ਯੈੱਸ ਪੰਜਾਬ
ਜਲੰਧਰ, 29 ਨਵੰਬਰ, 2020:
ਜਲੰਧਰ ਦੀ ਇਕ ਹੋਰ ਸਪੋਰਟਸ ਬ੍ਰਾਂਡ ਰਕਸ਼ਕ, ਸੁਰਜੀਤ ਹਾਕੀ ਕੋਚਿੰਗ ਕੈਂਪ ਵਿਚ ਭਾਗ ਲੈ ਰਹੇ ਸਾਰੇ ਖਿਡਾਰੀਆਂ ਨੂੰ ਹਰ ਕਿਸਮ ਦੇ ਹਾਕੀ ਉਪਕਰਣ ਅਤੇ ਟ੍ਰੈਕ ਸੂਟ ਆਦਿ ‘ਤੇ 50% ਦੀ ਛੋਟ ਪ੍ਰਦਾਨ ਕਰਨ ਲਈ ਅੱਗੇ ਆਇਆ ਹੈ।
ਸੁਰਜੀਤ ਹਾਕੀ ਸੁਸਾਇਟੀ, ਜਲੰਧਰ ਦੇ ਸਕੱਤਰ ਇਕਬਾਲ ਸਿੰਘ ਸੰਧੂ ਅਨੁਸਾਰ ਰਕਸ਼ਕ ਇਕ ਦੂਜੀ ਸਪੋਰਟਸ ਫਰਮ ਹੈ ਜੋ ਸੁਰਜੀਤ ਹਾਕੀ ਕੈਂਪਰਾਂ ਨੂੰ 50% ਦੀ ਛੋਟ ਦੇਣ ਲਈ ਅੱਗੇ ਆਈ ਹੈ। ਇਸ ਤੋਂ ਪਹਿਲਾਂ, ਅਲਫ਼ਾ ਹਾਕੀ ਦੇ ਨਿਰਮਾਤਾ ਨੇ ਕੈਂਪਰਾਂ ਨੂੰ ਵੀ ਇਸੇ ਕਿਸਮ ਦੀ ਛੋਟ ਦੀ ਘੋਸ਼ਣਾ ਕੀਤੀ ਸੀ।
ਉਨ੍ਹਾਂ ਦੱਸਿਆ ਕਿ ਜਲੰਧਰ ਦੀ ਇਸ ਫਰਮ ਦੇ ਮੈਨੇਜਿੰਗ ਡਾਇਰੈਕਟਰ ਸੰਜੇ ਕੋਹਲੀ ਨੇ ਅੱਜ ਖ਼ਿਡਾਰੀਆਂ ਨੂੰ ਉਕਤ ਛੋਟ ਦੇਣ ਦੇ ਨਾਲ ਨਾਲ ਚੱਲ ਰਹੇ ਹਾਕੀ ਕੋਚਿੰਗ ਕੈਂਪ ਵਿਚ ਹਿੱਸਾ ਲੈਣ ਵਾਲੇ 14 ਤੋਂ 19 ਸਾਲ ਦੀ ਉਮਰ ਵਰਗ ਦੇ ਖਿਡਾਰੀਆਂ ਨੂੰ 21 ਹਾਕੀਆਂ ਵੀ ਦੇਣ ਦਾ ਐਲਾਨ ਕੀਤਾ ਹੈ।
ਸੁਰਜੀਤ ਹਾਕੀ ਸੁਸਾਇਟੀ ਦੇ ਡਾਇਰੈਕਟਰ (ਕੋਚਿੰਗ ਕੈਂਪ) ਸੁਰਿੰਦਰ ਸਿੰਘ ਭਾਪਾ ਨੇ ਸਮੂਹ ਮੌਜੂਦਾ ਤੇ ਸਾਬਕਾ ਓਲੰਪਿਅਨ ਅਤੇ ਅੰਤਰਰਾਸ਼ਟਰੀ ਖਿਡਾਰੀਆਂ ਨੂੰ ਅਪੀਲ ਕੀਤੀ ਕਿ ਉਹ ਸਾਡੇ ਰਾਜ ਵਿੱਚ ਹਾਕੀ ਦੀ ਕੌਮੀ ਖੇਡ ਨੂੰ ਮੁੜ ਸੁਰਜੀਤ ਕਰਨ ਅਤੇ ਦੇਸ਼ ਦੀ ਹਾਕੀ ਦੀ ਗੁਆਚੀ ਹੋਈ ਸ਼ਾਨ ਨੂੰ ਮੁੜ ਬਹਾਲ ਕਰਨ ਲਈ ਸੁਰਜੀਤ ਹਾਕੀ ਕੋਚਿੰਗ ਕੈਂਪ ਦੀ ਤਰਜ ਉਪਰ ਆਪਣੇ ਆਪਣੇ ਪਿੰਡ ਜਾਂ ਸ਼ਹਿਰ ਵਿਖੇ ਕੋਚਿੰਗ ਕੈਂਪ ਦੀ ਸ਼ੁਰੂਆਤ ਕਰਦੇ ਹੋਏ ਉਭਰ ਰਹੇ ਖਿਡਾਰੀਆਂ ਨੂੰ ਹਾਕੀ ਦੀ ਟ੍ਰੇਨਿੰਗ ਦੇਣ ਦੇ ਉਪਰਾਲੇ ਕਰਨ ।
ਸੁਰਿੰਦਰ ਸਿੰਘ ਭਾਪਾ ਨੇ ਸਮੂਹ ਮਾਪਿਆਂ ਨੂੰ ਅਪੀਲ ਕੀਤੀ ਕਿ ਉਹ ਆਪਣੇ ਬੱਚਿਆਂ ਨੂੰ ਹਾਕੀ ਸਿੱਖਣ ਲਈ ਇਸ ਕੈਂਪ ਵਿੱਚ ਭੇਜਣ ਕਿਉਂਕਿ ਇਸ ਕੈਂਪ ਵਿੱਚ ਆਉਣ ਲਈ ਕੋਈ ਫੀਸ ਨਹੀਂ ਲਈ ਜਾ ਰਹੀ ਅਤੇ ਸਿਖਲਾਈ ਬਿਲਕੁਲ ਮੁਫਤ ਹੈ । ਸੁਰਿੰਦਰ ਸਿੰਘ ਭਾਪਾ ਨੇ ਅੱਗੇ ਦੱਸਿਆ ਕਿ ਹਾਕੀ ਦੀਆਂ ਸਟਿਕਸ ਅਤੇ ਫਲਾਂ ਤੋਂ ਇਲਾਵਾ ਅਮਰੀਕਾ ਦੇ ਟੂਟ ਬ੍ਰਦਰਜ਼ ਵੱਲੋਂ ਉਪਲਭਧ ਕਰਵਾਏ ਜਾਣ ਵਾਲੇ ਭਿੱਜੇ ਬਦਾਮ ਵੀ ਹਿੱਸਾ ਲੈਣ ਵਾਲੇ ਖਿਡਾਰੀਆਂ ਨੂੰ ਰੋਜ਼ਾਨਾ ਖੁਰਾਕ ਵਜੋਂ ਦਿੱਤਾ ਜਾ ਰਹੇ ਹਨ ।