂ ਤੋਂ ਹੱਡ ਚੀਰਵੀਂ ਠੰਢ ਵਿੱਚ ਖ਼ੇਤੀਬਾੜੀ ਕਾਨੂੰਨਾਂ ਨੂੰ ਰੱਦ ਕਰਵਾਉਣ ਦੀ ਮੰਗ ਨੂੰ ਲੈ ਕੇ ਦਿੱਲੀ ਦੇ ਬਾਰਡਰਾਂ ’ਤੇ ਧਰਨਾ ਦੇ ਰਹੇ ਕਿਸਾਨਾਂ ’ਤੇ ਟਿੱਪਣੀ ਕਰਦਿਆਂ ਕਿਹਾ ਸੀ ਕਿ ਕਿਸਾਨਾਂ ਨੂੰ ਤਾਂ ਇਹ ਵੀ ਨਹੀਂ ਪਤਾ ਕਿ ਉਨ੍ਹਾਂ ਦੀਆਂ ਮੰਗਾਂ ਕੀ ਹਨ।
ਕੰਢੀ ਕਿਸਾਨ ਸੰਘਰਸ਼ ਕਮੇਟੀ ਦੇ ਅਹੁਦੇਦਾਰਾਂ ਨੇ ਹੇਮਾ ਮਾਲਿਨੀ ਨੂੰ ਪੰਜਾਬੀਆਂ ਦੀ ਭਾਬੀ ਦੱਸਦਿਆਂ ਉਨ੍ਹਾਂ ਨੂੰ ਪੰਜਾਬ ਆ ਕੇ ਕਿਸਾਨਾਂ ਨੂੰ ਸਮਝਾਉਣ ਦਾ ਸੱਦਾ ਦਿੰਦਿਆਂ ਉਨ੍ਹਾਂ ਦੇ ਆਉਣ ਜਾਣ ਅਤੇ ‘ਫ਼ਾਈਵ ਸਟਾਰ’ ਹੋਟਲ ਵਿੱਚ ਰਹਿਣ ਦਾ ਖ਼ਰਚਾ ਚੁੱਕਣ ਦੀ ਵੀ ਪੇਸ਼ਕਸ਼ ਕੀਤੀ ਹੈ।
ਕੰਢੀ ਕਿਸਾਨ ਸੰਘਰਸ਼ ਕਮੇਟੀ ਦੇ ਅਹੁਦੇਦਾਰਾਂ, ਸ: ਭੁਪਿੰਦਰ ਸਿੰਘ ਘੁੰਮਣ ਚੇਅਰਮੈਨ, ਸ: ਅਵਤਾਰ ਸਿੰਘ ਭੀਖੋਵਾਲ ਸਰਪ੍ਰਸਤ ਅਤੇ ਸ: ਜਰਨੈਲ ਸਿੰਘ ਗੜ੍ਹਦੀਵਾਲ ਉਪ-ਚੇਅਰਮੈਨ ਨੇ ਹੇਮਾ ਮਾਲਿਨੀ ਨੂੰ ਕਿਹਾ ਹੈ ਕਿ ਉਹ ਖ਼ੁਦ ਪੰਜਾਬ ਆ ਕੇ ਉਹਨਾਂ ਨੂੰ ਸਮਝਾ ਕੇ ਜਾਣ ਤਾਂ ਜੋ ਸਾਡੇ ਲੋਕ ਦਿੱਲੀ ਦੇ ਬਾਰਡਰਾਂ’ਤੇ ਬੈਠੇ ਅਜਾਈਂ ਜਾਨਾਂ ਨਾ ਗਵਾਉਣ।
ਚਿੱਠੀ ਹੇਠ ਲਿਖ਼ੇ ਅਨੁਸਾਰ ਹੈ:
ਸਤਿਕਾਰਯੋਗ ਸ੍ਰੀਮਤੀ ਹੇਮਾ ਮਾਲਨੀ ਜੀ
ਮੈਂਬਰ ਪਾਰਲੀਮੈਂਟ ਮਥਰਾ ( ਉਤਰ ਪ੍ਰਦੇਸ਼ )
