ਯੈੱਸ ਪੰਜਾਬ
ਅੰਮ੍ਰਿਤਸਰ, 11 ਅਗਸਤ, 2022:
ਵੀਰਵਾਰ ਸ਼ਾਮ ਨੂੰ ਸ੍ਰੀ ਦਰਬਾਰ ਸਾਹਿਬ ਦੇ ਬਾਹਰੋਂ ਮਿਲੀ ਇਕ ਬੱਚੀ ਦੀ ਲਾਸ਼ ਦਾ ਮਾਮਲਾ ਸ਼ੁੱਕਰਵਾਰ ਸ਼ਾਮ ਪੈਣ ਤੋਂ ਪਹਿਲਾਂ ਹੀ ਸੁਲਝ ਗਿਆ। ਸੀ.ਸੀ.ਟੀ.ਵੀ.ਦੀ ਫੁੱਟੇਜ ਵਿੱਚ ਆਈਆਂ ਤਸਵੀਰਾਂ ਵਾਇਰਲ ਹੋਣ ਮਗਰੋਂ ਸਾਰਾ ਦਿਨ ਭੇਤ ਬਣਿਆ ਰਿਹਾ ਮਾਮਲਾ ਉਸ ਵੇਲੇ ਸੁਲਝ ਗਿਆ ਜਦ ਬੜੇ ਹੀ ਨਾਟਕੀ ਢੰਗ ਨਾਲ ਤਸਵੀਰਾਂ ਵਿੱਚ ਦਿੱਸੀ ਔਰਤ, ਜੋ ਬੱਚੀ ਦੀ ਮਾਂ ਨਿਕਲੀ, ਰਾਜਪੁਰਾ ਦੇ ਥਾਣੇ ਵਿੱਚ ਬੱਚੀ ਦੀ ਗੁਮਸ਼ਦਗੀ ਸੰਬੰਧੀ ਪੁਲਿਸ ਨੂੂੰ ਗੁਮਰਾਹ ਕਰਨ ਵਾਲੀ ਰਿਪੋਰਟ ਲਿਖ਼ਾਉਣ ਲਈ ਜਾ ਪੁੱਜੀ।
ਰਾਜਪੁਰਾ ਵਿੰਚ ਪਹਿਲਾਂ ਇਹ ਔਰਤ ਪੀ.ਸੀ.ਆਰ. ਵਾਲਿਆਂ ਕੋਲ ਪੁੱਜੀ ਅਤੇ ਉਨ੍ਹਾਂ ਤੋਂ ਥਾਣੇ ਦਾ ਰਾਹ ਪੁੱਛਿਆ ਜਿਸ ’ਤੇ ਪੀ.ਸੀ.ਆਰ. ਵਾਲਿਆਂ ਨੂੰ ਸ਼ੱਕ ਪੈਗਿਆ। ਆਪਣੇ ਦੂਜੇ ਬੱਚੇ, ਜੋ ਕਿ ਤਸਵੀਰਾਂ ਵਿੱਚ ਉਸਦੇ ਨਾਲ ਨਜ਼ਰ ਆਇਆ ਲੜਕਾ ਹੈ, ਨਾਲ ਰਾਜਪੁਰਾ ਸਿਟੀ ਥਾਣੇ ਪੁੱਜੀ ਅਤੇ ਕਿਹਾ ਕਿ ਉਹ ਅੰਮ੍ਰਿਤਸਰ ਵਿੱਚ ਗੁੰਮ ਗਈ ਆਪਣੀ ਬੱਚੀ ਦੀ ਰਿਪੋਰਟ ਲਿਖ਼ਾਉਣ ਆਈ ਹੈ। ਪਹਿਲਾਂ ਹੀ ਚੌਕਸ ਹੋਈ ਪੁਲਿਸ ਨੇ ਉਸ ਨੂੰ ਹਿਰਾਸਤ ਵਿੱਚ ਲੈ ਲਿਆ ਅਤੇ ਅੰਮ੍ਰਿਤਸਰ ਪੁਲਿਸ ਨੂੰ ਸੂਚਿਤ ਕੀਤਾ।
ਮ੍ਰਿਤਕ ਬੱਚੀ ਦੀ ਪਛਾਣ ਦੀਪਜੋਤ ਕੌਰ ਅਤੇ ਉਸਦੀ ਮਾਂ ਦੀ ਪਛਾਣ ਮਨਿੰਦਰ ਕੌਰ ਪਤਨੀ ਕੁਲਵਿੰਦਰ ਸਿੰਘ ਵਾਸੀ ਯਮੁਨਾਨਗਰ ਵਜੋਂ ਹੋਈ ਹੈ।
ਪਤਾ ਲੱਗਾ ਹੈ ਕਿ ਮਨਿੰਦਰ ਕੌਰ ਆਪਣੇ ਦੋਹਾਂ ਬੱਚਿਆਂ ਸਣੇ ਯਮੁਨਾਨਗਰ ਸਥਿਤ ਆਪਣੇ ਘਰ ਤੋਂ ਪਿਛਲੇ ਦੋ ਦਿਨਾਂ ਤੋਂ ਭੇਦਭਰੇ ਢੰਗ ਨਾਲ ਚਲੀ ਗਈ ਸੀ ਅਤੇ ਉਸਦੇ ਪਤੀ ਕੁਲਵਿੰਦਰ ਸਿੰਘ ਨੇ ਇਸ ਬਾਰੇ ਯਮੁਨਾਨਗਰ ਪੁਲਿਸ ਕੋਲ ਰਿਪੋਰਟ ਵੀ ਲਿਖ਼ਾਈ ਸੀ।
ਦਿਲਚਸਪ ਗੱਲ ਇਹ ਵੀ ਰਹੀ ਕਿ ਮਨਿੰਦਰ ਕੌਰ ਯਮੁਨਾਨਗਰ ਤੋਂ ਅੰਮ੍ਰਿਤਸਰ ਤਾਂ ਆ ਗਈ ਪਰ ਉਹ ਆਪਣੇ ਨਾਲ ਮੋਬਾਇਲ ਨਹੀਂ ਲਿਆਈ ਅਤੇ ਸਮਝਿਆ ਜਾ ਰਿਹਾ ਹੈ ਕਿ ਉਸਨੇ ਇੰਜ ਇਸ ਲਈ ਕੀਤਾ ਹੋਵੇਗਾ ਤਾਂ ਜੋ ਉਸਦੀ ‘ਲੋਕੇਸ਼ਨ’ ਟਰੇਸ ਨਾ ਹੋ ਸਕੇ।
ਕਿਹਾ ਜਾ ਰਿਹਾ ਹੈ ਕਿ ਮਨਿੰਦਰ ਕੌਰ ਦੀ ਆਪਣੇ ਪਤੀ ਨਾਲ ਨਹੀਂ ਬਣਦੀ ਸੀ ਅਤੇ ਦੋਹਾਂ ਦੇ ਰਿਸ਼ਤੇ ਅਸੁਖ਼ਾਵੇਂ ਹੋਣ ਦੀਆਂ ਖ਼ਬਰਾਂ ਤੋਂ ਇਲਾਵਾ ਕੁਝ ਹੋਰ ਵੀ ਅਸਹਿਜ ਗੱਲਾਂ ਸੁਣਨ ਨੂੰ ਮਿਲ ਰਹੀਆਂ ਹਨ।
ਜ਼ਿਕਰਯੋਗ ਹੈ ਕਿ ਵੀਰਵਾਰ ਸ਼ਾਮ ਇਸ ਬੱਚੀ ਦੀ ਲਾਸ਼ ਘੰਟਾ ਘਰ ਵਾਲੇ ਪਾਸੇ ਦਰਬਾਰ ਸਾਹਿਬ ਪਲਾਜ਼ਾ ਵਿੱਚ ਹੇਠਾਂ ਪਈ ਮਿਲੀ ਸੀ। ਇਹ ਬੱਚੀ ਕੁਝ ਦੇਰ ਤਾਂ ਸ੍ਰੀ ਦਰਬਾਰ ਸਾਹਿਬ ਦੇ ਬਾਹਰ ਇੰਜ ਪਈ ਰਹੀ ਜਿਵੇਂ ਸੁੱਤੀ ਹੋਵੇ ਪਰ ਅਖ਼ੀਰ ਇਹ ਵੇਖ਼ਿਆ ਗਿਆ ਕਿ ਬੱਚੀ ਦੀ ਮੌਤ ਹੋ ਚੁੱਕੀ ਸੀ। ਲਾਸ਼ ਮਿਲਣ ਤੋਂ ਬਾਅਦ ਸ਼੍ਰੋਮਣੀ ਕਮੇਟੀ ਦੇ ਮੁਲਾਜ਼ਮ ਹਰਕਤ ਵਿੱਚ ਆਏ ਅਤੇ ਪੁਲਿਸ ਨੂੰ ਸੂਚਿਤ ਕਰਨ ਤੋਂ ਇਲਾਵਾ ਸੀ.ਸੀ.ਟੀ.ਵੀ. ਕੈਮਰਿਆਂ ਦੀ ਰਿਕਾਰਡਿੰਗ ਵੀ ਚੈੱਕ ਕੀਤੀ ਗਈ।
