ਯੈੱਸ ਪੰਜਾਬ
ਚੰਡੀਗੜ੍ਹ, 12 ਅਪ੍ਰੈਲ, 2021:
ਸ਼੍ਰੋਮਣੀ ਅਕਾਲੀ ਦਲ ਵੱਲੋਂ ਟਿਕਟਾਂ ਦੀ ਕੀਤੀ ਜਾ ਰਹੀ ‘ਅਗੇਤੀ ਬਿਜਾਈ’ ਨੇ ਸਮੇਂ ਤੋਂ ਪਹਿਲਾਂ ਹੀ ਕਈ ‘ਅਗੇਤੀਆਂ’ ਮੁਸ਼ਕਿਲਾਂ ਵੀ ਖੜ੍ਹੀਆਂ ਕਰਨੀਆਂ ਸ਼ੁਰੂ ਕਰ ਦਿੱਤੀਆਂ ਹਨ।
ਪਾਰਟੀ ਦੇ ਪ੍ਰਧਾਨ ਸ: ਸੁਖ਼ਬੀਰ ਸਿੰਘ ਬਾਦਲ ਵੱਲੋਂ 2022 ਚੋਣਾਂ ਦੇ ਮੱਦੇਨਜ਼ਰ ਹੁਣ ਤਕ ਐਲਾਨੀਆਂ ਗਈਆਂ 6 ਟਿਕਟਾਂ ਵਿੱਚੋਂ 2 ਹਲਕਿਆਂ ਵਿੱਚ ਬਗਾਵਤੀ ਸੁਰ ਸਾਹਮਣੇ ਆਏ ਹਨ।
ਪੰਜਾਬ ਸਰਕਾਰ ਵੱਲੋਂ ਰਾਜਸੀ ਰੈਲੀਆਂ ’ਤੇ ਪਾਬੰਦੀ ਤੋਂ ਬਾਅਦ ਸ: ਸੁਖ਼ਬੀਰ ਸਿੰਘ ਬਾਦਲ ਵੱਲੋਂ ਬਿਨਾਂ ਰੈਲੀ ਕੀਤਿਆਂ ਐਲਾਨੀ ਗਈ 6ਵੀਂ ਟਿਕਟ ਨੇ ਵੀ ਅਕਾਲੀ ਦਲ ਦੇ ਅੰਦਰ ਸਿਆਸੀ ਹਲਚਲ ਕਰ ਦਿੱਤੀ ਹੈ।
ਸ: ਸੁਖ਼ਬੀਰ ਸਿੰਘ ਬਾਦਲ ਨੇ ਮੌੜ ਤੋਂ ਚੋਣ ਲੜਦੇ ਆਏ ਸਾਬਕਾ ਮੰਤਰੀ ਸ: ਜਨਮੇਜਾ ਸਿੰਘ ਸੇਖੋਂ ਨੂੰ ਜ਼ੀਰਾ ਹਲਕੇ ਤੋਂ ਪਾਰਟੀ ਦਾ ਉਮੀਦਵਾਰ ਐਲਾਨਿਆ ਸੀ ਪਰ ਅੱਜ ਇਸ ਹਲਕੇ ਦੇ ਟਕਸਾਲੀ ਅਕਾਲੀ ਪਰਿਵਾਰ ਨਾਲ ਸੰਬੰਧਤ ਮਰਹੂਮ ਅਕਾਲੀ ਆਗੂ ਸ: ਹਰੀ ਸਿੰਘ ਜ਼ੀਰਾ ਦੇ ਬੇਟੇ ਸ: ਅਵਤਾਰ ਸਿੰਘ ਮਿੰਨਾ ਨੇ ਐਲਾਨ ਕੀਤਾ ਕਿ ਉਹ ਇੱਥੋਂ ਅਜ਼ਾਦ ਉਮੀਦਵਾਰ ਵਜੋਂ ਚੋਣ ਲੜਣਗੇ।
