ਯੈੱਸ ਪੰਜਾਬ
ਮੁੰਬਈ, 29 ਮਾਰਚ, 2021:
ਬਾਲੀਵੁੱਡ ਐਕਟਰ ਅਜੇ ਦੇਵਗਨ ਦੇ ਦੱਸੇ ਜਾ ਰਹੇ ਦਿੱਲੀ ਦੇ ਇਕ ਝਗੜੇ ਵਾਲੇ ਵਾਇਰਲ ਵੀਡੀਓ ਦੀ ਸੱਚਾਈ ਸਾਹਮਣੇ ਆਈ ਹੈ।
ਜ਼ਿਕਰਯੋਗ ਹੈ ਕਿ ਦਿੱਲੀ ਦੇ ਇਕ ‘ਪੱਬ’ ਦੇ ਬਾਹਰ ਕਾਰ ਪਾਰਕਿੰਗ ਨੂੰ ਲੈ ਕੇ ਹੋਏ ਇਕ ਝਗੜੇ ਵਿੱਚ ਕੁਝ ਵਿਅਕਤੀਆਂ ਵੱਲੋਂ ਚਿੱਟੀ ਕਮੀਜ਼ ਵਾਲੇ ਨਸ਼ੇ ਦੀ ਹਾਲਤ ਵਿੱਚ ਇਕ ਸ਼ਖ਼ਸ ਨਾਲ ਗਾਲੀ ਗਲੋਚ ਅਤੇ ਉਸ ਨੂੰ ਕੁੱਟਣ ਦਾ ਵੀਡੀਓ ਵਾਇਰਲ ਹੋਇਆ ਹੈ ਅਤੇ ਇਹ ਕਿਹਾ ਜਾ ਰਿਹਾ ਹੈ ਕਿ ਚਿੱਟੀ ਕਮੀਜ਼ ਵਾਲੇ ਜਿਸ ਵਿਅਕਤੀ ਨੂੰ ਕੁੱਟਿਆ ਗਿਆ, ਉਹ ਅਜੇ ਦੇਵਗਨ ਹੈ।
ਅਜੇ ਦੇਵਗਨ ਦੇ ਦਫ਼ਤਰ ਨੇ ਇਕ ਬਿਆਨ ਜਾਰੀ ਕਰਕੇ ਇਸ ਦਾ ਖੰਡਨ ਕੀਤਾ ਹੈ ਅਤੇ ਸਪਸ਼ਟ ਕੀਤਾ ਹੈ ਕਿ ਦਿੱਲੀ ਵਿੱਚ ਹੋਏ ਝਗੜੇ ਵਾਲੀ ਵੀਡੀਓ ਵਿਚਲਾ ਸ਼ਖਸ ਅਜੇ ਦੇਵਗਨ ਨਹੀਂ ਹੈ।
ਅਜੇ ਦੇਵਗਨ ਦੇ ਦਫ਼ਤਰ ਵੱਲੋਂ ਜਾਰੀ ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਆਪਣੀ ਫ਼ਿਲਮ ‘ਤਾਨ੍ਹਾ ਜੀ – ਦੀ ਅਨਸੰਗ ਵਾਰੀਅਰ’ ਦੀ ਜਨਵਰੀ 2020 ਵਿੱਚ ਪ੍ਰਮੋਸ਼ਨ ਲਈ ਦਿੱਲੀ ਗਏ ਅਜੇ ਦੇਵਗਨ ਉਸ ਤੋਂ ਬਾਅਦ ਕਦੇ ਦਿੱਲੀ ਗਏ ਹੀ ਨਹੀਂ। ਇਸ ਲਈ ਦਿੱਲੀ ਦੇ ਇਕ ਪੱਬ ਦੇ ਬਾਹਰ ਅਜੇ ਦੇਵਗਨ ਦੇ ਕਿਸੇ ਝਗੜੇ ਦੀਆਂ ਖ਼ਬਰਾਂ ਬਿਲਕੁਲ ਨਿਰਮੂਲ ਅਤੇ ਬੇਬੁਨਿਆਦ ਹਨ।
ਅਜੇ ਦੇਵਗਨ ਦੇ ਦਫ਼ਤਰ ਨੇ ਕਿਹਾ ਹੈ ਕਿ ਉਹ ਮੀਡੀਆ ਅਤੇ ਨਿਊਜ਼ ਏਜੰਸੀਆਂ ਨੂੂੰ ਇਹ ਦੱਸਣਾ ਚਾਹੁੰਦੇ ਹਨ ਕਿ ਅਜੇ ਦੇਵਗਨ ਆਪਣੀਆਂ ਫ਼ਿਲਮਾਂ ‘ਮੈਦਾਨ’, ‘ਮੇਅ ਡੇਅ’ ਅਤੇ ‘ਗੰਗੂਬਾਈ ਕਾਠੀਆਵਾੜੀ’ ਦੀ ਸ਼ੂਟਿੰਗ ਦੌਰਾਨ ਮੁੰਬਈ ਵਿੱਚ ਹੀ ਸਨ ਅਤੇ ਉਨ੍ਹਾਂ ਨੇ 14 ਮਹੀਨਿਆਂ ਤੋਂ ਦਿੱਲੀ ਵਿੱਚ ਪੈਰ ਵੀ ਨਹੀਂ ਪਾਇਆ। ਉਹਨਾਂ ਆਖ਼ਿਆ ਕਿ ਕੁਝ ਵੀ ਪ੍ਰਕਾਸ਼ਿਤ ਜਾਂ ਵਾਇਰਲ ਕਰ ਦੇਣ ਤੋਂ ਪਹਿਲਾਂ ਇਕ ਵੇਰਾਂ ਗੱਲ ਦੀ ਤਸਦੀਕ ਕਰ ਲੈਣੀ ਚਾਹੀਦੀ ਹੈ।