ਯੈੱਸ ਪੰਜਾਬ
ਸ੍ਰੀਨਗਰ, 16 ਅਗਸਤ, 2022:
ਚੰਦਨਵਾੜੀ ਤੋਂ ਪਹਿਲਗਾਮ ਜਾ ਰਹੀ ਜੰਮੂ ਕਸ਼ਮੀਰ ਪੁਲਿਸ ਦੀ ਇਕ ਬੱਸ ਜਿਸ ਵਿੱਚ 37 ਆਈ.ਟੀ.ਬੀ.ਪੀ.ਦੇ ਜਵਾਨ ਅਤੇ 2 ਜੰਮੂ ਕਸ਼ਮੀਰ ਪੁਲਿਸ ਦੇ ਜਵਾਨ ਸਨ, ਹਾਦਸੇ ਦਾ ਸ਼ਿਕਾਰ ਹੋ ਗਈ।
ਦੱਸਿਆ ਜਾ ਰਿਹਾ ਹੈ ਕਿ ਇਹ ਬੱਸ ਬਰੇਕ ਫ਼ੇਲ੍ਹ ਹੋਣ ਕਾਰਨ ਹੇਠਾਂ ਖੱਡ ਵਿੱਚ ਜਾ ਪਈ ਜਿੱਥੇ ਇਕ ਖੂਨੀ ਨਾਲਾ ਵੀ ਵਗਦਾ ਹੈ ਅਤੇ ਬੁਰੀ ਤਰ੍ਹਾਂ ਨੁਕਸਾਨੀ ਗਈ ਜਿਸ ਨਾਲ ਵੱਡੀ ਗਿਣਤੀ ਵਿੱਚ ਜਵਾਨ ਗੰਭੀਰ ਜ਼ਖ਼ਮੀ ਹੋ ਗਏ।
ਪਤਾ ਲੱਗਾ ਹੈ ਕਿ ਇਕ ਦਰਜਨ ਤੋਂ ਵੱਧ ਜਵਾਨਾਂ ਦੀ ਹਾਲਤ ਗੰਭੀਰ ਹੈ ਅਤੇ ਪ੍ਰਸ਼ਾਸਨ ਹੁਣ ਤਕ 6 ਜਵਾਨਾਂ ਦੇ ਸ਼ਹੀਦ ਹੋਣ ਦੀ ਪੁਸ਼ਟੀ ਕਰ ਚੁੱਕੇ ਹਨ।
ਗੰਭੀਰ ਜ਼ਖ਼ਮੀ ਜਵਾਨਾਂ ਨੂੰ ਹੈਲੀਕਾਪਟਰ ਰਾਹੀਂ ਜੰਮੂ ਦੇ ਸਰਕਾਰੀ ਹਸਪਤਾਲ ਵਿੱਚ ਸ਼ਿਫ਼ਟ ਕੀਤਾ ਗਿਆ ਹੈ ਜਦਕਿ ਕੁਝ ਹੋਰਨਾਂ ਦਾ ਇਲਾਜ ਰਾਮਬਨ ਵਿਖੇ ਚੱਲ ਰਿਹਾ ਹੈ।
37 ਆਈ.ਟੀ.ਬੀ.ਪੀ. ਜਵਾਨਾਂ ਦੀ ਇਹ ਟੁਕੜੀ ਅਮਰਨਾਥ ਯਾਤਰਾ ਦੀ ਸੁਰੱਖ਼ਿਆ ਲਈ ਤਾਇਨਾਤ ਸੀ ਅਤੇ ਹੁਣ ਯਾਤਰਾ ਦੀ ਸਮਾਪਤੀ ਤੋਂ ਬਾਅਦ ਇਨ੍ਹਾਂ ਨੂੰ ਵਾਪਿਸ ਆਪਣੇ ਟਿਕਾਣੇ ’ਤੇ ਲਿਆਂਦਾ ਜਾ ਰਿਹਾ ਸੀ।
