ਅੱਜ-ਨਾਮਾ
ਲੱਗੇ ਸੀ ਲਾਉਣ ਸਰਪੰਚੀ ਦੀ ਜਦੋਂ ਬੋਲੀ,
ਸਾਰਾ ਪਿੰਡ ਸੀ ਪਹੁੰਚ ਗਿਆ ਆਣ ਬੇਲੀ।
ਮੂਹਰੇ ਆਕੜ ਕੇ ਸੱਜਣ ਉਹ ਆਣ ਬੈਠੇ,
ਬਹੁਤ ਮਾਇਆ ਦਾ ਜਿਨ੍ਹਾਂ ਨੂੰ ਮਾਣ ਬੇਲੀ।
ਲੱਖ-ਦੋ ਲੱਖ ਤੋਂ ਪਹਿਲ ਇਹ ਸ਼ੁਰੂ ਹੋਈ,
ਲੱਗ ਪਈ ਸਿੱਧੀ ਕਰੋੜ ਵੱਲ ਜਾਣ ਬੇਲੀ।
ਜਿੱਥੋਂ ਤੀਕਰ ਫਿਰ ਕਿਸੇ ਦੀ ਪਹੁੰਚ ਹੋਈ,
ਓਥੋਂ ਤੀਕਰ ਹੈ ਲਾਈ ਗਿਆ ਤਾਣ ਬੇਲੀ।
ਆ ਗਈ ਜਦੋਂ ਨੀਲਾਮੀ ਹੈ ਮੀਡੀਏ ਵਿੱਚ,
ਅਧਿਕਾਰੀ ਫੇਰ ਵੀ ਰਹੇ ਨਹੀਂ ਬੋਲ ਬੇਲੀ।
ਵਿਕਦਾ ਪਿਆ ਜਦ ਪਿੰਡਾਂ ਦਾ ਲੋਕਤੰਤਰ,
ਸ਼ਰਮ-ਹਯਾ ਸਭ ਦਿੱਤੀ ਗਈ ਰੋਲ ਬੇਲੀ।
ਤੀਸ ਮਾਰ ਖਾਂ
1 ਅਕਤੂਬਰ, 2024
