ਅੱਜ-ਨਾਮਾ
ਰੱਫੜ ਦਿੱਲੀ ਦੇ ਅੰਦਰ ਆ ਪਿਆ ਭਾਰਾ,
ਹੁੰਦੀ ਹਾਲੇ ਨਹੀਂ ਮੇਅਰ ਦੀ ਚੋਣ ਮੀਆਂ।
ਜਦ ਵੀ ਚੋਣ ਲਈ ਕਦੀ ਅਜਲਾਸ ਹੁੰਦਾ,
ਪੈਂਦਾ ਨਿਕਲ ਹੈ ਨਵਾਂ ਕੋਈ ਕੋਣ ਮੀਆਂ।
ਬਹਿਸਾਂ ਵਿੱਚ ਹਨ ਫਸਦੀਆਂ ਧਿਰਾਂ ਦੋਵੇਂ,
ਆਪਣਾ-ਆਪਣਾ ਰੋਣ ਫਿਰ ਰੋਣ ਮੀਆਂ।
ਲੋਕਤੰਤਰ `ਤੇ ਲੱਗਾ ਪਿਆ ਦਾਗ ਜਿਹੜਾ,
ਕਿਹੜਾ ਧੋਊਗਾ ਉਹਦਾ ਫਿਰ ਧੋਣ ਮੀਆਂ।
ਦੋਵੇਂ ਧਿਰਾਂ`ਚੋਂ ਘੱਟ ਨਹੀਂ ਕੋਈ ਲੱਗਦੀ,
ਸਮਝਣ ਦੂਜੀ ਨੂੰ ਦੋਵੇਂ ਈ ਟਿੱਚ ਮੀਆਂ।
ਦਿੱਲੀ ਚੋਣਾਂ ਦਾ ਜਿਹੜਾ ਸੀ ਮੂਲ ਫਤਵਾ,
ਰੁਲਿਆ ਜਾਪਦਾ ਬਹਿਸ ਦੇ ਵਿੱਚ ਮੀਆਂ।
-ਤੀਸ ਮਾਰ ਖਾਂ
ਫਰਵਰੀ 8, 2023
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ
