ਯੈੱਸ ਪੰਜਾਬ
ਨਵੀਂ ਦਿੱਲੀ, 29 ਨਵੰਬਰ, 2020:
ਦਿੱਲੀ ਦੇ ਬਾਰਡਰ ’ਤੇ ਡਟੀਆਂ ਸੰਘਰਸ਼ਸ਼ੀਲ ਕਿਸਾਨ ਜੱਥੇਬੰਦੀਆਂ ਨੇ ਸਪਸ਼ਟ ਐਲਾਨ ਕਰ ਦਿੱਤਾ ਹੈ ਕਿ ਕਿਸਾਨ ਬਾਰਡਰ ’ਤੇ ਹੀ ਡਟੇ ਰਹਿਣਗੇ ਅਤੇ ਬੁਰਾੜੀ ਨਹੀਂ ਜਾਣਗੇ।
ਦਿੱਲੀ ਦੇ ਸਾਰੇ ਬਾਰਡਰ ਸੀਲ ਕਰਨ ਦਾ ਐਲਾਨ ਕਰਦਿਆਂ ਕਿਸਾਨਾ ਨੇ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਦਾ ਪਹਿਲੀ ਦਸੰਬਰ ਦਾ ਗੱਲਬਾਤ ਦਾ ਜ਼ੁਬਾਨੀ ਸੱਦਾ ਵੀ ਅਪ੍ਰਵਾਨ ਕਰ ਦਿੱਤਾ ਹੈ। ਕਿਸਾਨਾਂ ਦਾ ਕਹਿਣਾ ਹੈ ਕਿ ਪਹਿਲੀ ਗੱਲ ਤਾਂ ਅਜੇ ਤਾਂਈਂ ਕਿਸੇ ਵੀ ਜਥੇਬੰਦੀ ਨੂੰ ਕੋਈ ਰਸਮੀ ਸੱਦਾ ਆਇਆ ਨਹੀਂ ਹੈ ਅਤੇ ਦੂਜਾ ਇਹ ਕਿ ਸ੍ਰੀ ਸ਼ਾਹ ਵੱਲੋਂ ਦਿੱਤਾ ਸੱਦਾ ਸ਼ਰਤ ਦੇ ਨਾਲ ਹੈ ਜੋ ਕਿਸੇ ਵੀ ਤਰ੍ਹਾਂ ਪ੍ਰਵਾਨ ਨਹੀਂ।
ਉਨ੍ਹਾਂ ਦਾ ਕਹਿਣਾ ਹੈ ਕਿ ਸ੍ਰੀ ਅਮਿਤ ਸ਼ਾਹ ਨੇ ਕੇਵਲ ਫ਼ੋਨ ’ਤੇ ਇਹ ਆਖ਼ਿਆ ਸੀ ਕਿ ਕਿਸਾਨਾਂ ਨਾਲ ਪਹਿਲੀ ਦਸੰਬਰ ਨੂੰ ਗੱਲ ਕੀਤੀ ਜਾ ਸਕਦੀ ਹੈ ਬਸ਼ਰਤੇ ਕਿ ਉਹ ਪਹਿਲਾਂ ਆ ਕੇ ਬੁਰਾੜੀ ਵਿਖ਼ੇ ਧਰਨਾ ਲਾਉਣ ਦੀ ਗੱਲ ਮੰਨ ਜਾਣ। ਉਨ੍ਹਾਂ ਸਪਸ਼ਟਕੀਤਾ ਹੈ ਕਿ ਜੇ ਕੋਈ ਬਿਨਾਂ ਸ਼ਰਤ ਸੱਦਾ ਆਵੇਗਾ ਤਾਂ ਉਹ ਗੱਲਬਾਤ ਲਈ ਜ਼ਰੂਰ ਜਾਣਗੇ ਪਰ ਸ਼ਰਤਾਂ ਨਾਲ ਕੋਈ ਵੀ ਸੱਦਾ ਪ੍ਰਵਾਨ ਨਹੀਂ ਕੀਤਾ ਜਾ ਸਕਦਾ।
ਉਕਤ ਫ਼ੈਸਲੇ ਪੰਜਾਬ ਦੀਆਂ 30 ਕਿਸਾਨ ਜਥੇਬੰਦੀਆਂ ਦੀ ਅੱਜ ਸਿੰਘੂ ਬਾਰਡਰ ਵਿਖ਼ੇ ਹੋਈ ਮੀਟਿੰਗ ਵਿੱਚ ਲਏ ਗਏ। ਇਹ ਵੀ ਤੈਅ ਕੀਤਾ ਗਿਆ ਹੈ ਕਿ ਰੋਜ਼ ਸਵੇਰੇ 11 ਵਜੇ ਮੀਟਿੰਗ ਕੀਤੀ ਜਾਇਆ ਕਰੇਗੀ ਤਾਂ ਜੋ ਅਗਲੀ ਰਣਨੀਤੀ ਵਿਚਾਰੀ ਜਾ ਸਕੇ।
ਭਾਰਤੀ ਕਿਸਾਨ ਯੂਨੀਅਨ ਕਾਦੀਆਂ ਦੇ ਪ੍ਰਧਾਨ ਸ: ਹਰਮੀਤ ਸਿੰਘ ਕਾਦੀਆਂ ਨੇ ਆਖ਼ਿਆ ਕਿ ਹੁਣ ‘ਘੇਰਾ ਡਾਲੋ ਡੇਰਾ ਡਾਲੋ’ ਨਾਅਰੇ ਤਹਿਤ ਹੁਣ ਤਕ ਸਿੰਘੂ ਅਤੇ ਬਹਾਦਰਗੜ੍ਹ ਬਾਰਡਰ ਤੋਂ ਇਲਾਵਾ ਮੇਰਠ ਵਾਲੇ ਪਾਸਿਉਂ ਵੀ ਘੇਰਾਬੰਦੀ ਕੀਤੀ ਜਾ ਚੁੱਕੀ ਹੈ ਅਤੇ ਬਾਕੀ ਜਗ੍ਹਾ ਵੀ ਇੰਜ ਹੀ ਬਾਰਡਰ ਸੀਲ ਕੀਤੇ ਜਾਣਗੇ।
ਉਹਨਾਂ ਨੇ ਇਹ ਵੀ ਮੰਗ ਰੱਖੀ ਕਿ ਦਿੱਲੀ ਦੇ ਅੰਦਰ ਅਤੇ ਖ਼ਾਸਕਰ ਬੁਰਾੜੀ ਮੈਦਾਨ ਵਿੱਚ ਪਹੁੰਚ ਚੁੱਕੇ ਕਿਸਾਨਾਂ ਦੀ ਵਾਪਸੀ ਕਰਵਾਈ ਜਾਵੇ ਤਾਂਜੋ ਸਾਰੇ ਇਕ ਜਗ੍ਹਾ ਹੀ ਇਕੱਠੇ ਹੋ ਸਕਣ।
ਇਸ ਤੋਂ ਇਲਾਵਾ ਕਿਸਾਨਾਂ ਨੇ ਕੇਂਦਰ ਸਾਹਮਣੇ 8 ਮੰਗਾਂ ਰੱਖੀਆਂ ਹਨ ਜਿਨ੍ਹਾਂ ਵਿੱਚ 3 ਖ਼ੇਤੀ ਕਾਨੂੂੰਨ ਵਾਪਸ ਲੈਣ, ਬਿਜਲੀ ਸੋਧ ਬਿੱਲ ਅਤੇ ਪਰਾਲੀ ਐਕਟ ਨਾ ਲਿਆਉਣ ਤੋਂ ਇਲਾਵਾ ਕਿਸਾਨਾਂ ਦੀ ਮੁਕੰਮਲ ਕਰਜ਼ਾ ਮੁਆਫ਼ੀ, ਕਿਸਾਨਾਂ ਨੂੰ ਅੱਧੇ ਰੇਟ ’ਤੇ ਡੀਜ਼ਲ ਮੁਹੱਈਆ ਕਰਾਉਣ ਅਤੇ ਦੇਸ਼ ਭਰ ਵਿੱਚ ਗ਼ਲਤ ਕੇਸ ਪਾ ਕੇ ਜੇਲ੍ਹਾਂ ਅੰਦਰ ਡੱਕੇ ਬੁੱਧੀਜੀਵੀਆਂ ਨੂੰ ਰਿਹਾ ਕੀਤਾ ਜਾਵੇ।
ਸ: ਕਾਦੀਆਂ ਅਨੁਸਾਰ ਰੋਜ਼ 11 ਵਜੇ ਤੋਂ 4 ਵਜੇ ਤਕ ਸਟੇਜ ਚੱਲੇਗੀ। ਇਹ ਸਟੇਜ 30 ਪ੍ਰਬੰਧਕਾਂ ਦੇ ਹੱਥ ਹੋਵੇਗੀ ਜਿਨ੍ਹਾਂ ਵਿੱਚ ਸਾਰੀਆਂ ਜੱਥੇਬੰਦੀਆਂ ਦਾ ਇਕ ਇਕ ਨੁਮਾਇੰਦਾ ਹੋਵੇਗਾ।
ਉਹਨਾਂ ਦੰਸਿਆ ਕਿ ਇਸ ਤੋਂ ਇਲਾਵਾ ਵਾਲੰਟੀਅਰ ਕਮੇਟੀਆਂ ਬਣਾਈਆਂ ਗਈਆਂ ਹਨ ਜਿਹੜੀਆਂ ਹਰ ਤਰ੍ਹਾਂ ਦੇ ਪ੍ਰਬੰਧਾਂ ਦਾ ਖ਼ਿਆਲ ਕਰਨਗੀਆਂ।
ਉਕਤ ਤੋਂ ਇਲਾਵਾ ਇਥ 6 ਮੈਂਬਰੀ ਕਮੇਟੀ ਬਣਾਈ ਜਾ ਰਹੀ ਹੈ ਜਿਹੜੀ ਸਮਰਥਨ ਦੇਣ ਜਾਂ ਸਟੇਜ ਤੋਂ ਬੋਲਣ ਵਾਲੇ ਸਮਰਥਕਾਂ ਨਾਲ ਪਹਿਲਾਂ ਗੱਲਬਾਤ ਕਰਨਗੀਆਂ ਅਤੇ ਇਸ ਕਮੇਟੀ ਦੀ ਪ੍ਰਵਾਨਗੀ ਤੋਂ ਬਾਅਦ ਹੀ ਉਨ੍ਹਾਂ ਨੂੰ ਸਮਾਂ ਮਿਲੇਗਾ।