ਯੈੱਸ ਪੰਜਾਬ
ਨਵੀਂ ਦਿੱਲੀ, 24 ਜਨਵਰੀ, 2021:
ਕਿਸਾਨ ਸੰਘਰਸ਼ ‘ਚ ਸਰਗਰਮ ਸਿੱਖ ਪ੍ਰਚਾਰਕ, ਪੰਥਕ ਲੇਖਕ ਅਤੇ ਸਿੱਖ ਯੂਥ ਫ਼ੈਡਰੇਸ਼ਨ ਭਿੰਡਰਾਂਵਾਲਾ ਦੇ ਸੀਨੀਅਰ ਮੀਤ ਪ੍ਰਧਾਨ ਭਾਈ ਰਣਜੀਤ ਸਿੰਘ ਦਮਦਮੀ ਟਕਸਾਲ ਨੂੰ ਭਾਰਤ ਦੀ ਨੈਸ਼ਨਲ ਇਨਵੈਸਟੀਗੇਸ਼ਨ ਏਜੰਸੀ (ਐੱਨ.ਆਈ.ਏ.) ਨੇ ਸੰਮਨ ਭੇਜ ਕੇ ਮੁੱਖ ਦਫ਼ਤਰ ਦਿੱਲੀ ‘ਚ ਸਵੇਰੇ 11 ਵਜੇ ਤੋਂ ਸ਼ਾਮ ਸਾਢੇ ਸੱਤ ਵਜੇ ਤੱਕ ਲੰਬੀ ਪੁੱਛਗਿੱਛ ਕੀਤੀ।
ਭਾਈ ਰਣਜੀਤ ਸਿੰਘ ਨੇ ਦੱਸਿਆ ਕਿ ਐੱਨ.ਆਈ.ਏ. ਦੇ ਅਫ਼ਸਰਾਂ ਨੇ ਵਿਦੇਸ਼ਾਂ ਤੋਂ ਆਉਂਦੇ ਫੋਨਾਂ ਬਾਰੇ ਪੁੱਛਿਆ ਅਤੇ ਕਿਸ ਨਾਲ ਕੀ-ਕੀ ਸਬੰਧ ਹਨ ਤੇ ਉਹ ਸੰਪਰਕ ‘ਚ ਕਿਵੇਂ ਆਏ ਆਦਿਕ ਸਵਾਲ ਕੀਤੇ ਤੇ ਫੋਨ ਦੀ ਪੰਜ ਘੰਟੇ ਛਾਣਬੀਨ ਕੀਤੀ ਤੇ ਉਸ ‘ਚੋਂ ਨੰਬਰ ਅਤੇ ਡਾਟਾ ਕਾਪੀ ਕੀਤਾ।
ਉਹਨਾਂ ਦੱਸਿਆ ਕਿ ਫ਼ੈਡਰੇਸ਼ਨ ਵੱਲੋਂ ਜੋ ਗੁਰਮਤਿ ਸਮਾਗਮ, ਸ਼ਹੀਦੀ ਸਮਾਗਮ, ਅੰਮ੍ਰਿਤ ਸੰਚਾਰ, ਦਸਤਾਰ ਅਤੇ ਗਤਕਾ ਸਿਖਲਾਈ ਕੈਂਪ, ਗੁਰਬਾਣੀ ਸੰਥਿਆ, ਮਾਰਚ, ਪ੍ਰਦਰਸ਼ਨ, ਧਰਨੇ, ਸੈਮੀਨਾਰ, ਲੋੜਵੰਦਾਂ ਅਤੇ ਸ਼ਹੀਦਾਂ ਦੇ ਪਰਿਵਾਰਾਂ ਦੀ ਸਹਾਇਤਾ, ਕਿਤਾਬਾਂ ਲਿਖਣ ਤੇ ਛਾਪਣ ਅਤੇ ਨਿਸ਼ਕਾਮ ਸਾਹਿਤ ਵੰਡਣ ਅਤੇ ਪੰਥ ਅਤੇ ਪੰਜਾਬ ਦੀ ਅਜ਼ਾਦੀ ਲਈ ਜੋ ਕਾਰਜ ਕੀਤੇ ਜਾਂਦੇ ਹਨ ਉਹਨਾਂ ਲਈ ਪੈਸਾ ਕਿੱਥੋਂ ਆਉਣ ਤੇ ਕਿੰਨਾ ਖਰਚੇ ਜਾਣ ਬਾਰੇ ਸਵਾਲ ਪੁੱਛੇ।
ਫ਼ੈਡਰੇਸ਼ਨ ਆਗੂ ਨੇ ਦੱਸਿਆ ਕਿ ਮੇਰੇ ਪਰਿਵਾਰ ਅਤੇ ਜਥੇਬੰਦੀ ਦੇ ਮੈਂਬਰਾਂ ਦੀ ਜਾਣਕਾਰੀ ਬਾਰੇ ਵੀ ਉਹਨਾਂ ਨੇ ਲਿਖਿਆ ਅਤੇ ਗੱਲਬਾਤ ਨੂੰ ਰਿਕਾਰਡ ਕੀਤਾ ਅਤੇ ਮੇਰਾ ਆਧਾਰ ਕਾਰਡ, ਲਾਇਸੰਸ, ਪੈਨ ਕਾਰਡ, ਬੈਂਕ ਖਾਤਾ ਆਦਿਕ ਵੀ ਲਿਆ।
ਭਾਈ ਰਣਜੀਤ ਸਿੰਘ ਨੇ ਕਿਹਾ ਕਿ ਮੈਂ ਅੱਜ-ਤਕ ਕੋਈ ਵੀ ਗੈਰ-ਕਾਨੂੰਨੀ, ਗੈਰ-ਸੰਵਿਧਾਨਕ ਅਤੇ ਹਿੰਸਕ ਸਰਗਰਮੀ ਨਹੀਂ ਕੀਤੀ ਪਰ ਹੁਣ ਖੇਤੀ ਕਾਲ਼ੇ ਕਾਨੂੰਨਾਂ ਖ਼ਿਲਾਫ਼ ਕਿਸਾਨ ਸੰਘਰਸ਼ ‘ਚ ਸਰਗਰਮ ਹੋਣ ਕਰਕੇ ਮੈਨੂੰ ਮੋਦੀ ਸਰਕਾਰ ਦੇ ਇਸ਼ਾਰਿਆਂ ‘ਤੇ ਜਾਣ-ਬੁੱਝ ਕੇ ਖੱਜਲ-ਖੁਆਰ ਅਤੇ ਡਰਾਉਣ, ਧਮਕਾਉਣ ਤੇ ਝੁਕਾਉਣ ਦੇ ਯਤਨ ਕੀਤੇ ਜਾ ਰਹੇ ਹਨ ਪਰ ਅਸੀਂ ਜਮਹੂਰੀਅਤ ਅਤੇ ਸ਼ਾਂਤਮਈ ਢੰਗ ਨਾਲ ਆਪਣੇ ਹੱਕਾਂ ਦੀ ਆਵਾਜ਼ ਬੁਲੰਦ ਕਰਦੇ ਰਹਾਂਗੇ।
