ਅੱਜ-ਨਾਮਾ
ਰਹਿੰਦਾ ਚੋਣਾਂ ਦੇ ਲਈ ਆ ਵਕਤ ਚੋਖਾ,
ਭਾਜੜ ਸੀਟਾਂ ਦੀ ਗਈ ਆ ਮੱਚ ਮੀਆਂ।
ਸਾਰੇ ਈ ਮਰਜ਼ੀ ਦੀ ਮੰਗਦੇ ਸੀਟ ਬੇਲੀ,
ਮੁੱਢੋਂ ਯਾਰੀਆਂ ਟੁੱਟਣ ਜਿਊ ਕੱਚ ਮੀਆਂ।
ਜੀਹਨੂੰ ਸੀਟ ਦੀ ਝੰਡੀ ਹੈ ਮਿਲ ਜਾਂਦੀ,
ਉਸ ਦਾ ਕੋੜਮਾ ਪੈਂਦਾ ਈ ਨੱਚ ਮੀਆਂ।
ਰਹਿੰਦਾ ਜਿਹੜਾ ਰਕੀਬ ਆ ਸੀਟ ਬਾਝੋਂ,
ਭਰਿਆ ਗਲ਼ੇ ਦਾ ਹੁੰਦਾ ਈ ਗੱਚ ਮੀਆਂ।
ਰਹਿੰਦੇ ਸਾਲ ਤੋਂ ਹੋਇਆ ਜੇ ਹਾਲ ਏਦਾਂ,
ਮਗਰੋਂ ਖੌਰੇ ਕੀ ਆਉਣੇ ਨੇ ਰੰਗ ਮੀਆਂ।
ਲੱਗ ਪਈ ਹੋਣ ਅਗੇਤੜੀ ਦਲ-ਬਦਲੀ,
ਸੁਣਦੀ ਟੱਬਰਾਂ ਵਿੱਚੋਂ ਪਈ ਜੰਗ ਮੀਆਂ।
–ਤੀਸ ਮਾਰ ਖਾਂ
ਮਾਰਚ 17, 2021