ਯੈੱਸ ਪੰਜਾਬ
ਮੁੰਬਈ, 15 ਨਵੰਬਰ, 2020:
ਆਈ.ਪੀ.ਐਸ. ਅਧਿਕਾਰੀ ਮੋਹਿਤਾ ਸ਼ਰਮਾ ‘ਕੌਣ ਬਣੇਗਾ ਕਰੋੜਪਤੀ’ ਸੀਜ਼ਨ 12 ਦੀ ਦੂਸਰੀ ਕਰੋੜਪਤੀ ਬਣ ਗਈ ਹੈ।
ਸੁਪਰਸਟਾਰ ਅਮਿਤਾਭ ਬੱਚਨ ਵੱਲੋਂ ਪੇਸ਼ ਕੀਤੇ ਜਾਂਦੇ ਇਸ ‘ਕੁਇਜ਼ ਸ਼ੋਅ’ ਦੇ ਤਾਜ਼ਾ ਸੀਜ਼ਨ ਵਿੱਚ ਕਰੋੜਪਤੀ ਬਣਨ ਵਾਲੀ ਉਹ ਦੂਸਰੀ ਜੇਤੂ ਬਣੀ ਹੈ। ਸੰਜੋਗਵਸ਼ ਇਸ ਸੀਜ਼ਨ ਵਿੱਚ ਇਕ ਹਫ਼ਤੇ ਦੇ ਫ਼ਰਕ ਵਿੱਚ ਹੀ ਹੁਣ ਤਕ ਇਕ ਕਰੋੜ ਜਿੱਤਣ ਵਾਲੀਆਂ ਦੋਵੇਂ ਹੀ ਮਹਿਲਾਵਾਂ ਹਨ ਅਤੇ ਦੋਵੇਂ ਹੀ ਪਹਿਲਾਂ ਤੋਂ ਹੀ ਕਰੋੜਪਤੀ ਦੱਸੀਆਂ ਜਾਂਦੀਆਂ ਹਨ।
ਯਾਦ ਰਹੇ ਕਿ ਇਸ ਤੋਂ ਪਹਿਲਾਂ ਰਾਂਚੀ ਦੀ ਇਕ ‘ਕਮਿਊਨੀਕੇਸ਼ਨ ਪ੍ਰੋਫ਼ੈਸ਼ਨਲ’ ਨਾਜ਼ੀਆ ਨਸੀਮ ਨੇ ਇਕ ਕਰੋੜ ਜਿੱਤਿਆ ਸੀ ਜਿਸ ਦੇ ਹਫ਼ਤੇ ਬਾਅਦ ਹੀ ਮੋਹਿਤਾ ਸ਼ਰਮਾ ਵੀ ਇਕ ਕਰੋੜ ਜਿੱਤਣ ਵਿੱਚ ਸਫ਼ਲ ਰਹੀ ਹੈ।
ਮੋਹਿਤਾ ਸ਼ਰਮਾ ਦੀ ਸ਼ਮੂਲੀਅਤ ਵਾਲਾ ਸ਼ੋਅ 12 ਨਵੰਬਰ ਨੂੰ ਰਿਕਾਰਡ ਕੀਤਾ ਗਿਆ ਸੀ ਅਤੇ ਇਹ 17 ਨਵੰਬਰ ਨੂੰ ਰਾਤ 9 ਵਜੇ ਟੈਲੀਕਾਸਟ ਹੋਣਾ ਹੈ।
31 ਸਾਲਾ ਮੋਹਿਤਾ ਸ਼ਰਮਾ ਮੂਲ ਰੂਪ ਵਿੱਚ ਕਾਂਗੜਾ, ਹਿਮਾਚਲ ਪ੍ਰਦੇਸ਼ ਦੀ ਰਹਿਣ ਵਾਲੀ ਹੈ ਪਰ ਉਸਨੇ ਸਿੱਖ਼ਿਆ ਦਿੱਲੀ ਵਿੱਚ ਰਹਿ ਕੇ ਹੀ ਪ੍ਰਾਪਤ ਕੀਤੀ ਹੈ। ਉਹ ਡੀ.ਪੀ.ਐਸ. ਦਵਾਰਕਾ ਵਿੱਚ ਪੜ੍ਹੀ ਜਿਸ ਮਗਰੋਂ ਉਸਨੇ ਆਪਣੀ ਇੰਜੀਨੀਅਰਿੰਗ ਡਿਗਰੀ ਭਾਰਤੀ ਵਿਦਿਆਪੀਠ ਤੋਂ ਹਾਸਲ ਕੀਤੀ।
2017 ਬੈੱਚ ਦੀ ਆਈ.ਪੀ.ਐਸ. ਅਧਿਕਾਰੀ ਮੋਹਿਤਾ ਸ਼ਰਮਾ, ਜੋ ਭਾਰਤੀ ਚੋਣ ਕਮਿਸ਼ਨ ਵਿੱਚ ਵੀ ਸੇਵਾ ਨਿਭਾਅ ਚੁੱਕੀ ਹੈ, ਇਸ ਵੇਲੇ ਜੰਮੂ ਕਸ਼ਮੀਰ ਵਿੱਚ ਤਾਇਨਾਤ ਹੈ।
ਮੋਹਿਤਾ ਆਈ.ਐਫ.ਅ ੈਸ. ਅਧਿਕਾਰੀ ਰਾਸ਼ੁਲ ਸ਼ਰਮਾ ਨਾਲ ਵਿਆਹੀ ਹੋਈ ਹੈ।