ਜ਼ਿਕਰਯੋਗ ਹੈ ਕਿ ਇਸ ਹਲਕੇ ਤੋਂ ਪਹਿਲਾਂ ਸ: ਹਰੀ ਸਿੰਘ ਜ਼ੀਰਾ ਅਕਾਲੀ ਟਿਕਟ ’ਤੇ ਚੋਣ ਲੜਦੇ ਅਤੇ ਜਿੱਤਦੇ ਰਹੇ ਹਨ ਹਾਲਾਂਕਿ ਇਸ ਵੇਲੇ ਇਹ ਸੀਟ ਕਾਂਗਰਸ ਦੇ ਕਬਜ਼ੇ ਹੇਠ ਹੈ ਅਤੇ ਇੱਥੋਂ ਸ: ਕੁਲਬੀਰ ਸਿੰਘ ਜ਼ੀਰਾ ਕਾਂਗਰਸ ਦੇ ਵਿਧਾਇਕ ਹਨ। ਸ: ਹਰੀ ਸਿੰਘ ਜ਼ੀਰਾ ਅਗਸਤ 2020 ਵਿੱਚ ਅਕਾਲ ਚਲਾਣਾ ਕਰ ਗਏ ਸਨ।
ਇਸ ਮਗਰੋਂ ਅਕਾਲੀ ਦਲ ਵੱਲੋਂ ਜ਼ੀਰਾ ਪਰਿਵਾਰ ਦੇ ਹੱਕ ਨੂੰ ਅਣਗੌਲਿਆਂ ਕਰਦਿਆਂ ਇਸ ਸੀਟ ਤੋਂ ਸ: ਜਨਮੇਜਾ ਸਿੰਘ ਸੇਖੋਂ ਨੂੰ ਉਮੀਦਵਾਰ ਐਲਾਨਿਆ ਗਿਆ ਪਰ ਹੁਣ ਸ: ਜ਼ੀਰਾ ਦੇ ਬੇਟ ਸ: ਅਵਤਾਰ ਸਿੰਘ ਮਿੰਨਾ ਵੱਲੋਂ ਅਜ਼ਾਦ ਚੋਣ ਲੜਨ ਦੇ ਐਲਾਨ ਨਾਲ ਸਥਿਤੀ ਦਿਲਚਸਪ ਬਣ ਗਈ ਹੈ।
ਖ਼ੇਮਕਰਨ ਦਾ ਖੜਕਾ ਦੜਕਾ
ਜ਼ਿਕਰਯੋਗ ਹੈ ਕਿ ਸ਼੍ਰੋਮਣੀ ਅਕਾਲੀ ਦਲ ਵੱਲੋਂ ਟਿਕਟਾਂ ਦੇ ਅਗੇਤੇ ਐਲਾਨ ਨਾਲ ਸਮੱਸਿਆਵਾਂ ਦਾ ਪਿਟਾਰਾ ਸ: ਸੁਖ਼ਬੀਰ ਸਿੰਘ ਬਾਦਲ ਵੱਲੋਂ ਐਲਾਨੀ ਦੂਜੀ ਟਿਕਟ ਦੇ ਨਾਲ ਹੀ ਸ਼ੁਰੂ ਹੋ ਗਿਆ ਸੀ। ਉਨ੍ਹਾਂ ਨੇ ਇੱਥੋਂ ਸਾਬਕਾ ਵਿਧਾਇਕ ਅਤੇ ਹਲਕਾ ਇੰਚਾਰਜ ਸ: ਵਿਰਸਾ ਸਿੰਘ ਵਲਟੋਹਾ ਨੂੰ ਉਮੀਦਵਾਰ ਐਲਾਨਿਆ ਸੀ।
ਯਾਦ ਰਹੇ ਕਿ ਇਸ ਟਿਕਟ ਦੇ ਐਲਾਨ ਤੋਂ ਕੁਝ ਹੀ ਦਿਨ ਪਹਿਲਾਂ ਸ: ਸੁਖ਼ਬੀਰ ਸਿੰਘ ਬਾਦਲ ਦੇ ਬਹਿਨੋਈ, ਪੱਟੀ ਹਲਕੇ ਦੇ ਇੰਚਾਰਜ ਅਤੇ ਪੰਜਾਬ ਦੇ ਸਾਬਕਾ ਮੰਤਰੀ ਸ: ਆਦੇਸ਼ ਪ੍ਰਤਾਪ ਸਿੰਘ ਕੈਰੋਂ ਵੱਲੋਂ ਹਲਕਾ ਖ਼ੇਮਕਰਨ ਵਿੱਚ ਆ ਕੇ ਇਹ ਐਲਾਨ ਕੀਤਾ ਗਿਆ ਸੀ ਕਿ 2022 ਚੋਣਾਂ ਦੌਰਾਨ ਕੈਰੋਂ ਪਰਿਵਾਰ ਦਾ ਹੀ ਕੋਈ ਮੈਂਬਰ ਖ਼ੇਮਕਰਨ ਤੋਂ ਚੋਣ ਲੜੇਗਾ।
ਇਸ ਐਲਾਨ ਤੋਂ ਲੋਹੇ ਲਾਖ਼ੇ ਹੋਏ ਸ: ਵਲਟੋਹਾ ਨੇ ਸ: ਕੈਰੋਂ ’ਤੇ ਤਿੱਖੇ ਪਲਟਵਾਰ ਕਰਦਿਆਂ ਕਰੜੀ ਭਾਸ਼ਾ ਦਾ ਇਸਤੇਮਾਲ ਕਰਨ ਤੋਂ ਇਲਾਵਾ ਇਹ ਐਲਾਨ ਵੀ ਕਰ ਦਿੱਤਾ ਸੀ ਕਿ 2022 ਵਿੱਚ ਪੱਟੀ ਤੋਂ ਵਲਟੋਹਾ ਪਰਿਵਾਰ ਦਾ ਕੋਈ ਮੈਂਬਰ ਚੋਣ ਲੜੇਗਾ।
ਚੰਦ ਦਿਨਾਂ ਬਾਅਦ ਹੀ ਖ਼ੇਮਕਰਨ ਵਿਖ਼ੇ ਹੋਈ ਰੈਲੀ ਦੌਰਾਨ ਸ: ਸੁਖ਼ਬੀਰ ਸਿੰਘ ਬਾਦਲ ਵੱਲੋਂ ਸ: ਵਲਟੋਹਾ ਨੂੰ ਉਮੀਦਵਾਰ ਐਲਾਨੇ ਜਾਣ ਮਗਰੋਂ ਸ: ਕੈਰੋਂ ਦੇ ਇਕ ਨਜ਼ਦੀਕੀ ਸਿਆਸੀ ਸਲਾਹਕਾਰ ਨੇ ਦਾਅਵਾ ਕੀਤਾ ਸੀ ਕਿ ਇਸ ਨਾਲ ਗੱਲ ਅਜੇ ਖ਼ਤਮ ਨਹੀਂ ਹੋਈ ਅਤੇ ਖ਼ੇਮਕਰਨ ਤੋਂ ਕੈਰੋਂ ਪਰਿਵਾਰ ਵੱਲੋਂ ਸ: ਕੈਰੋਂ ਦੀ ਪਤਨੀ ਅਤੇ ਸ: ਸੁਖ਼ਬੀਰ ਸਿੰਘ ਬਾਦਲ ਦੀ ਭੈਣ ਬੀਬਾ ਪ੍ਰਨੀਤ ਕੌਰ ਹੀ ਚੋਣ ਲੜਣਗੇ।
ਉਸ ਮਗਰੋਂ ਹੁਣ ਤਕ ਸ਼੍ਰੋਮਣੀ ਅਕਾਲੀ ਦਲ ਦੀ ਲੀਡਰਸ਼ਿਪ ਅਤੇ ਕੈਰੋਂ ਪਰਿਵਾਰ ਨੇ ਆਪੋ ਆਪਣੀ ਗੱਲ ਕਹਿ ਦੇਣ ਤੋਂ ਬਾਅਦ ਚੁੱਪ ਵੱਟੀ ਹੋਈ ਹੈ ਅਤੇ ਵੇਖ਼ਣਾ ਦਿਲਚਸਪ ਹੋਵੇਗਾ ਕਿ ਇਸ ਸੀਟ ਦਾ ਨਿਬੇੜਾ ਕਿਵੇਂ ਅਤੇ ਕਿਸ ਦੇ ਹੱਕ ਵਿੱਚ ਹੁੰਦਾ ਹੈ।
