ਯੈੱਸ ਪੰਜਾਬ
ਪਟਿਆਲਾ, 28 ਅਪ੍ਰੈਲ, 2021:
ਪਟਿਆਲਾ ਦੀ ਅਤਿ ਸੁਰੱਖ਼ਿਆ ਵਾਲੀ ਕੇਂਦਰੀ ਜੇਲ੍ਹ ਵਿੱਚ ਵੱਡੀ ਕੁਤਾਹੀ ਵੇਖ਼ਣ ਵਿੱਚ ਆਈ ਹੈ। ਪੰਜਾਬ ਵਿੱਚ ਕੋਵਿਡ ਦੇ ਚੱਲਦਿਆਂ ਲੱਗੇ ਸ਼ਾਮ 6 ਵਜੇ ਤੋਂਸਵੇਰੇ 5 ਵਜੇ ਤਕ ਦੇ ਕਰਫ਼ਿਊ ਦੇ ਦੌਰਾਨ ਹੀ ਮੰਗਲਵਾਰ ਰਾਤ 3 ਕੈਦੀ ਸੰਨ੍ਹ ਲਾ ਕੇ ਜੇਲ੍ਹ ਵਿੱਚੋਂ ਫ਼ਰਾਰ ਹੋਣ ਵਿੱਚ ਸਫ਼ਲ ਹੋ ਗਏ।
ਮਾਮਲੇ ਦਾ ਬੁੱਧਵਾਰ ਸਵੇਰੇ ਪਤਾ ਲੱਗਣ ’ਤੇ ਅਧਿਕਾਰੀਆਂ ਦੇ ਹੱਥ ਪੈਰ ਫੁੱਲ ਗਏ ਅਤੇ ਸੂਬੇ ਦੀ ਪੁਲਿਸ ਦੇ ਨਾਲ ਨਾਲ ਦੂਜੇ ਰਾਜਾਂ ਦੀ ਪੁਲਿਸ ਨੂੂੰ ਵੀ ਅਲਰਟ ਜਾਰੀ ਕੀਤਾ ਗਿਆ ਹੈ।
ਘਟਨਾ ਐਸ.ਐਸ.ਪੀ.ਦਫ਼ਤਰ, ਮਿੰਨੀ ਸਕੱਤਰੇਤ ਅਤੇ ਪੁਲਿਸ ਲਾਈਨਜ਼ ਦੇ ਨਜ਼ੀਦਕ ਅਤਿ ਸੁਰੱਖ਼ਿਅਤ ਕੇਂਦਰੀ ਜੇਲ੍ਹ ਨਾਲ ਸੰਬੰਧਤ ਹੋਣ ਦੇ ਨਾਲ ਨਾਲ ਇਸ ਲਈ ਵੀ ਮਹੱਤਵਪੂਰਨ ਮੰਨੀ ਜਾ ਰਹੀ ਹੈ ਕਿ ਫ਼ਰਾਰ ਕੈਦੀਆਂ ਵਿੱਚ ਇਕ ਯੂ.ਕੇ. ਤੋਂ ਡਿਪੋਰਟ ਹੋਇਆ ਦੋਸ਼ੀ ਸ਼ੇਰ ਸਿੰਘ ਵੀ ਸ਼ਾਮਲ ਹੈ।
ਸ਼ੇਰ ਸਿੰਘ ਗੀਤਾ ਔਲਖ਼ ਨਾਂਅ ਦੀ ਮਹਿਲਾ ਦੇ ਕਤਲ ਕਾਂਡ ਨਾਲ ਸੰਬੰਧਤ ਸੀ ਜਿਸਨੂੰ ਉੱਥੇ 22 ਸਾਲ ਦੀ ਸਜ਼ਾ ਸੁਣਾਏ ਜਾਣ ਤੋਂ ਬਾਅਦ ਭਾਰਤ ਡਿਪੋਰਟ ਕੀਤਾ ਗਿਆ ਸੀ। ਹੋਰ ਵੀ ਅਹਿਮ ਗੱਲ ਇਹ ਹੈ ਕਿ ਸ਼ੇਰ ਸਿੰਘ ਨੂੰ ਹਫ਼ਤਾ ਪਹਿਲਾਂ ਹੀ ਬਠਿੰਡਾ ਦੀ ਜੇਲ੍ਹ ਵਿੱਚੋਂ ਪਟਿਆਲਾ ਜੇਲ੍ਹ ਤਬਦੀਲ ਕੀਤਾ ਗਿਆ ਸੀ ਅਤੇ ਹਫ਼ਤੇ ਬਾਅਦ ਹੀ ਜੇਲ੍ਹ ਅੰਦਰ ਸੰਨ੍ਹਮਾਰੀ ਕਰਕੇ ਉਸ ਸਮੇਤ ਤਿੰਨ ਕੈਦੀ ਫ਼ਰਾਰ ਹੋਣ ਵਿੱਚ ਸਫ਼ਲ ਹੋ ਗਏ।
ਜ਼ਿਕਰਯੋਗ ਹੈ ਕਿ ਗੀਤਾ ਔਲਖ਼ ਦੇ ਯੂ.ਕੇ.ਵਿੱਚ ਕਤਲ ਲਈ ਉਸਦੇ ਪਤੀ ਹਰਪ੍ਰੀਤ ਔਲਖ਼, ਸ਼ੇਰ ਸਿੰਘ ਅਤੇ ਜਸਵੰਤ ਢਿੱਲੋਂ ਨੂੰ ਸਜ਼ਾ ਸੁਣਾਈ ਗਈ ਸੀ ਅਤੇ ਉੱਥੇ ਸਜ਼ਾ ਕਟਦੇ ਹੋਏ ਹੀ ਸ਼ੇਰ ਸਿੰਘ ਨੂੰ ਇੱਥੇ ‘ਡਿਪੋਰਟ’ਕੀਤਾ ਗਿਆ ਸੀ।
ਫ਼ਰਾਰ ਹੋਣ ਵਾਲੇ ਹੋਰ ਕੈਦੀਆਂ ਵਿੱਚ ਕਪੂਰਥਲਾ ਦੇ ਪਿੰਡ ਰਾਣੀ ਕੰਬੋਹ ਦਾ ਇੰਦਰਜੀਤ ਸਿੰਘ ਅਤੇ ਰੂਪਨਗਰ ਜ਼ਿਲ੍ਹੇ ਦਾ ਜਸਪ੍ਰੀਤ ਸਿੰਘ ਸ਼ਾਮਲ ਸਨ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ
