ਯੈੱਸ ਪੰਜਾਬ
ਸੈਕਰਾਮੈਂਟੋ, 30 ਨਵੰਬਰ, 2022 (ਹੁਸਨ ਲੜੋਆ ਬੰਗਾ)
ਰਾਸ਼ਟਰਪਤੀ ਜੋ ਬਾਈਡਨ ਨੇ ਆਸ ਪ੍ਰਗਟਾਈ ਹੈ ਕਿ 9 ਦਸੰਬਰ ਦੀ ਪ੍ਰਸਤਾਵਿਤ ਰੇਲ ਹੜਤਾਲ ਨੂੰ ਰੋਕਣ ਵਿਚ ਉਹ ਕਾਮਯਾਬ ਹੋ ਜਾਣਗੇ। ਰਾਸ਼ਟਰਪਤੀ ਨੇ ਰੇਲ ਹੜਤਾਲ ਰੋਕਣ ਲਈ ਕਾਂਗਰਸ ਦੇ 4 ਚੋਟੀ ਦੇ ਆਗੂਆਂ ਨਾਲ ਮੀਟਿੰਗ ਕੀਤੀ ਜਿਸ ਵਿਚ ਅਹਿਮ ਵਿਚਾਰਾਂ ਹੋਈਆਂ।
ਬਾਈਡਨ ਨੇ ਸਦਨ ਦੇ ਸਪੀਕਰ ਨੈਨਸੀ ਪੋਲੇਸੀ, ਸੈਨਟ ਦੇ ਬਹੁਗਿਣਤੀ ਆਗੂ ਚੁਕ ਸ਼ੂਮਰ, ਸਦਨ ਦੇ ਘੱਟ ਗਿਣਤੀ ਆਗੂ ਕੈਵਿਨ ਮੈਕਰਥੀ ਤੇ ਸੈਨੇਟੇ ਦੇ ਘੱਟ ਗਿਣਤੀ ਆਗੂ ਮਿਚ ਮਕੋਨੈਲ ਨਾਲ ਕੀਤੀ ਮੀਟਿੰਗ ਵਿਚ ਰੇਲ ਹੜਤਾਲ ਰੋਕਣ ਲਈ ਸਤੰਬਰ ਵਿਚ ਯੁਨੀਅਨ ਆਗੂਆਂ ਤੇ ਮੈਨਜਮੈਂਟ ਵਿਚਾਲੇ ਹੋਏ ਆਰਜੀ ਸਮਝੌਤੇ ਨੂੰ ਪ੍ਰਵਾਨਗੀ ਦੇਣ ਲਈ ਬਿੱਲ ਪਾਸ ਕਰਨ ਵਾਸਤੇ ਅਗੇ ਆਉਣ ਦੀ ਅਪੀਲ ਕੀਤੀ। ਬਾਈਡਨ ਨੇ ਕਿਹਾ ਕਿ ਇਹ ਕੰਮ ਸੌਖਾ ਨਹੀਂ ਹੈ ਪਰੰਤੂ ਸਾਨੂੰ ਇਸ ਨੂੰ ਕਰਨਾ ਪਵੇਗਾ ਕਿਉਂਕਿ ਸਾਡੀ ਅਰਥਵਿਵਸਥਾ ਜੋੋਖਮ ਵਿਚ ਹੈ।
ਇਸ ਤੋਂ ਪਹਿਲਾਂ ਰਾਸ਼ਟਰਪਤੀ ਨੇ ਕਾਂਗਰਸ ਨੂੰ ਅਪੀਲ ਕੀਤੀ ਸੀ ਕਿ ਲੇਬਰ ਯੂਨੀਅਨਾਂ ਤੇ ਮੈਨੇਜਮੈਂਟ ਆਗੂਆਂ ਵੱਲੋਂ ਸਤੰਬਰ ਵਿਚ ਪ੍ਰਵਾਨ ਕੀਤੇ ਆਰਜੀ ਸਮਝੌਤੇ ਨੂੰ ਸਰਕਾਰੀ ਪੱਧਰ ਉਪਰ ਪ੍ਰਵਾਨਗੀ ਦੇਣ ਲਈ ਬਿੱਲ ਤੁਰੰਤ ਪਾਸ ਕੀਤਾ ਜਾਵੇ। ਹਾਲਾਂ ਕਿ 4 ਯੁਨੀਅਨਾਂ ਦੇ ਰੈਂਕ ਐਂਡ ਫਾਈਲ ਮੈਂਬਰ ਆਰਜੀ ਸਮਝੌਤੇ ਨੂੰ ਰੱਦ ਕਰ ਚੁੱਕੇ ਹਨ ਤੇ ਉਹ 9 ਦਸੰਬਰ ਨੂੰ ਹੜਤਾਲ ‘ਤੇ ਜਾਣ ਲਈ ਬਜਿਦ ਹਨ ਪਰੰਤੂ ਬਾਈਡਨ ਨੂੰ ਪੂਰਾ ਭਰੋਸਾ ਹੈ ਕਿ ਬਿੱਲ ਪਾਸ ਹੋ ਜਾਣ ‘ਤੇ ਹੜਤਾਲ ਨਹੀਂ ਹੋਵੇਗੀ।
ਇਥੇ ਵਰਣਨਯੋਗ ਹੈ ਕਿ ਜੇਕਰ ਰੇਲ ਹੜਤਾਲ ਨਹੀਂ ਰੋਕੀ ਜਾਂਦੀ ਤਾਂ ਗੈਸ ਤੇ ਖੁਰਾਕੀ ਪਦਾਰਥਾਂ ਦੀਆਂ ਕੀਮਤਾਂ ਵਿਚ ਉਛਾਲ ਆ ਸਕਦਾ ਹੈ ਜਿਸ ਕਾਰਨ ਪਹਿਲਾਂ ਤੋਂ ਹੀ ਮਹਿੰਗਾਈ ਦਾ ਸਾਹਮਣਾ ਕਰ ਰਹੇ ਲੋਕਾਂ ਨੂੰ ਨਵੀਆਂ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਰਾਸ਼ਟਰਪਤੀ ਕਿਸੇ ਵੀ ਹਾਲਤ ਵਿਚ ਅਜਿਹਾ ਨਾ ਹੋੋਣ ਦੇਣ ਲਈ ਯਤਨਸ਼ੀਲ ਹਨ। ਇਥੇ ਇਹ ਵੀ ਜਿਕਰਯੋਗ ਹੈ ਕਿ ਰਾਸ਼ਟਰਪਤੀ ਦੇ ਯਤਨਾਂ ਸਦਕਾ ਹੀ ਸਤੰਬਰ ਵਿਚ ਆਰਜੀ ਸਮਝੌਤਾ ਸਿਰੇ ਚੜਿਆ ਸੀ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