ਫਲੈਟ ਨੰਬਰ 702 ਕਵੇਰੀ ਆਪਰਟਮੈਂਟ
ਡਾ: ਬੀਡੀ ਮਾਰਗ ਨਵੀਂ ਦਿੱਲੀ-110001
ਵਿਸ਼ਾ : ਪੰਜਾਬ ਆ ਕੇ ਕਿਸਾਨਾਂ ਮੰਗਾਂ ਦੱਸਣ ਲਈ ਆਉਣ ਬਾਰੇ ਹਵਾਈ ਟਿਕਟਾਂ ਤੇ ਪੰਜ ਤਾਰਾ ਹੋਟਲ ਦਾ ਪ੍ਰਬੰਧ ਕਰਨ ਸਬੰਧੀ
ਆਪ ਜੀ ਨੂੰ ਇਹ ਜਾਣ ਕੇ ਅਤਿਅੰਤ ਖੁਸ਼ੀ ਹੋਵੇਗੀ ਕਿ ਧਰਮਿੰਦਰ ਦਿਉਲ ਪਰਿਵਾਰ ਦੀ 70 ਵਿਆਂ ਵਿੱਚ ਸਾਰਾ ਪੰਜਾਬ ਬੜੀ ਇੱਜ਼ਤਮਾਣ ਕਰਦਾ ਸੀ।ਸਾਰਾ ਪੰਜਾਬ ਧਰਮਿੰਦਰ ਨੂੰ ਭਾਅ ਜੀ ਕਹਿ ਬਲਾਉੰਦਾ ਆ ਰਿਹਾ ਹੈ। ਇਸ ਰਿਸ਼ਤੇ ਨਾਲ ਤੁਹਾਨੂੰ ਵੀ ਹਰ ਪੰਜਾਬੀ ਭਾਬੀ ਦੇ ਤੌਰ ‘ਤੇ ਦੇਖਦਾ ਆ ਰਿਹਾ ਹੈ। ਪੰਜਾਬੀ ਸਭਿਆਚਾਰ ਦੇ ਵਿੱਚ ਭਾਬੀ ਨੂੰ ਪਰਿਵਾਰ ਦੇ ਦੂਜੇ ਮੈਂਬਰ ਮਾਂ ਵਰਗਾ ਸਤਿਕਾਰ ਦਿੰੰਦੇ ਹਨ ਤੇ ਇਹ ਰਵਾਇਤ ਅੱਜ ਵੀ ਕਾਇਮ ਹੈ।ਇਸ ਦੇ ਨਾਲ ਹੀ ਤੁਹਾਡੇ ਵੱਲੋਂ ਪਾਰਲੀਮਾਨੀ ਹਲਕੇ ਗੁਰਦਾਸਪੁਰ ਤੋਂ ਭਾਜਪਾ ਦੇ ਉਮੀਦਵਾਰ ਸਵਰਗੀ ਵਿਨੋਦ ਖੰਨਾ ਦੀ ਚੋਣ ਪ੍ਰਚਾਰ ਦੌਰਾਨ ਮੁਕੇਰੀਆਂ ਵਿੱਚ ਰੈਲੀ ਨੂੰ ਸੰਬੋਧਨ ਕਰਦਿਆਂ ਕਹੇ ਗਏ ਇਹ ਬੋਲ ਕਿ “ਮੈਂ ਪੰਜਾਬ ਦੀ ਨੂੰਹ ਹਾਂ” ਅਜੇ ਤਕ ਵੀ ਪੰਜਾਬ ਵਾਸੀਆਂ ਦੇ ਕੰਨਾਂ ਵਿਚ ਗੂੰਜ ਰਹੇ ਹਨ ।
ਦਿਉਲ ਪਰਿਵਾਰ ਹੀ ਸ਼ਾਇਦ ਅਜਿਹਾ ਪਹਿਲਾਂ ਫਿਲਮੀ ਦੁਨੀਆਂ ਦਾ ਪਹਿਲਾਂ ਪਰਿਵਾਰ ਹੋਵੇਗਾ ਜਿਸ ਦੇ ਤਿੰਨ ਮੈਂਬਰ ਭਾਜਪਾ ਵੱਲੋਂ ਸੰਸਦ ਵਿੱਚ ਗਏ ਹਨ ਤੇ ਦੋ ਤਾਂ ਅਜ ਤਕ ਭਾਜਪਾ ਵੱਲੋਂ ਸੰਸਦ ਵਿੱਚ ਮੈਂਬਰ ਹਨ।
