ਯੈੱਸ ਪੰਜਾਬ
ਬਠਿੰਡਾ, 22 ਅਕਤੂਬਰ, 2020:
ਬਠਿੰਡਾ ਵਿੱਚ ਅੱਜ ਇਕ ਵਿਅਕਤੀ ਵੱਲੋਂ ਆਪਣੇ ਘਰ ਵਿੱਚ ਆਪਣੀ ਪਤਨੀ ਅਤੇ ਦੋ ਬੱਚਿਆਂ ਨੂੰ ਗੋਲੀਆਂ ਮਾਰਣ ਉਪਰੰਤ ਖ਼ੁਦ ਨੂੰ ਵੀ ਗੋਲੀ ਮਾਰ ਕੇ ਆਤਮਹੱਤਿਆ ਕਰ ਲਈ।
ਬਠਿੰਡਾ ਦੇ ਪੋਸ਼ ਇਲਾਕੇ ਗਰੀਨ ਸਿਟੀ ਕਾਲੋਨੀ ਦੀ ਆਲੀਸ਼ਾਨ ਕੋਠੀ ਵਿੱਚ ਇਸ ਵਾਰਦਾਤ ਨੂੰ ਦਵਿੰਦਰ ਗਰਗ ਨਾਂਅ ਦੇ ਵਪਾਰੀ ਨੇ ਅੰਜਾਮ ਦਿੱਤਾ। ਉਹ ਅਜੇ ਕੁਝਹੀ ਸਮਾਂ ਪਹਿਲਾਂ ਇਸ ਕਿਰਾਏ ਦੀ ਕੋਠੀ ਵਿੱਚ ਆਇਆ ਸੀ ਹਾਲਾਂਕਿ ਇਸ ਤੋਂ ਪਹਿਲਾਂ ਬਠਿੰਡਾ ਵਿੱਚ ਹੀ ਉਸਨੇ ਆਪਣੀ ਇਕ ਬਹੁਤ ਆਲੀਸ਼ਾਨ ਕੋਠੀ ਬਣਾਈ ਸੀ ਜੋ ਵਪਾਰ ਵਿੱਚ ਘਾਟੇ ਕਾਰਨ ਉਸਨੂੰ ਵੇਚਣੀ ਪੈ ਗਈ ਸੀ।
ਮ੍ਰਿਤਕਾਂ ਵਿੱਚ 40 ਸਾਲਾ ਦਵਿੰਦਰ ਗਰਗ ਤੋਂ ਇਲਾਵਾ ਉਸਦੀ 38 ਸਾਲਾ ਪਤਨੀ ਅਨੀਤਾ ਗਰਗ, ਇਕ 14 ਸਾਲਾ ਬੇਟਾ ਆਰੁਸ਼ ਗਰਗ ਅਤੇ ਇਕ 10 ਸਾਲਾ ਬੇਟੀ ਮੁਸਕਾਨ ਗਰਗ ਸ਼ਾਮਿਲ ਹਨ।
ਜਾਣਕਾਰੀ ਅਨੁਸਾਰ ਦਵਿੰਦਰ ਗਰਗ ਨੇ ਆਪਣੇ ਘਰ ਦੇ ਬੈੱਡਰੂਮ ਵਿੱਚ ਪਹਿਲਾਂ ਦੋਹਾਂ ਬੱਚਿਆਂ ਨੂੰ ਗੋਲੀ ਮਾਰੀ ਅਤੇ ਫ਼ਿਰ ਪਤਨੀ ਨੂੰ ਵੀ ਗੋਲੀ ਮਾਰ ਦਿੱਤੀ। ਇਸ ਉਪਰੰਤ ਉਸਨੇ ਆਪਣੇ ਆਪ ਨੂੰ ਵੀ ਗੋਲੀ ਮਾਰ ਲਈ। ਗੋਲੀਆਂ ਚੱਲਣ ਦੀ ਆਵਾਜ਼ ਨਾਲ ਇਲਾਕਾ ਦਹਿਲ ਗਿਆ ਅਤੇ ਪੁਲਿਸ ਨੂੰ ਸੂਚਿਤ ਕੀਤਾ ਗਿਆ।
