ਯੈੱਸ ਪੰਜਾਬ
ਜਲੰਧਰ, 28 ਨਵੰਬਰ, 2022:
ਮਸ਼ਹੂਰ ਕਾਮੇਡੀਅਨ ਕਾਕੇ ਸ਼ਾਹ ਦੇ ਖਿਲਾਫ਼ ਜਲੰਧਰ ਪੁਲਿਸ ਨੇ ਕਬੂਤਰਬਾਜ਼ੀ ਦਾ ਮਾਮਲਾ ਦਰਜ ਕੀਤਾ ਹੈ।
ਇਹ ਕੇਸ ਰਸਤਾ ਮੁਹੱਲਾ ਨਿਵਾਸੀ ਨਵਨੀਤ ਆਨੰਦ ਦੀ ਸ਼ਿਕਾਇਤ ’ਤੇ ਪੁਲਿਸ ਡਿਵੀਜ਼ਨ ਨੰਬਰ 3 ਵਿੱਚ ਦਰਜ ਕੀਤਾ ਗਿਆ ਹੈ। ਪੁਲਿਸ ਹੁਣ ਗ੍ਰਿਫ਼ਤਾਰੀ ਲਈ ਕਾਕੇ ਸ਼ਾਹ ਦੀ ਭਾਲ ਵਿੱਚ ਹੈ।
ਦੋਸ਼ ਹੈ ਕਿ ਕਾਕੇ ਸ਼ਾਹ ਨੇ ਨਵਨੀਤ ਆਨੰਦ ਨੂੰ ਆਪਣੇ ਨਾਲ ਇੰਗਲੈਂਡ ਲਿਜਾਣ ਲਈ 10 ਲੱਖ ਰੁਪਏ ਵਿੱਚ ਡੀਲ ਕੀਤੀ ਸੀ ਅਤੇ ਇਸ ਵਿੱਚੋਂ 6 ਲੱਖ ਰੁਪਏ ਦੀ ਅਦਾਇਗੀ ਕੀਤੀ ਜਾ ਚੁੱਕੀ ਸੀ ਜਦਕਿ ਬਾਕੀ 4 ਲੱਖ ਰੁਪਏ ਵੀਜ਼ਾ ਲੱਗਣ ’ਤੇ ਅਦਾ ਕੀਤੇ ਜਾਣੇ ਸਨ।
ਨਵਨੀਤ ਦੀ ਸ਼ਿਕਾਇਤ ਹੈ ਕਿ 16 ਫ਼ਰਵਰੀ 2022 ਨੂੰ ਉਸਨੇ ਇੱਕ ਲੱਖ ਰੁਪਏ ਕਾਕੇ ਸ਼ਾਹ ਦੇ ਖ਼ਾਤੇ ਵਿੱਚ ਟਰਾਂਸਫ਼ਰ ਕੀਤੇ ਸਨ ਜਦਕਿ 2 ਲੱਖ 70 ਹਜ਼ਾਰ ਰੁਪਏ 27 ਫ਼ਰਵਰੀ ਨੂੰ ਉਸਦੇ ਭਰਾ ਵਿਨੀਤ ਆਨੰਦ ਨੇ ਵੈਸਟਰਨ ਯੂਨੀਅਨ ਰਾਹੀਂ ਭੇਜੇ ਸਨ। ਇਸ ਤੋਂ ਇਲਾਵਾ 2 ਲੱਖ 30 ਹਜ਼ਾਰ ਰੁਪਏ ਕਾਕੇ ਸ਼ਾਹ ਨੂੰ ਉਸ ਵੇਲੇ ਦਿੱਤੇ ਗਏ ਸਨ ਜਦ ਉਹ ਆਪਣੇ ਇਕ ਸਾਥੀ ਨਾਲ ਉਸਦੇ ਘਰ ਆਇਆ। ਇਸ ਤੋਂ ਇਲਾਵਾ ਉਹ ਬੈਂਕ ਦੀ ਪਾਸਬੁੱਕ ਅਤੇ ਸਟੇਟਮੈਂਟ ਵੀ ਲੈ ਗਏ ਅਤੇ ਭਰੋਸਾ ਦਿੱਤਾ ਕਿ ਜਲਦੀ ਹੀ ਉਸਦਾ ਵੀਜ਼ਾ ਲੱਗ ਜਾਵੇਗਾ।
ਉਹਨਾਂ ਕਿਹਾ ਕਿ ਇੰਨਾ ਸਮਾਂ ਬੀਤ ਜਾਣ ’ਤੇ ਵੀ ਨਾ ਤਾਂ ਉਹਨਾਂ ਦਾ ਵੀਜ਼ਾ ਲੱਗਾ ਅਤੇ ਨਾ ਹੀ ਕਾਕੇ ਸ਼ਾਹ ਪੈਸੇ ਮੋੜ ਰਿਹਾ ਹੈ। ਇਹ ਵੀ ਦੋਸ਼ ਲਗਾਇਆ ਗਿਆ ਹੈ ਕਿ ਪੈਸੇ ਵਾਪਸ ਮੰਗਣ ’ਤੇ ਉਸਨੂੰ ਆਪਣੀ ਰਾਜਸੀ ਪਹੁੰਚ ਦਾ ਹਵਾਲਾ ਦਿੰੰਦਿਆਂਧਮਕੀਆਂ ਦਿੱਤੀਆਂ ਗਈਆਂ।
ਯੈੱਸ ਪੰਜਾਬ ਦੀਆਂ ਪੰਜਾਬੀ ਖ਼ਬਰਾਂ ਲਈ ਇੱਥੇ ਕਲਿੱਕ ਕਰਕੇ ਸਾਡਾ ਫ਼ੇਸਬੁੱਕ ਪੇਜ ਲਾਈਕ ਕਰੋ