ਇਸ ਦੌਰਾਨ ਇਹ ਸਾਹਮਣੇ ਆਇਆ ਕਿ ਇਹ ਬੱਚੀ ਪਹਿਲਾਂ ਇਥ ਔਰਤ ਦੀ ਝੋਲੀ ਵਿੱਚ ਸੀ ਅਤੇ ਉਸਦੇ ਮਗਰ ਵੀ ਇਕ ਬੱਚਾ ਹੋਰ ਤੁਰਿਆ ਜਾਂਦਾ ਸੀ। ਇਕ ਹੋਰ ਜਗ੍ਹਾ ਤੋਂ ਸਾਹਮਣੇ ਆਈ ਕਲਿੱਪਿੰਗ ਵਿੱਚ ਇਸ ਔਰਤ ਦੇ ਹੱਥ ਵਿੱਚ ਇਕ ਸੂਟਕੇਸ ਨਜ਼ਰ ਆਉਂਦਾ ਹੈ ਪਰ ਉਸ ਦੇ ਨਾਲ ਉਕਤ ਬੱਚੀ ਨਜ਼ਰ ਨਹੀਂ ਆਉਂਦੀ।
ਸ਼੍ਰੋਮਣੀ ਕਮੇਟੀ ਨੇ ਇਸ ਸੰਬੰਧ ਵਿੱਚ ਇਕ ਸੁਨੇਹਾ ਸੋਸ਼ਲ ਮੀਡੀਆ ’ਤੇ ਸਾਂਝਾ ਕੀਤਾ ਹੈ ਅਤੇ ਲੋਕਾਂ ਨੂੂੰ ਅਪੀਲ ਕੀਤੀ ਹੈ ਕਿ ਉਹ ਇਸ ਬੱਚੀ ਅਤੇ ਔਰਤ ਦੀ ਪਛਾਣ ਬਾਰੇ ਜਾਣਕਾਰੀ ਸਾਂਝੀ ਕਰਨ ਤਾਂ ਜੋ ਇਹ ਮਾਮਲਾ ਹੱਲ ਹੋ ਸਕੇ। ਇਸੇ ਦੌਰਾਨ ਬੱਚੀ ਦੀ ਲਾਸ਼ ਥਾਣਾ ਕੋਤਵਾਲੀ, ਗਲਿਆਰਾ ਚੌਕੀ ਨੂੰ ਸਪੁਰਦ ਕਰ ਦਿੱਤੀ ਗਈ ਸੀ।
ਸੂਤਰਾਂ ਅਨੁਸਾਰ ਔਰਤ ਨੇ ਮੰਨ ਲਿਆ ਹੈ ਕਿ ਉਸਨੇ ਹੀ ਆਪਣੀ ਬੱਚੀ ਨੂੰ ਮਾਰ ਕੇ ਦਰਬਾਰ ਸਾਹਿਬ ਦੇ ਬਾਹਰ ਛੱਡਿਆ ਸੀ।
ਅੰਮ੍ਰਿਤਸਰ ਪੁਲਿਸ ਦੀ ਇਕ ਪਾਰਟੀ ਅੰਮ੍ਰਿਤਸਰ ਤੋਂ ਚੱਲ ਕੇ ਰਾਜਪੁਰਾ ਪੁੱਜ ਗਈ ਹੈ ਤਾਂ ਜੋ ਮਨਿੰਦਰ ਕੌਰ ਨੂੰ ਅੰਮ੍ਰਿਤਸਰ ਲਿਆਇਆ ਜਾ ਸਕੇ। ਉੱਧਰੋਂ ਕੁਲਵਿੰਦਰ ਸਿੰਘ ਵੀ ਯਮੁਨਾਨਗਰ ਦੀ ਪੁਲਿਸ ਪਾਰਟੀ ਨਾਲ ਅੰਮ੍ਰਿਤਸਰ ਲਈ ਰਵਾਨਾ ਹੋਇਆ ਹੈ। ਪਤਾ ਲੱਗਾ ਹੈ ਕਿ ਬੱਚੀ ਦਾ ਸਨਿਚਰਵਾਰ ਨੂੰ ਪੋਸਟਮਾਰਟਮ ਕਰਵਾਇਆ ਜਾ ਸਕਦਾ ਹੈ।
ਪੁਲਿਸ ਹੁਣ ਇਹ ਪਤਾ ਲਾਵੇਗੀ ਕਿ ਮਨਿੰਦਰ ਕੌਰ ਨੇ ਕਿਨ੍ਹਾਂ ਹਾਲਾਤਾਂ ਵਿੱਚ ਇਹ ਕਾਰਾ ਕੀਤਾ ਅਤੇ ਕੀ ਉਸਦੇ ਨਾਲ ਕੋਈ ਹੋਰ ਵੀ ਇਸ ਵਾਰਦਾਤ ਵਿੱਚ ਸਹਿਭਾਗੀ ਸੀ।
ਯੈੱਸ ਪੰਜਾਬ ਦੀਆਂ ਪੰਜਾਬੀ ਖ਼ਬਰਾਂ ਲਈ ਇੱਥੇ ਕਲਿੱਕ ਕਰਕੇ ਸਾਡਾ ਫ਼ੇਸਬੁੱਕ ਪੇਜ ਲਾਈਕ ਕਰੋ