ਪਤਾ ਲੱਗਾ ਹੈ ਕਿ ਇਹ ਪਰਿਵਾਰ ਕੁਝ ਸਮਾਂ ਪਹਿਲਾਂ ਹੀ ਇਸ ਇਲਾਕੇ ਵਿੱਚ ਸ਼ਿਫ਼ਟ ਹੋਇਆ ਸੀ।
ਆਰਥਿਕ ਤੰਗੀ ਦਾ ਸ਼ਿਕਾਰ ਹੋ ਕੇ ਪਰੇਸ਼ਾਨੀ ਦੇ ਦੌਰ ਵਿੱਚੋਂ ਗੁਜ਼ਰ ਰਹੇ ਦੱਸੇ ਜਾਂਦੇ ਦਵਿੰਦਰ ਗਰਗ ਨੇ 8 ਸਫ਼ਿਆਂ ਦਾ ਇਕ ਲੰਬਾ ਚੌੜਾ ਸੁਸਾਈਡ ਨੋਟ ਛੱਡਿਆ ਹੈ ਜਿਸ ਦੇ ਆਧਾਰ ’ਤੇ ਪੁਲਿਸ ਨੇ 9 ਵਿਅਕਤੀਆਂ ਦੇ ਖਿਲਾਫ਼ ਮਾਮਲਾ ਦਰਜ ਕੀਤਾ ਹੈ। ਉਹ ਚਿੱਟ ਫੰਡ, ਆਨਲਾਈਨ ਟਰੇਡਿੰਗ ਅਤੇ ਬਿਟਕੁਆਇਨ ਦੇ ਕਾਰੋਬਾਰ ਨਾਲ ਸੰਬੰਧਤ ਦੱਸਿਆ ਜਾ ਰਿਹਾ ਹੈ।
ਘਟਨਾ ਦੀ ਸੂਚਨਾ ਮਿਲਦੇ ਹੀ ਐਸ.ਐਸ.ਪੀ. ਬਠਿੰਡਾ ਦੀ ਅਗਵਾਈ ਵਿੱਚ ਪੁਲਿਸ ਪਾਰਟੀ ਮੌਕੇ ’ਤੇ ਪੁੱਜੀ ਹੈ ਅਤੇ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।
ਇਸ ਮਾਮਲੇ ਵਿੱਚ ਪੁਲਿਸ ਨੇ ਧਾਰਾ 306 ਤਹਿਤ ਕੇਸ ਦਰਜ ਕੀਤਾ ਹੈ। ਜਿਨ੍ਹਾਂ ਵਿਅਕਤੀਆਂ ਖਿਲਾਫ਼ ਕੇਸ ਦਰਜ ਕੀਤਾ ਗਿਆ ਹੈ ਉਨ੍ਹਾਂ ਵਿੱਚੋਂ ਕੁਝ ਬਠਿੰਡਾ ਨਾਲ ਸੰਬੰਧਤ ਹਨ ਜਦਕਿ ਕੁਝ ਪੰਜਾਬ ਦੇ ਹੋਰ ਜ਼ਿਲਿ੍ਹਆਂ ਤੋਂ ਹਨ ਹਾਲਾਂਕਿ ਇਕ ਵਿਅਕਤੀ ਦਿੱਲੀ ਨਾਲ ਸੰਬੰਧਤ ਦੱਸਿਆ ਜਾ ਰਿਹਾ ਹੈ।
ਸਾਡਾ ਫ਼ੇਸਬੁੱਕ ਪੇਜ ਲਾਈਕ ਕਰਨ ਲਈ ਕਲਿੱਕ ਕਰੋ
