ਅੱਜ-ਨਾਮਾ
ਹੁਕਮ ਸਰਕਾਰ ਦੇ ਨਿੱਤ ਨੇ ਨਵੇਂ ਆਉਂਦੇ,
ਪਰਦੂਸ਼ਣ ਰੋਕਣ ਨੂੰ ਲੱਗਿਆ ਜ਼ੋਰ ਮੀਆਂ।
ਪੈਟਰੋਲ-ਡੀਜ਼ਲ ਦੀ ਕਾਰ ਨਹੀਂ ਬੱਸ ਚੱਲੂ,
ਦੇਣੀਆਂ ਸ਼ਹਿਰ ਤੋਂ ਬਾਹਰ ਆ ਤੋਰ ਮੀਆਂ।
ਬਿਜਲੀ ਵਾਲੀ ਹੀ ਕਹਿੰਦੜੇ ਬਾਈਕ ਚੱਲੂ,
ਚਾਰਾ ਰਹਿ ਗਿਆ ਕੋਈ ਨਹੀਂ ਹੋਰ ਮੀਆਂ।
ਫਸ ਗਏ ਬਾਹਲੇ ਨੇ ਸੁਣੀਂਦੇ ਸ਼ਹਿਰ ਅੰਦਰ,
ਖਰੀਦ ਲਈ ਜਿਨ੍ਹਾਂ ਸੀ ਨਵੀਂ-ਨਕੋਰ ਮੀਆਂ।
ਕਿਸੇ ਤਾਂ ਬੱਚਤ ਸੀ ਖਰਚ ਲਈ ਕੋਲ ਜਿੰਨੀ,
ਲਿਆ ਕੁਝ ਕਿਸੇ ਨੇ ਕਰਜ਼ ਦਾ ਫਾਹ ਮੀਆਂ।
ਆ ਗਏ ਹੁਕਮ ਨਾਲ ਗੱਡੀ ਦਾ ਮੁੱਲ ਡਿੱਗਾ,
ਹੋਊਗੀ ਬੈਂਕ ਦੀ ਕਿਸ਼ਤ ਨਹੀਂ ਲਾਹ ਮੀਆਂ।
-ਤੀਸ ਮਾਰ ਖਾਂ
ਫਰਵਰੀ 16, 2023
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