ਪੰਜਾਬ ਦੇ ਲੋਕਾਂ ਨਾਲ ਤੁਹਾਡੇ ਨਾਲ ਦੌਹਰੇ ਜ਼ਜ਼ਬਾਤੀ ਰਿਸ਼ਤਾ ਹੋਣ ਕਾਰਨ ਬਹੁਤ ਦੁੱਖ ਪਹੁੰਚਾ ਜਦੋਂ ਤੁਸੀਂ ਇਹ ਕਹਿ ਦਿੱਤਾ ਕਿ ਕਿਸਾਨਾਂ ਨੂੰ ਪਤਾ ਹੀ ਨਹੀਂ ਹੈ ਕਿ ਉਨ੍ਹਾਂ ਨੇ ਮੰਗਾਂ ਕੀ ਹਨ ਤੇ ਉਹ ਕਿਸੇ ਰਾਜਨੀਤਿਕ ਪਾਰਟੀਆਂ ਦੇ ਬਹਿਕਾਵੇ ਵਿੱਚ ਆਏ ਹੋਏ ਹਨ।ਇਸ ਗੱਲ ਨੂੰ ਲੈਕੇ ਪੰਜਾਬੀਆਂ ਦੇ ਮਨ ਵਿੱਚ ਗੁੱੱਸਾ ਵੀ ਹੈ ਤੇ ਰੋਸ ਵੀ।ਕਿਸਾਨੀ ਅੰਦੋਲਨ ਵਿੱਚ 100 ਤੋਂ ਵੱਧ ਮੌਤਾਂ ਹੋ ਚੁੱਕੀਆਂ ਹਨ ਤੇ ਸ਼ਾਂਤਮਈ ਰਹਿ ਕੇ ਲੜੇ ਜਾ ਰਹੇ ਅੰਦੋਲਨ ਨੂੰ ਦੁਨੀਆਂ ਭਰ ਦੀਆਂ ਸਰਕਾਰਾਂ ਤੇ ਮੀਡੀਆ ਦੇਖ ਰਿਹਾ ਹੈ।
ਅਸੀਂ ਕੰਢੀ ਕਿਸਾਨ ਸੰਘਰਸ਼ ਕਮੇਟੀ ਨੇ ਫੈਸਲਾ ਕੀਤਾ ਹੈ ਕਿਸਾਨਾਂ ਦੀਆਂ ਮੰਗਾਂ ਤੇ ਲੋੜਾਂ ਸਬੰਧੀ ਆਪ ਪੰਜਾਬ ਆ ਕੇ ਕਿਸਾਨਾਂ ਨੂੰ ਸਮਝਾਉਣ ਦਾ ਯਤਨ ਕਰੋ। ਇਸ ਕਰਕੇ ਤੁਹਾਡੇ ਲਈ ਹਵਾਈ ਟਿਕਟ ਲੈਕੇ ਦੇਣ ਦਾ ਅਤੇ ਤੁਹਾਡੇ ਲਗਜ਼ਰੀ ਜੀਵਨ ਮੁਤਾਬਿਕ ਹੀ ਪੰਜ ਤਾਰਾ ਹੋਟਲ ਵਿੱਚ ਤੁਹਾਡੇ ਇੱਕ ਹਫਤਾ ਰੁਕਣ ਦਾ ਪ੍ਰਬੰਧ ਕਰਨ ਦਾ ਫੈਸਲਾ ਕੀਤਾ ਹੈ।