ਅੱਜ-ਨਾਮਾ
ਘੁੰਮੇ ਪਈ ਸ਼ੋਹਦਿਆਂ ਦੀ ਢਾਣੀ ਚਹੁੰ ਪਾਸੇ,
ਥਾਂ-ਥਾਂ ਬਾਈਕਾਂ ਦੀ ਘੂਕ ਆ ਪਾਈ ਜਾਂਦੇ।
ਡਰਾਉਣੇ ਹਾਰਨ ਲਵਾਏ ਨੇ ਸ਼ੋਹਦਿਆਂ ਨੇ,
ਵਜਾਉਂਦੇ ਸੜਕਾਂ ਨੇ ਖਾਲੀ ਕਰਾਈ ਜਾਂਦੇ।
ਫਾਇਰ ਬ੍ਰੀਗੇਡ ਦੇ ਜਿਹੀ ਰਫਤਾਰ ਰੱਖਦੇ,
ਕਾਲਜੇ ਪਬਲਿਕ ਦੇ ਮੂੰਹ ਨੂੰ ਆਈ ਜਾਂਦੇ।
ਬਹੁੜੀ-ਬਹੁੜੀ ਜਿਹੀ ਕਈ ਨੇ ਲੋਕ ਕਰਦੇ,
ਜਲੂਸ ਇਹ ਨਿੱਤ ਹੀ ਕੱਢੀ-ਕਢਾਈ ਜਾਂਦੇ।
ਨਾਕਿਆਂ ਉੱਤੇ ਕਈ ਹੁੰਦੇ ਈ ਪੁਲਸ ਵਾਲੇ,
ਉਹ ਵੀ ਰੋਕਣ ਦੀ ਹਿੰਮਤ ਨਾ ਕਰਨ ਜੋਗੇ।
ਵਿਗੜਦੀ ਹਾਲਤ ਹੈ ਅਮਨ-ਕਾਨੂੰਨ ਵਾਲੀ,
ਰਹਿ ਗਏ ਲੋਕ ਬਦਅਮਨੀਆਂ ਜਰਨ ਜੋਗੇ।
-ਤੀਸ ਮਾਰ ਖਾਂ
12 ਫਰਵਰੀ, 2023