ਘਟਨਾ ਸਵੇਰੇ ਲਗਪਗ 9 ਵਜੇ ਤੋਂ ਕੁਝ ਸਮਾਂ ਪਹਿਲਾਂ ਵਾਪਰੀ ਅਤੇ ਸੜਕ ਤੋਂ ਹੇਠਾਂ ਜਾਂਦੀ ਇਹ ਬੱਸ ਕਾਫ਼ੀ ਹੇਠਾਂ ਜਾ ਕੇ ਨਾਲੇ ਦੇ ਕੋਲ ਦਰਖ਼ਤਾਂ ਵਿੱਚ ਫ਼ਸ ਕੇ ਬੁਰੀ ਤਰ੍ਹਾਂ ਨੁਕਸਾਨੀ ਗਈ। ਕਿਹਾ ਜਾ ਰਿਹਾ ਹੈ ਕਿ ਨਾਲੇ ਵਿੱਚ ਪਾਣੀ ਬਹੁਤ ਜ਼ਿਆਦਾ ਠੰਢਾ ਹੋਣ ਕਰਕੇ ਵੀ ਜ਼ਖ਼ਮੀ ਜਵਾਨਾਂ ਲਈ ਹੋਰ ਮੁਸੀਬਤ ਬਣ ਗਿਆ।
ਮੌਕੇ ’ਤੇ ਰਾਹਗੀਰਾਂ ਅਤੇ ਇਲਾਕਾ ਨਿਵਾਸੀਆਂ ਵੱਲੋਂ ਪੁਲਿਸ ਅਤੇ ਪ੍ਰਸ਼ਾਸ਼ਨ ਨੂੰ ਸੂਚਿਤ ਕਰਨ ਤੋਂ ਇਲਾਵਾ ਚਲਾਏ ਜਾ ਰਹੇ ਰਾਹਤ ਅਤੇ ਬਚਾਅ ਕਾਰਜਾਂ ਵਿੱਚ ਵੀ ਮਦਦ ਕੀਤੀ ਜਾ ਰਹੀ ਹੈ।
ਮੁਹੰਮਦ ਅਹਿਮਦ ਨਾਂਅ ਦੇ ਇਕ ਜਵਾਨ ਨੇ ਹਸਪਤਾਲ ਪਹੁੰਚਣ ਤੋਂ ਪਹਿਲਾਂ ਹੀ ਦਮ ਤੋੜ ਦਿੱਤਾ ਸੀ। ਗੰਭੀਰ ਜ਼ਖ਼ਮੀਆਂ ਵਿੱਚ ਏ.ਐਸ.ਆਈ.ਨਾਰ ਸਿੰਘ, ਏ.ਐਸ.ਆਈ. ਸੰਤੋਸ਼ ਕੁਮਾਰ, ਏ.ਐਸ.ਆਈ. ਅਸ਼ੋਕ, ਕਾਂਸਟੇਬਲ ਅਮਿਤ ਕੁਮਾਰ, ਕਾਂਸਟੇਬਲ ਮੁਹਿੰਦਰ ਕੁਮਾਰ, ਹੈਡ ਕਾਂਸਟੇਬਲ ਅਰੁਨ ਕੁਮਾਰ, ਕਾਂਸਟੇਬਲ ਮੁਹੰਮਦ ਅਨੀਸ ਅਨਸਾਰੀ, ਕਾਂਸਟੇਬਲ ਸੁਨੀਲ ਕੁਮਾਰ ਆਦਿ ਸ਼ਾਮਲ ਸਨ।
ਯੈੱਸ ਪੰਜਾਬ ਦੀਆਂ ਪੰਜਾਬੀ ਖ਼ਬਰਾਂ ਲਈ ਇੱਥੇ ਕਲਿੱਕ ਕਰਕੇ ਸਾਡਾ ਫ਼ੇਸਬੁੱਕ ਪੇਜ ਲਾਈਕ ਕਰੋ
