ਯੈੱਸ ਪੰਜਾਬ
ਨਵੀਂ ਦਿੱਲੀ, 8 ਦਸੰਬਰ, 2020:
ਕਿਸਾਨੀ ਅੰਦੋਲਨ ਦੇ ਚੱਲਦਿਆਂ ਮੰਗਲਵਾਰ ਨੂੰ ਭਾਰਤ ਬੰਦ ਦੇ ਦਿਨ ਦੇਸ਼ ਦੇ ਗ੍ਰਹਿ ਮੰਤਰੀ ਸ੍ਰੀ ਅਮਿਤ ਸ਼ਾਹ ਪਹਿਲੀ ਵਾਰ ਕਿਸਾਨਾਂ ਨਾਲ ਗੱਲਬਾਤ ਕਰਨਗੇ।
ਮੰਗਲਵਾਰ ਸ਼ਾਮ 7.30 ਵਜੇ ਸ੍ਰੀ ਅਮਿਤ ਸ਼ਾਹ ਦੇ ਨਿਵਾਸ ਅਸਥਾਨ ’ਤੇ ਹੋਣ ਵਾਲੀ ਇਸ ਮੀਟਿੰਗ ਵਿੱਚ ਵੱਖ ਵੱਖ ਸੂਬਿਆਂ ਤੋਂ 15 ਕਿਸਾਨ ਜੱਥੇਬੰਦੀਆਂ ਸ਼ਾਮਿਲ ਹੋ ਸਕਦੀਆਂ ਹਨ।
ਖ਼ੁਦ ਸ੍ਰੀ ਅਮਿਤ ਸ਼ਾਹ ਵੱਲੋਂ ਆਏ ਸੱਦੇ ’ਤੇ ਮੰਥਨ ਕਰਨ ਲਈ ਪੰਜਾਬ ਦੀਆਂ ਕਿਸਾਨ ਜੱਥੇਬੰਦੀਆਂ ਨੇ ਇਕ ਹੰਗਾਮੀ ਮੀਟਿੰਗ ਸੱਦ ਲਈ ਹੈ ਜਿਸ ਵਿੱਚ ਇਸ ਮੀਟਿੰਗ ਵਿੱਚ ਜਾਣ ਨਾ ਜਾਣ ਜਾਂ ਫ਼ਿਰ ਜਾਣ ਬਾਰੇ ਫ਼ੈਸਲਾ ਲਏ ਜਾਣ ’ਤੇ ਮੀਟਿੰਗ ਦਾ ਏਜੰਡਾ ਤੈਅ ਕੀਤਾ ਜਾਵੇਗਾ।
ਇਸ ਮੀਟਿੰਗ ਨੂੰ ਬੁੱਧਵਾਰ ਸਵੇਰੇ 11 ਵਜੇ ਕੇਂਦਰ ਅਤੇ ਕਿਸਾਨਾਂ ਦੀ ਵਿਗਿਆਨ ਭਵਨ ਵਿੱਚ ਤੈਅ ਹੋਣਵਾਲੀ ਛੇਵੇਂ ਗੇੜ ਦੀ ਗੱਲਬਾਤ ਤੋਂ ਪਹਿਲਾਂ ਜ਼ਮੀਨ ਤਿਆਰ ਕਰਨ ਦਾ ਯਤਨ ਸਮਝਿਆ ਜਾ ਰਿਹਾ ਹੈ।
ਸਮਝਿਆ ਜਾਂਦਾ ਹੈ ਕਿ ਦੋਹਾਂ ਧਿਰਾਂ ਦੇ ਆਪੋ ਆਪਣੇ ਸਟੈਂਡ ’ਤੇ ਅੜੇ ਰਹਿਣ ਕਾਰਨ ਕਲ੍ਹ ਦੀ ਮੀਟਿੰਗ ਨਿਰਣਾਇਕ ਵੀ ਰਹਿ ਸਕਦੀ ਹੈ ਅਤੇ ਕਲ੍ਹ ਹੀ ਇਹ ਗੱਲਬਾਤ ਟੁੱਟਣ ਵੱਲ ਵੀ ਜਾ ਸਕਦੀ ਹੈ। ਕਿਸਾਨਾਂ ਨੇ ਪਿਛਲੀ ਵਾਰ ਤੋਂ ਹੀ ‘ਯੈੱਸ ਔਰ ਨੋ’ ਭਾਵ ਹਾਂ ਕਰੋ ਜਾਂ ਨਾਂਹ ਕਰੋ ਵਾਲੀ ਨੀਤੀ ਅਪਨਾਈ ਹੋਈ ਹੈ।
ਇਹ ਵੀ ਖ਼ਬਰ ਹੈ ਕਿ ਅੱਜ ਸ੍ਰੀ ਅਮਿਤ ਸ਼ਾਹ ਕਿਸਾਨਾਂ ਨਾਲ ਬੈਠਕ ਵਿੱਚ ਸਰਕਾਰ ਵੱਲੋਂ ਕਲ੍ਹ ਨੂੰ ਐਲਾਨੇ ਜਾਣ ਵਾਲੇ ਫ਼ੈਸਲੇ ਸੰਬੰਧੀ ਉਨ੍ਹਾਂ ਸਾਹਮਣੇ ਤਜ਼ਵੀਜ਼ਾਂ ਰੱਖ ਕੇ ਉਸ ਬਾਰੇ ਕਿਸਾਨਾਂ ਦੇ ਮਨ ਦੀ ਜਾਣਨ ਦੀ ਕੋਸ਼ਿਸ਼ ਕਰਨਗੇ।
ਕਹਿਣ ਨੂੰ ਤਾਂ ਬਹੁਤ ਕੁਝ ਹੈ ਪਰ ਮੈਂ ਸਿਰਫ਼ ਇੰਨੀ ਗੱਲ ਕਹੂੰਗਾ.. .. ..: Gurdaas Maan
