- Advertisement -
ਅੱਜ-ਨਾਮਾ
ਚੋਣ ਨਜ਼ਦੀਕ ਸਿਆਸਤ ਫਿਰ ਤੇਜ਼ ਹੋਈ,
ਹੋਈ ਫਿਰ ਦੂਸ਼ਣਾਂ ਦੀ ਬਾਰਸ਼ ਤੇਜ਼ ਬੇਲੀ।
ਚੁਣ ਕੇ ਭੱਦੇ ਤੋਂ ਭੱਦਾ ਕਈ ਦੋਸ਼ ਲਾਉਂਦੇ,
ਵਿਗੜਦੇ ਸ਼ਬਦਾਂ ਦਾ ਨਹੀਂ ਪਰਹੇਜ਼ ਬੇਲੀ।
ਬੋਲਦਾ ਪਹਿਲਾ ਤਾਂ ਪਬਲਿਕ ਹੈਰਾਨ ਹੋਵੇ,
ਕਰ ਗਿਆ ਗੱਲ ਹੈ ਹੈਰਤ-ਅੰਗੇਜ਼ ਬੇਲੀ।
ਦੂਜਾ ਬੋਲੇ ਤਾਂ ਖੱਫਣ ਜਿਹਾ ਪਾੜ ਸੁੱਟਦਾ,
ਕਰਦਾ ਈ ਗੱਲ ਉਹ ਸਨਸਨੀਖੇਜ਼ ਬੇਲੀ।
ਬੋਲਦੇ ਵਕਤ ਕੁਝ ਜਿਹੜਾ ਸੰਕੋਚ ਕਰਦਾ,
ਉਹਦੀ ਤਕਰੀਰ ਵੀ ਜਾਪਦੀ ਖੁਸ਼ਕ ਬੇਲੀ।
ਜਿਉਂ-ਜਿਉਂ ਅੱਗੇ ਲੜਾਈ ਹੈ ਵਧੀ ਜਾਣੀ,
ਚਿੱਕੜਬਾਜ਼ੀ ਦਾ ਵਧੀ ਜਾਊ ਮੁਸ਼ਕ ਬੇਲੀ।
-ਤੀਸ ਮਾਰ ਖਾਂ
ਫਰਵਰੀ 8, 2024
- Advertisement -