ਅੱਜ-ਨਾਮਾ
ਉਹੀ ਮੰਤਰੀ ਮੂਹਰੇ ਆ ਫੇਰ ਆਇਆ,
ਜਿਹੜਾ ਬੇੜੀਆਂ `ਚ ਵੱਟੇ ਪਾਏ ਮੀਆਂ।
ਨਵੀਂ ਗੱਲ ਨਹੀਂ ਉਹਨੇ ਸੀ ਕੋਈ ਕੀਤੀ,
ਨੁਕਤੇ ਪਹਿਲੇ ਆ ਫੇਰ ਦੁਹਰਾਏ ਮੀਆਂ।
ਭਾਜੀ ਮੋੜਨ ਨੂੰ ਬਿਨਾ ਕੁਝ ਦੇਰ ਕੀਤੇ,
ਮੂਹਰੇ ਆਗੂ ਕਿਸਾਨਾਂ ਦੇ ਆਏ ਮੀਆਂ।
ਨੁਕਤੇ ਮੰਤਰੀ ਦੇ ਸਾਰੇ ਈ ਰੱਦ ਕਰ ਕੇ,
ਵਾਰਤਾ ਵਾਲੇ ਆ ਸੱਦੇ ਠੁਕਰਾਏ ਮੀਆਂ।
ਗੱਡੀ ਚੱਲੀ ਨਹੀਂ ਚਾਰ ਵੀ ਕਦਮ ਅੱਗੇ,
ਰਹੀ ਆ ਓਥੇ ਦੀ ਓਥੇ ਹੀ ਖੜੀ ਮੀਆਂ।
ਕਰ ਕੇ ਅੜੀ ਜੇ ਕੇਂਦਰ ਸਰਕਾਰ ਬੈਠੀ,
ਛੱਡਣੀ ਨਹੀਂ ਕਿਸਾਨਾਂ ਵੀ ਅੜੀ ਮੀਆਂ।
-ਤੀਸ ਮਾਰ ਖਾਂ
ਦਸੰਬਰ 11, 2020
