ਯੈੱਸ ਪੰਜਾਬ
ਚੰਡੀਗੜ੍ਹ, 6 ਮਾਰਚ, 2021:
ਚੰਡੀਗੜ੍ਹ ’ਚ ਇਨਸਾਨੀਅਤ ਨੂੰ ਸ਼ਰਮਸਾਰ ਕਰਨ ਵਾਲੀ ਘਟਨਾ ਸਾਹਮਣੇ ਆਈ ਹੈ। ਹੈਵਾਨੀਅਤ ਦੀਆਂ ਸਾਰੀਆਂ ਹੱਦਾਂ ਪਾਰ ਕਰਦਿਆਂ ਨਰਸਰੀ ਕਲਾਸ ਦੀ ਇਕ 6 ਸਾਲਾ ਬੱਚੀ ਨਾਲ ਦੁਸ਼ਕਰਮ ਕਰਨ ਤੋਂ ਬਾਅਦ ਉਸਦਾ ਕਤਲ ਕਰ ਦਿੱਤਾ ਗਿਆ।
ਬੱਚੀ ਦੀ ਲਾਸ਼ ਸਨਿਚਰਵਾਰ ਸਵੇਰੇ ਅਰਧਨਗਨ ਹਾਲਤ ਵਿੱਚ ਹੱਲੋਮਾਜਰਾ ਲਾਈਟ ਪੁਆਇੰਟ ਨੇੜੇ ਪੈਂਦੇ ਜੰਗਲ ਵਿੱਚੋਂ ਬਰਾਮਦ ਕੀਤੀ ਗਈ ਹੈ। ਪਤਾ ਲੱਗਾ ਹੈ ਕਿ ਕਿਸੇ ਰਾਹਗੀਰ ਨੇ ਬੱਚੀ ਦੀ ਲਾਸ਼ ਦੇਖ਼ ਕੇ ਪੁਲਿਸ ਨੂੰ ਸੂਚਿਤ ਕੀਤਾ। ਬੱਚੀ ਦੀ ਪਛਾਣ ਕਰ ਲਈ ਗਈ ਹੈ।
ਪਿਛਲੇ 30 ਸਾਲਾਂ ਤੋਂ ਹੱਲੋਮਾਜਰਾ ਵਿੱਚ ਰਹਿੰਦੇ ਪਰਿਵਾਰ ਨਾਲ ਵਾਪਰੀ ਇਸ ਘਟਨਾ ਤੋਂ ਬਾਅਦ ਇਲਾਕੇ ਵਿੱਚ ਸੋਗ ਅਤੇ ਸਨਸਨੀ ਦਾ ਮਾਹੌਲ ਹੈ।
ਬੱਚੀ ਦੇ ਪਿਤਾ ਇਕ ਪ੍ਰਾਈਵੇਟ ਨੌਕਰੀ ਕਰਦੇ ਹਨ ਅਤੇ ਉਨ੍ਹਾ ਦੀ ਬੱਚੀ ਨੇੜੇ ਹੀ ਕਿਸੇ ਕੋਲ ਟਿਊਸ਼ਨ ਪੜ੍ਹਣ ਜਾਂਦੀ ਸੀ। ਸ਼ੁੱਕਰਵਾਰ 5 ਵਜੇ ਟਿਊਸ਼ਨ ਗਈ ਬੱਚੀ ਜਦ ਸ਼ਾਮ ਤਕ ਨਾ ਪਰਤੀ ਤਾਂ ਘਰ ਦਿਆਂ ਨੂੰ ਫ਼ਿਕਰ ਹੋਈ ਅਤੇ ਬੱਚੀ ਦੀ ਤਾਲਾਸ਼ ਸ਼ੁਰੂ ਕਰਨ ਦੇ ਨਾਲ ਨਾਲ ਚੰਡੀਗੜ੍ਹ ਪੁਲਿਸ ਨੂੰ ਸੂਚਿਤ ਕੀਤਾ ਗਿਆ ਪਰ ਸਾਰੀ ਰਾਤ ਦੀ ਤਾਲਾਸ਼ ਦੇ ਬਾਅਦ ਵੀ ਬੱਚੀ ਦੀ ਕੋਈ ਉੱਘ ਸੁੱਘ ਨਾ ਲੱਗੀ।
ਅੱਜ ਸਵੇਰੇ ਬੱਚੀ ਦੀ ਲਾਸ਼ ਬਾਰੇ ਸੂਚਨਾ ਮਿਲਣ ’ਤੇ ਪੁਲਿਸ ਮੌਕੇ ’ਤੇ ਪੁੱਜੀ। ਲਾਸ਼ ਪੋਸਟਮਾਰਟਮ ਲਈ ਭੇਜ ਕੇ ਪੁਲਿਸ ਨੇ ਜਾਂਚ ਦਾ ਕੰਮ ਆਰੰਭਿਆ ਹੈ।
ਪੁਲਿਸ ਵੱਲੋਂ ਇਲਾਕੇ ਦੇ ਸੀ.ਸੀ.ਟੀ.ਵੀ. ਕੈਮਰਿਆਂ ਦੀ ਰਿਕਾਰਡਿੰਗ ਦੀ ਵੀ ਜਾਂਚ ਕੀਤੀ ਜਾ ਰਹੀ ਹੈ ਤਾਂ ਜੋ ਦੋਸ਼ੀ ਬਾਰੇ ਕੋਈ ਸੁਰਾਗ ਮਿਲ ਸਕੇ।
ਇਸੇ ਦੌਰਾਨ ਇਹ ਵੀ ਖ਼ਬਰ ਹੈ ਕਿ ਜਿਸ ਜਗ੍ਹਾ ਤੋਂ ਬੱਚੀ ਦੀ ਲਾਸ਼ ਮਿਲੀ ਹੈ, ਉਸਦੇ ਨੇੜਿਉਂ ਹੀ 2 ਬੈਗ ਮਿਲੇ ਹਨ ਜਿਸ ਵਿੱਚ ਮਰਦਾਨਾ ਕਪੜੇ ਹਨ ਪਰ ਅਜੇ ਇਹ ਸਪਸ਼ਟ ਨਹੀਂ ਹੈ ਕਿ ਇਨ੍ਹਾਂ ਬੈਗਾਂ ਦਾ ਉਕਤ ਘਿਨੌਣੀ ਵਾਰਦਾਤ ਨਾਲ ਕੀ ਸੰਬੰਧ ਹੋ ਸਕਦਾ ਹੈ ਜਾਂ ਫ਼ਿਰ ਕੋਈ ਸੰਬੰਧ ਨਹੀਂ ਹੈ।
*Representational Photograph