ਯੈੱਸ ਪੰਜਾਬ
ਲੁਧਿਆਣਾ, 25 ਜਨਵਰੀ, 2022:
ਪੰਜਾਬੀ ਗ਼ੀਤਕਾਰੀ ਦੇ ਬਾਬਾ ਬੋਹੜ ਵਜੋਂ ਜਾਣੇ ਜਾਂਦੇ ਉੱਘੇ ਪੰਜਾਬੀ ਗੀਤਕਾਰ ਦੇਵ ਥਰੀਕਿਆਂਵਾਲਾ ਦਾ ਮੰਗਲਵਾਰ ਤੜਕੇ 2.30 ਵਜੇ ਦਿਹਾਂਤ ਹੋ ਗਿਆ।
83 ਵਰਿ੍ਹਆਂ ਦੇ ਦੇਵ ਥਰੀਕੇ ਵਾਲਾ ਜਿਨ੍ਹਾਂ ਦਾ ਅਸਲ ਨਾਂਅ ਹਰਦੇਵ ਸਿੰਘ ਗਿੱਲ ਸੀ ਹਰਦੇਵ ਦਿਲਗੀਰ ਕਰਕੇ ਵੀ ਜਾਣੇ ਜਾਂਦੇ ਸਨ ਪਰ ਉਨ੍ਹਾਂ ਦੇ ਗ਼ੀਤਾਂ ਨੂੰ ਦੇਵ ਥਰੀਕਿਆਂਵਾਲਾ ਵਜੋਂ ਵੱਡੀ ਪਛਾਣ ਮਿਲੀ।
ਉਨ੍ਹਾਂ ਦਾ ਅੰਤਿਮ ਸਸਕਾਰ ਮੰਗਲਵਾਰ, 25 ਜਨਵਰੀ, 2022 ਨੂੰ ਬਾਅਦ ਦੁਪਹਿਰ 2 ਵਜੇ ਉਨ੍ਹਾਂ ਦੇ ਪਿੰਡ ਥਰੀਕੇ ਸਥਿਤ ਸ਼ਮਸ਼ਾਨਘਾਟ ਵਿਖ਼ੇ ਕੀਤਾ ਜਾਵੇਗਾ।
ਉਹਨਾਂ ਦੀ ਪਤਨੀ ਸ੍ਰੀਮਤੀ ਪ੍ਰੀਤਮ ਕੌਰ 18 ਜੁਲਾਈ, 2018 ਨੂੰ ਅਕਾਲ ਚਲਾਣਾ ਕਰ ਗਏ ਸਨ।
ਗ਼ੀਤਾਂ ਅਤੇ ਕਹਾਣੀਆਂ ਦੀਆਂ ਉਨ੍ਹਾਂ ਦੀਆਂ 35 ਦੇ ਲਗਪਗ ਪੁਸਤਕਾਂ ਪ੍ਰਕਾਸ਼ਿਤ ਹੋਈਆਂ ਸਨ।
ਦੇਵ ਥਰੀਕਿਆਂ ਵਾਲੇ ਵੱਲੋਂ ਲਿਖ਼ੀਆਂ ਕਲੀਆਂ ਨੂੰ ਨਾਮਵਰ ਗਾਇਕ ਕੁਲਦੀਪ ਮਾਣਕ ਨੇ ਗਾਇਆ ਸੀ ਅਤੇ ਕੁਲਦੀਪ ਮਾਣਕ ਨੂੰ ਅੱਜ ਵੀ ਕਲੀਆਂ ਦੇ ਬਾਦਸ਼ਾਹ ਵਜੋਂ ਜਾਣਿਆ ਜਾਂਦਾ ਹੈ।
ਉਨ੍ਹਾਂ ਨੇ ਪੰਜਾਬੀ ਫ਼ਿਲਮਾਂ ਲਈ ਵੀ ਗ਼ੀਤ ਲਿਖ਼ੇ। ਸੁਰਿੰਦਰ ਸ਼ਿੰਦਾ ਦਾ ਗਾਇਆ ‘ਪੁੱਤ ਜੱਟਾਂ ਦੇ’ ਫ਼ਿਲਮ ਦਾ ਟਾਈਟਲ ਗ਼ੀਤ ‘ਪੁੱਤ ਜੱਟਾਂ ਦੇ ਬੁਲਾਉਂਦੇ ਬੱਕਰੇ’ ਵੀ ਉਨ੍ਹਾਂ ਦਾ ਹੀ ਲਿਖ਼ਿਆ ਹੋਇਆ ਸੀ। ਫ਼ਿਲਮ ‘ਬਲਬੀਰ ਭਾਬੀ’ ਦਾ ਕੁਲਦੀਪ ਮਾਣਕ ਦਾ ਗਾਇਆ ਹੋਇਆ ਗ਼ੀਤ ‘ਸੁੱਚਿਆ ਵੇ ਭਾਬੀ ਤੇਰੀ’ ਵੀ ਉਨ੍ਹਾਂ ਨੇ ਹੀ ਲਿਖ਼ਿਆ ਸੀ।
ਦੇਵ ਥਰੀਕੇਵਾਲਾ ਨੇ ਹੋਰ ਕਈਆਂ ਫ਼ਿਲਮਾਂ ਦੇ ਗ਼ੀਤ ਲਿਖ਼ੇ। ਸਨ ਜਿਨ੍ਹਾਂ ਵਿੱਚ ਜੱਟ ਜਿਊਣਾ ਮੌੜ, ਲੰਬੜਦਾਰਨੀ, ਸੱਸੀ ਪੁੰਨੂੰ, ਗਭਰੂ ਪੰਜਾਬ ਦਾ, ਜੱਟ ਤੇ ਜ਼ਮੀਨ, ਜੱਟ ਪੰਜਾਬ ਦਾ, ਜੱਗਾ ਡਾਕੂ, ਉੱਚਾ ਪਿੰਡ, ਦੇਹਿ ਸ਼ਿਵਾ ਬਰ ਮੋਹਿ, ਦੀਵਾ ਬਲੇ ਸਾਰੀ ਰਾਤ, ਸ਼ੇਰਾਂ ਦੇ ਪੁੱਤ ਸ਼ੇਰ ਆਦਿ ਸ਼ਾਮਲ ਸਨ।
ਉਨ੍ਹਾਂ ਦੇ ਗ਼ੀਤ ਨਰਿੰਦਰ ਬੀਬਾ, ਜਗਮੋਹਨ ਕੌਰ, ਪੰਮੀ ਬਾਈ, ਸਵਰਨ ਲਤਾ, ਕਰਮਜੀਤ ਧੂਰੀ, ਕਰਨੈਲ ਗਿੱਲ ਸਣੇ ਕਈ ਹੋਰ ਪ੍ਰਸਿੱਧ ਗਾਇਕਾਂ ਵੱਲੋਂ ਗਾਏ ਗਏ ਸਨ।