ਇਸ ਦਾ ਸਾਰਾ ਖ਼ਰਚਾ ਪਿੰਡਾਂ ਦੇ ਮਜ਼ਦੂਰ ਤੇ ਕਿਸਾਨ ਚੁੱਕਣਗੇ ਜਿਹੜੇ ਮਿੱਟੀ ਨਾਲ ਮਿੱਟੀ ਹੋ ਕੇ ਅੰਨ ਉਗਾੳੰਦੇ ਹਨ ਤੇ ਤੁਹਾਡੇ ਵਰਗੇ ਲੋਕ ਉਸ ਨੂੰ ਸੋਨੇ ਦੀਆਂ ਥਾਲੀਆਂ ਵਿੱਚ ਖਾਂਦੇ ਆ ਰਹੇ ਹਨ ਪਰ ਕਿਸਾਨਾਂ ਨੂੰ ਉਨ੍ਹਾਂ ਵੱਲੋਂ ਉਗਾਂਏ ਅਨਾਜ ਦਾ 72 ਸਾਲਾਂ ਬਾਅਦ ਵੀ ਸਹੀ ਮੁੱਲ ਨਹੀਂ ਮਿਲ ਰਿਹਾ।ਪੰਜਾਬ ਦੇ ਲੋਕਾਂ ਦ ਸਮਝ ਮੁਤਾਬਿਕ ਕੇਂਦਰ ਦੀ ਮੋਦੀ ਸਰਕਾਰ ਜਿਹੜੇ ਤਿੰਨ ਨਵੇਂ ਖੇਤੀ ਕਾਨੂੰਨ ਲੈਕੇ ਆਈ ਹੈ ਉਸ ਨਾਲ ਪੰਜਾਬ ਦਾ ਕਿਸਾਨ ਹੀ ਸਗੋਂ ਮਜ਼ਦੂਰ ਤੇ ਹਰ ਵਰਗ ਪ੍ਰਭਾਵਿਤ ਹੋਵੇਗਾ ਤੇ ਪੰਜਾਬ ਫਿਰ ਪੰਜਾਬ ਨਹੀਂ ਰਹੇਗਾ।ਖੇਤੀ ਕਾਨੂੰੰਨਾਂ ਦੀ ਆੜ ਵਿੱਚ ਪੰਜਾਬ ,ਪੰਜਾਬੀ ਤੇ ਪੰਜਾਬੀਆਂ ਨੂੰ ਤਬਾਹ ਕਰਨ ਦੀ ਜਿਹੜੀ ਇਬਾਰਤ ਮੋਦੀ ਸਰਕਾਰ ਨੇ ਲਿਖੀ ਹੈ ਉਹ ਤਾਂ ਪੰਜਾਬ ਦੇ ਬੱਚੇ-ਬੱਚੇ ਨੂੰ ਸਮਝ ਆ ਗਈ ਹੈ ਪਰ ਤੁਹਾਡਾ ਇਸ ਬਾਰੇ ਨਜ਼ਰੀਆ ਅਲੱਗ ਹੈ।ਅਸੀਂ ਸਮੂਹ ਪੰਜਾਬੀਆਂ ਵੱਲੋਂ ਤੁਹਾਨੂੰ ਇਹ ਅਪੀਲ ਕਰਦੇ ਹਾਂ ਕਿ ਤੁਸੀਂ ਖ਼ੁਦ ਪੰਜਾਬ ਆ ਕੇ ਸਾਨੂੰ ਸਾਰਿਆਂ ਨੂੰ ਸਮਝਾ ਕੇ ਜਾਉ ਤਾਂ ਜੋ ਸਾਡੇ ਲੋਕ ਦਿੱਲੀ ਦੇ ਬਾਰਡਰਾਂ ‘ਤੇ ਬੈਠੇ ਅਜਾਈ ਜਾਨਾਂ ਨਾ ਗਵਾਉਣ।
ਪੂਰੇ ਵਿਸ਼ਵਾਸ਼ ਨਾਲ ਉਡੀਕਵਾਨ
ਭੁਪਿੰਦਰ ਸਿੰਘ ਘੁੰਮਣ ਚੇਅਰਮੈਨ,
ਅਵਤਾਰ ਸਿੰਘ ਭੀਖੋਵਾਲ ਸਰਪ੍ਰਸਤ ਅਤੇ
ਜਰਨੈਲ ਸਿੰਘ ਗੜ੍ਹਦੀਵਾਲ ਉਪ ਚੇਅਰਮੈਨ